Mareko 6:30-55

³⁰Apostolo tataodi se tupagogoesegaidima Iesu arinai, wasa gamagari ia se heriba, isi adi wawari, eo edi lauheata se wasaduaiei ia arinai.

³¹Ia ie ribalau isi aridi eai, i ene, “Omibom au lausuarama, ta lau malatupama eai, ta aiyawasi sora.” Tatao gamagari se laoma na, se lau, se hemodedi nige edi huia bena se aiyawasi.

³²Isi waga eai se geru mahimahihi, se lau malatupama eai.

³³Isi edi aba lau ne tatao se ita, gamagaridi se nuatuiyao, eanua gamagamagari eai isi abo se aitautau, se lage bagunao, abo se tupagogoma ia arinai.

³⁴Iesu abo ie dunasae moutuana lailai i itadi, eo i nuatoatoaidi, paana isi doha mamoe nige taumiataunidi; ia i hetubu ginauri gamagaridi i heatadi.

³⁵Mahana ie tarueo, ena heaheatayao se laoma ia arinai, si ene, “Malatupama ina mahana hede i duio ta.

³⁶U hetamaridi se lau eanua gougou eai, eo eanua hanahanau eai, aiai adi se uneune; isi aiai adi nige’e.”

³⁷Ia i heuio, ie ribalau aridi eai, i ene, “Aiai adi omi au mosedi.” Isi abo se ribalau ia arinai, si ene, “Denari tataosaudoudoi‐se‐mate taba ai abidi adi aiai ai uneune wa, abo ai mosedi se ai?”

³⁸Ia ie ribalau isi aridi eai, i ene, “Ami falawa wa hisa? Au lau au hasiridi.” Isi se hasiridi, abo si ene, “Haligigi, eo eama labui.”

³⁹Ia ie ribalau isi aridi eai, i ene, “Gamagaridi au hebawaporuporudi lei potana eai.”

⁴⁰Isi abo se bawabigabiga, hari poru tatao haligigi se mate, hari poru tatao‐labui‐se‐mate‐saudoudoi.

⁴¹Ia falawa haligigi i abidi, eo eama labui, i itaitasae galewa eai, i aihelahui; falawa abo i ihidi, abo i mosedi ena heaheatayao aridi eai, isi abo se peiauri moutuana lailai wa nuanuadi eai, eo eama labui hinage i soiedi isi gamagaridi adi.

⁴²Isi gamagaridi se aiai, e, bogadi se sese.

⁴³Isi falawa eo eama aitoredi se tanogogoidi, bosa saudoudoi‐labui se hemonaudi.

⁴⁴Isi aiai tauaina nuana tatao tausani haligigi.

⁴⁵Ia ena heaheatayao i nuaoidi arinai se lau waga eai se geru baguna, se lau Betesaida eai, hari sana awasi eai, iabom ie mia moutuana i hetamaridi.

⁴⁶Ia i hetamaridi se lau, ia abo ie dalasae oea tupina esau eai, i lauuura.

⁴⁷Mahana ie duio, waga ie lau gabogabo duaduarina eai, ia iabom ie mia oea eai.

⁴⁸Ia i itadi, isi eare eai eawasidi se motu, mana ie toama matadi eai, bulinuana eai ie lau isi aridi eai, butubutu potadi eai, i laolaoma isi hasaridi eai.

⁴⁹Isi ia se ita butubutu potana eai i laulau, isi edi nuatu, si ene bena earuyarua. Isi abo se eabayabaei;

⁵⁰isi gamagaridi ia se ita, se matausi ariariri. Ia ie ribalau isi aridi eai, i ene, “Nuamiu se taru: eau ede ina; tabu au matausi.”

⁵¹Ia ie gerusae waga eai isi aridi eai, mana abo ie motu; isi abo se noo to se noo ariariri.

⁵²Paana falawa gagiridi laulauna wa nige se nuatulobai, isi nuadi se oiura.

⁵³Isi se lage hari sana awasi eai, Genesareta eanuana eai, nei eai se lopatu.

⁵⁴Isi waga se pesagabei, tatao ia se italobai,

⁵⁵se aitautau, nei eanua eai eo eanua maudoudoina se hetaiiri, ena aba lage se ribaei, isi se ataiei, tauasiasiebo ma hatahatadi se laedi ia arinai.