Mak 6:30-55

³⁰La luvuttadi vavang at ne Iesu digamlong ta la diga tong asu lempanga axap diga lox i la levelinga diga anasa limixin min.

³¹La ne Iesu ga lok tidi xeretna, “Ude nimi, nedik kusuk ata onon uto at lamatbin kusu mina lok mamana lixilik be.” Mila buaang limixin diga rupot pasa amisik ne Iesu mi lavaun pinivu ren la di goxo epovo kusu dina anan.

³²La diga sen kaxat mi lesepang uto at loxot petpes, ua limixin di goxo nemen teren.

³³Ketla buaang limixin diga ven nedi diga sen mi lesepang la diga ven kibis di. Digat pas basinge levenmenemen atdi la diga mumu loxon la diga rupot avot to ap mo loxot ti ne Iesu mi lavaun pinivu ren.

³⁴La ne Iesu eburu mi lavaun pinivu ren diga oso mi lesepang la ni ga ven buaang limixin solo. Neni ga balamu di mila diga lok ngan laxasipsip kopmen taradi loklok tatao atnedi. Kuren la ni ga anasa di mi laxampapaase solo.

³⁵Ga ukantinao lavaun pinivu at ne Iesu diga rupot pasa ne Iesu la diga lok tin keretna, “Ukantinao nga na la na loxot, ni loxot mimila rino.

³⁶Una riki aonon limixin kusu dibat pas uto at levenmenemen la dina un ka tempanga anan tidi.”

³⁷Ketla ne Iesu ga lok tidi xeretna, “Nemi xa mina raba nedi mi teveluxa xusu dina anan i.” La diga lok tin keretna, “Kereva, u vara i dola manat pas ti un kaka tevengkongkide mi legepu sangaun kobot (200) denarias atdik la mana un panga anan min tidi?” Mo lempilas ga epovo dola tara na gugu at lavanuti gaaling ti lok kaka i nom.

³⁸La ne Iesu ga lok tidi xeretna, “Minat pas la mina ven lavanisa lengkongkide mo ik lok.” La digaklen ka i la diga lok tin keretna, “Lavalimo lengkongkide la legepu venmat kakalik na.”

³⁹La ne Iesu ga lok tidi xeretna, “Mina lox axis limixin axap at levenbinam tadi at levennep mi lempivilis avukat teren.”

⁴⁰La nedi diga xis kopok ap mo lenep, lepentaba legesa sangaun kobot (100) diga xis eburu, lentaba lavalimo sangaun limixin diga xis eburu, nedi axap digat kis kerepmo.

⁴¹La ne Iesu ga lok kaka levengkongkide mi luemat, la ga milik aurut uto at laxalibet la ga tong avukat ti ne Moroa. Ga sebek nom levengkongkide la ga raba lavaun pinivu ren min la diga raba limixin min. La ni ga raba bok luemat tidi.

⁴²La limixin axap diga anan la diga an mais.

⁴³La lavaun pinivu diga luxa lasangaun mi legepura leventat mi leveluxa mo diga an ake i ren.

⁴⁴La nedi luvuttadi remes diga anan, diga epovo at lavalimo larabin sangsangaun kobot (5000).

⁴⁵La soso mun ne Iesu ga tong i ri lavaun pinivu ren do dina los kas at lesepang la dinamgo rin uto at lemenemen Betsaida. La ne Iesu ga riki aonon limixin.

⁴⁶La neni ga vas kaxat basinge di la ga urut uto vana at lakaana xusu na ngising.

⁴⁷At laxanimin lesepang at lavaun pinivu gak sixit kantubu at lavatdan kis la ne Iesu xusuk gak lok to loxon.

⁴⁸La ne Iesu ga ven di, digatlatla lolos mila lamanman gat mas lolos tangarang di. Kantubu at lavantun konaleng la lavanna konaleng at laxanimin ne Iesu ga vas kaxat to mavana mun at lavatdan kis. La ni ga rupot saparap di la ga doma i do na vas polo di.

⁴⁹Ketla at loxonaleng diga ven ne Iesu gat pas to mavana at lavatdan kis, diga lok do neni loroonan panga la digap kup silok,

⁵⁰mila diga ven i la diga marat aleng. La soso mun ne Iesu ga lok tidi xeretna, “Nemen gat mita marat. Mina lolos. Nenia mun na.”

⁵¹La neni ga los kas at lesepang la lamanman gara xap matmas ta. La lavaun pinivu ren diga sangu aleng.

⁵²Levendoxoma atdi ga repe. Di goxoklen lavasuun at lempanga sangsangu ne Iesu ga lox i mi mo lempanga anan.

⁵³La diga xan polo lavatdan kis la diga oso to at lenep kangka Genesaret.

⁵⁴La diga vas su at lesepang, la limixin ap mo loxot diga ven kibis ne Iesu.

⁵⁵La digak sixit uto at lengkot axap ap mo lenep la digamlong mi luvuttadi mekmeres, lentaba atdi diga xip di mi levenora uto at lengkot no ne Iesu gat pas ue.