San Marcos 6:30-55

³⁰Entonces tejtzen cypon meltz'aj jcablajajxin sma'n tu'n Jesús te xnaktz'al jaa'j ta'xin, bix ak'kexin kbalte te Jesús tik'ch otk baj cyexin bix tik'ch otk baj cyxnak'tzanxin.

³¹Bix e xi' tkba'n Jesús cyexin: —Ko'ke ajlal kjunalx tuj jun lugar tuj ttz̈yal—tz̈i Jesús, cuma txolen cypon xjal bix xi'nax cyxi' xjal. Mitetpe e binttl cywaa'nxin tu'n nimxse xjal.

³²Bix ocx Jesús cyuya t-xnak'atz tuj jun choc tu'n cyiy'xxin tuj jun chk'ajlaj jaa' min-ala xjal.

³³Pero nim xjal oc cye'yente cyexin tej cyiy'xxin. Tej tzunj toc cycye'yen xjal, bix e xi' baj ke xjal cyuj tnom tu'n cypon xjal jaa'j cypomlel Jesús. Bix e pon ke xjal nejl twitz Jesús.

³⁴Tej tzunj cypon Jesús, bix oc tcye'yenxin nimxse xjal. Bix oc k'a'ben tc'u'j Jesús cyi' xjal, cuma tisen jun cloj carnel min-al cycylel. Bix ak' Jesús xnak'tzal cye xjal ti' tik'ch jilel.

³⁵Tetzen kale, bix oc lk'e ke t-xnak'atz Jesús ti'j, bix e xi' cykba'nxin: —Ya kaletltzen, bix tzalu mintii'xse ba'n tcnet.

³⁶Bajsanc'atzen twi' t-xnak'atza cyuya xjal tu'n cyxi' lok'ol cywa tuj kej coc' tnoma—tz̈ikexin.

³⁷Pero bix aj ttzak'be'n Jesús: —Ejee' cyey cyk'onx cywa xjal—tz̈i Jesús. Bix aj cytzak'be'n t-xnak'atzxin: —¿Tipa ttena ko xe'l tzuna lok'ol nim pan? Atetle twi' tc'u'j jun xjal te jun jnabk'i, la'tzen ka canan te twi' pan—tz̈ikexin te Jesús.

³⁸Pero bix aj ttzak'be'n Jesús: —Jte' pan k'i'n cyu'na. Cyjya'x—tz̈i Jesús. Tej tzunj tbaj cyjyo'nxin, bix e xi' cykba'nxin te Jesús: —Ma cnet jwe' pan ku'na bix ca'ba quis̈—tz̈ikexin.

³⁹Bix e xi' tkba'n Jesús tu'n cycub ke xjal tibaj ẍk'ilen c'ul tuj chk'ajlaj.

⁴⁰Bix e cub ke ke xjal tuj tclojan te syent bix te cya'wnak tuya lajaj.

⁴¹Tejtzen tbint cyten xjal, bix e tzaj ttzyu'n Jesús jjwe' pan bix xsunj ca'ba quis̈. Ncye'yen xsunxin tuj cya'j, t-xi' tkanenxin chjonte te Dios ti' cywaxin. Bix ak' Jesús pa'lc'ate pan te ke t-xnak'atzxin tu'n t-xi' cypa'nxin cye xjal. Mixe jun e jatz baj pan tuj tcublel, cuma otk txi' tz̈'iy tken pan. Bix ju'x tchu'l quis̈.

⁴²Bix cykiltzen e waa'n tejxe tnoj cyc'u'j.

⁴³Cybajtzen waa'n xjal, e cyajx cablajaj chi'l pan bix quis̈.

⁴⁴Atle jwe' mil xjal xinak e waa'n.

⁴⁵Tbaj tzunj ju'wa, bix e xi' tkba'n Jesús cye t-xnak'atz tu'n cycu'xxin tuj choc juntl maj nejltzen twitz Jesús tu'n cyiy'paxin jlajxitl a' tuj jun tnom Betsaida tbi. Bix iy'xkexin, ncyajtltzente Jesús te bajsalca twi' tyol cyuya xjal.

⁴⁶Tej tzunj tpon baj tyolxin cyuya xjal, bix e jax Jesús twi' jun witz te yolel tuya Dios.

⁴⁷Tcubtzen klolj, nyolentzente Jesús tuya Dios twi' witz, bix ete'tl t-xnak'atzxin tmij a' tuj choc.

⁴⁸Bix oc tcye'yen Jesús ka cyiw tkitj choc tuj a', cuma ju' ntzaj cyk'i'k jaa' xa'ninakexin. Te ch'itk cyskixxin, bix e xi' bet Jesús tibaj a' tu'n tpon cyi'jxin. Cwa tpon canan Jesús cytxlajxin.

⁴⁹Tej tzunj toc cycye'yenxin, e'la tuj cywitzxin ka jun t-xlenel biman nbet tibaj a', bix e jaw sey'pajkexin, bix ak'kexin s̈-il.

⁵⁰Yaa'n nuk junxin oc cye'yente, sino cykilcakexin oc cye'yente. Pero bix e xi' yolen Jesús cyi'jxin: —¡Cyiwx chi oqueley! Inayen weja. Mi'n tzaj ttz̈i cyi'ja—tz̈i Jesús cyexin.

⁵¹Bix e cu'xxin tuj choc, bix jax n-aj lk'etlte cyk'i'k. Bi'xse e jaw klee' ke t-xnak'atz Jesús.

⁵²Amale otket tz'oc cycye'yenxin ti otk tse Jesús kej pan, mitkx n-e'la cyniy'xin ti'j ka cykil ba'n tu'n Jesús. Klolj tuj cywitzxin.

⁵³Cwa cyponxin tuj ttx'otx' Genesaret, jaa' oca cyẍpo'nxin cychocxin ttzii' a'.

⁵⁴Tzinxix nchi cu'tzxin tuj choc el naj cyniy' xjal ti'j ka ja Jesús.

⁵⁵Tejtzen toc cycye'yen xjal jaxin, bix ex ke xjal kbalte cykil tuj tnom bix tuj cojbil. Bix ak' xe'l cyii'n xjal ke yaab twitz wetbil twitz Jesús.