Marko 6:30-55

³⁰Yokanatanune rapatjetna Geso yegi. Runkaklewyegitluna ptowruko klunerukta kamrutanrunapirana, wa runkaklewtapinrina.

³¹Geso wane china, “Ginanu gixa mkoje yineru mwiyawakanuya. Gapnanutanu pshinitsonu.” Gi rixanu gi gepikna wane ginachine yachine. Gi wa kagognena nikinripna.

³²Ralimtna wanna mkoje sato kanawaya yineru mwiyawakanu.

³³Gixo geta yaletna. Rumatkana. Wane rasukyegitluna chijiya ptowruko tsru pokchikaka gajene. Wanna gapka gapoka. Rapatyegitluna Geso.

³⁴Ruptekamta Geso. Retna gixolune yine. Retwamonutna gi rixanu gowegane pixka rixna gi waneyna girukotjerna. Yinuwaka ginkaklewyegitna gixopirana.

³⁵Wa kayi rixinitka yimaklene gapyegitlu. Wane chinna, “Gewni yineru mwiyawakanu. Wa kayitkani.

³⁶Pyokanatanna yine wa sana yinripna, wa pokchikaka tyesretaya wa ragjityapluna nikanrupna.”

³⁷Rugita Wale. Wane china, “Gixa genekanna nikanropna.” Wane chinruna, “¿Wanerge gayanu? ¿Wagjitanro jimapro gepi pachproji wenroloto, wenekyapna nikinropna?”

³⁸Wale wane china, “¿Gi pejnu jimapro waneygi? Getapanro.” Rumatinitkana. Wane chinna wanna, “Pamyo. Gepi shima.”

³⁹Towutna wanna tuplatinripna pejnuruneko paptogkaka peklomta poleru.

⁴⁰Tuplatna paptogkaka satu pachkaka ga wa pamyomolkaka koxa.

⁴¹Geso kashichlo pamyo jimapro ga wa gepi shima. Tengogne yigata. Ruglenshinikanyegitlu. Wa jiknajrotlu jimapro. Renekna yimaklene rutspamtinripna. Raneksatkana wa pejnuruneko wa gepiroto shima koxa.

⁴²Nikatkana pejnuruneko. Jinanutkana.

⁴³Koschekluna psojkaka pamole gepi kojita katsepo, ga wa shima koxa.

⁴⁴Wa nikachine pamyo waragka jejine.

⁴⁵Waneklutka kanawa ratskojixatkana yimaklene wa Wetsayta gapka yinripna wakanu. Wane yakopshinna yokanatna gixolune yine.

⁴⁶Rali gingaletinitkana wane ya magka. Ragjigognetapa.

⁴⁷Wa kayi rixinitka wa kanawa ganikajgatkalo tsru wenuya. Walepje chiji gwatka.

⁴⁸Retna kegeknanuwatna ranikgatyawakna. Wa kannipgyalu satkakanna. Wa goyechnokawpotuko Geso ginyegitna. Tsru wenumta yapananumta. Raluka giknoglemtna.

⁴⁹Retinitkaluna wa tsru wenumta yanamtyawaka. Kagwakluna pagixanu. Saplewatanna.

⁵⁰Gi rixanu pejnuruneko getlu. Rumyekanna. Waneklutka Geso giynumatna. Wane china, “Kiglenshinikanupgi. Gitni. Gi wa mpikanu.”

⁵¹Ratskota kanawa wanna yegi. Rutukamta kannipgyalu. Ruglajpotutanna.

⁵²Gi rixanu gi rumata jemluna wa jimaprokakapirana. Shikowgajitna wane rixinrina.

⁵³Wa koprugatinitkana, wane yana Genesarchijne. Rutspakatkana.

⁵⁴Ruptekinitkana wa kanawaya, waneklutka rumatkatka Geso.

⁵⁵Rasuktatna psoluko walesretaya. Yinuwaka gwapletkana pnumnu gajene yayixachine gijekoyna ginakakta jemyegityawakluna.