Mak 6:30-55

³⁰Apasoro mu Iesu birorot empaniya. Mu dividivi ayawa ge toyau munnewa undag Iesu gumbe waya.

³¹Me dirum wane, “At wayug wayug onan arawa ne gunap ye yekut oneya nonewa emiya.” Kuiyawa iyayapan obiren uwa ge am emewa, mu nakwai muma natanwa kumiwa onan.

³²Meoya mu mukut wa gumbe pontone arawa amiya.

³³Mu kwemum amiyawa iyayapan obiren mu yaug anoya. Meoya mu gwetoimu undag apa amowo kinipam amog asimeve namuwon uwaya.

³⁴Iesu wa avig on aigne iyayapan obiren yawamne. Me munan danadawai anone. Kuiyawa mu sip mina mu sip amaraivi abnawa gaibu onan. Meoya me amatog toyautoyau obiren ane.

³⁵Kum aigivi augoiyau uwaiviwa, aigowawa Iesu gumbe uwaya. Mu waya, “Mame gina inguiwa arawa, sira kum onanatan aivi.

³⁶Iyayapan kwema ampe, kuiyawa mu oma ane at ama gambenwa go gweyowa ampe. Nakwai divi da mumbo gwiruwat nape.”

³⁷Megara me garawa wane, “Ye nakwai da muniya.” Me gumbe waya, “Me 200 denari aupe! Nu anta bredi me 200 denari gumbe gwiruwak mu munta?”

³⁸Iesu singui wag dirumne, “Ye bredi anintom tamiyan? Aiseg yauya.” Mu yawamiyawa aib waya, “Naningambenit ge gwambui duwam.”

³⁹Meve Iesu mu dirum wane, “Ye iyayapan dirumiya kuiya dada wayo egave yan wakepe.”

⁴⁰Sira mu kuiya dada 100 go 50 yan wakeya.

⁴¹Iesu bredi 5 ge gwambui duwam bog kwimin wan yaune, me gaun gumbe wane, bredi warensine. Meve me iyayapan namuwo mu tetan oya aigowawa munne. Me gwambui duwam gaibu mu undag kebag munne.

⁴²Mu undag naya oma ane.

⁴³Aigowawa bredi ge gwambui naya musimusiwa pot 12 enamiya noidauwaya.

⁴⁴Apan mu nayawa me 5,000.

⁴⁵Iesu tatevit aigowawa dirumne wa danave unigiya sira at Betuseida namiven amome, Iesu me iyayapan tene taig amiya.

⁴⁶Iesu iyayapan obiren yankwem, tui visi gambenwa nun watan oya dog aine.

⁴⁷Augoiyau uwane. Wa awau dana bunangave yokene, Iesu mekut piyuwau wakene.

⁴⁸Me aigowawa yawamnewa mu bara wareg itan utan eme. Kuiyawa taig gurivi. Arampuna kum koniwa duwamdesi wanteteyau me dauwag poeman egave amave munan aine. Me koni mu emariya muntan ane.

⁴⁹Mu Iesu poeman egave amave onivi yauyawa, mu yaug anoyawa me airapu. Mu kwaru waya.

⁵⁰Kuiyawa mu undag me yauya a aya. Tatevit Iesu munan dirum wane, “Yusiyusi aya! Ma ne. A den aya.”

⁵¹Meve me wa danave mu gaibu dauwag ainewa, taig memeyaig aigne. Mu teraya guwowa puk wane.

⁵²Kuiyawa mu bredi gumbe den yai yaug anoya. Mu nonomagowa yaigiwane.

⁵³Awau gambenwa dauwag amiya piyu Genesaret apa uwaya, sira anika aoreya.

⁵⁴Mu wa gumbe dauwag onamiyawa, iyayapan tatevit Iesu irawa yawag anoya.

⁵⁵Sira mu at me undag gwe gwe kintoya. Mu Iesu ampa wakenewa anoyawa, yuwat igiyawa kem egave bog at me uwaya.