Mark 6:30-55

³⁰Kamini ini nifeidena vene bi inasa amei desi bi ini beika reyadi ma beika oteimaradi mina nigamadi.

³¹Minari bi amiye tau gade gade ma nega baegasa reyadi, dada iri-iri di meda bi de. Ye niyo, “Ya yaku maka nasa baegedi ma disi mafumafu sanari sifere regifa.”

³²Ye boutiri keu risi mafumafu sana yokoiri boyadi.

³³Idu boyadiri, bi amiye tau, kaere ini goidu digo sana bi vesi diba niyadi, bi taoni tau gutuna yuka dudu raga resi sena bogamadi ini boi okigedi sana.

³⁴Ye bouti feresi soka regasa bi amiye tau gade gade vesi ina rofu iriyeduka reyo, adina bi mamoe ini dogo amiye bi de kana, dada ago tau gade nioteimagi kora regamo.

³⁵Ma meda bi uriyenau eta rofu niyori, bi ini usi dina vene ina rofu baesi niyadi, “Mina bi autu sana ma ari bi koina niyo mini.

³⁶Amiye nifeide kumo mina atafu gagani sanari ma rauturi disi ini iruku voi resi iriyaganedi.”

³⁷Idu nikabai resi niyo, “Ya yaku iruku mafo kumo iriyaganedi.” Ma niyadi, “Una yaku siriva fore 200 dudu beredi voi resi mina vene magifa ma irigedi ba?”

³⁸Ma ina yaku niyo, “Beredi gokaisanu? Disi vefa.” Ye baku resi niyadi, “Beredi 5 ma oyena remanu mini.”

³⁹Ye ago maro bi amiye tau neinei dudu mutaka odoro ameinu reyainedi.

⁴⁰Dada amiye bi tau neinei be bi 100 dudu ma be bi 50 dudu ameyadi.

⁴¹Ma beredi 5 ma oyena remanu moisi oma rofu vegasa buni tora gade Sei rofu masi bi beredi moi okusi ini usi dina vene maro bi amiye tau rofu rau reyaganedi. Ina ka oyena remanu moi odesi amiye tau rofu rau reyadi.

⁴²Ye ina tau noibanu iriyadi ma ini uka bere niyadi.

⁴³Ma beredi ma oyena tuta butu resi foroka 12 moi vata baeyadi.

⁴⁴Ye mina iriyadi vene bi rumana vene maka 5,000.

⁴⁵Ye amiye tau gade nifeidegasa evade ini usi dina vene rofu ago maro bi bouti keu risi ina siko Bethsaida ri moka daidai tora berou eta rofu boyaganedi.

⁴⁶Ye amiye feresi bi omuna ikari usa usa nigika boyo.

⁴⁷Uriyenau tumu niyori, bouti bi moka daidai tora tobo ramari, ye inaike konori ameyo.

⁴⁸Ne resi veyori, bi ini usi dina vene bi fayo rena bi gira iniye nigamo, adina aura bi bogamadi sana baegamo dada. Ye ari uvego atafuri ina vene urana koru toboma nana regasa boyo. Ina vene ebu rego vo niyo.

⁴⁹Idu Iesu moka daidai tora fafau nana regamo vegasa mokeyadi mina bi godiyo. Kamini imuna niyadi,

⁵⁰ina tau vakoi vesi ori reyadi dada. Idu minari maka Iesu ina vene rofu niyo, “Mina bi na; uka gira nisi ori ga refa!”

⁵¹Kamini boutiri ina venesa keu riyo ma aura amuta niyo. Ina vene bi tururu iniye reyadi,

⁵²adina ini ada de fateyo amiye 5,000 vana reyo bi, ini uka forovai reyadi dada.

⁵³Kamini moka daidai tora ugasi bi Gennesaret gaganiri okisi minari bouti utae reyadi.

⁵⁴Ye bouti fereyadiri, amiye evade vei mama reyadi.

⁵⁵Resi mina gagani di berou berouri raga resi ini gauka vene ekamari uakaisi afei okigi kora regamadi. Mina bi Iesu ini goidu amegamo sana bi neidegamadi dada.