Mark 6:30-55

³⁰Me sul fapi apostel ngak Jesus, miyad yog ngak e tin ni kar rin’ed nge tin ni kar machib niged ngak e girdi’.

³¹Ma bo’or e girdi’ ni be yib ma tin ni be yan ndariy e ngiyal’ nrayag ni nge abich Jesus nge pi gachalpen riy. Me ere ga’ar Jesus ngorad, “Mmarod ngdarod ngabang ndariy be’ riy nga yugu mu toffangad bochu’uw.”

³²Miyad af ngalan e bowoch ni go’ yad ngar leked bangi yan’ ndariy be’ riy.

³³Ma pire’ e girdi’ ni guyrad ni ka ranod, min poyrad; me mil e girdi’ u gubin e binaw ngranod u arow ngranod ra son gad ko gin ni be sor Jesus nge pi gachalpen ngay.

³⁴Ma nap’an ni chuw Jesus u bowoch nge yan nga daken e binaw, me guy e girdi’ ni pire’ ni pire’, me ri taganan’ ngorad, ya yad bod e saf nde moy e en nma gafaliyrad rorad. Ma aram me tabab i machibnag bo’or ban’en ngorad.

³⁵Ma nap’an nike chugur ni nge aw e yal’, me yib pi gachalpen ngak me lungurad, “Chiney e kari gonowrug, ma gin’ey e danir par riy.

³⁶Mu non ngak e girdi’ ngranod ko yungi n’en nib chugur ngaray ni yibe par riy yibe woldug, nge pi binaw nib chugur ngaray ngar chuw’iyed ban’en ngar ked.”

³⁷Me fulweg Jesus ni ga’ar ngorad, “Gimed e mpi’ed ban’en ngorad ngar ked.” Me lungurad ngak, “Gab adag ni gamad ra yan gu chuw’iyed urngin e flowa nrayag u l’agruw mir’ay yang e salpiy ni wasey nib silber nggu pi’ed ngorad ngar ked?”

³⁸Ma aram me fithrad Jesus ni ga’ar, “In yal’ e flowa ni bay romed? Mu guyed ngam nanged.” Ma nap’an nra nanged urngin me lungurad ngak, “Lal yal’ nge l’agruw e nig.”

³⁹Me yog Jesus ngak pi gachalpen ni ngrogned ngak urngin e girdi’ ngar yuulunggad ngar pired nga but’ nga daken e pan nib galunglung.

⁴⁰Me par fapi girdi’ nga but’ ni kar yuthalgad ni yad yu ulung ni yu ra’ay nge yu wugem reb e ulung.

⁴¹Me fek Jesus fa lal yal’ i flowa nge fa gali nig, me sap ngalang, me pining e magaer riy ngak Got. Mi i t’et’ar fa yu yal’ i flowa ngi i pi’ ngak pi gachalpen ngar f’othed ko girdi’. Ma ku errogon fa gali nig ni ki t’et’ar nge pi’ ngorad ngar f’othed ko girdi’ ni urngin.

⁴²Ma yad urngin nra ked ngar fosgad ngay.

⁴³Me kunukunuy pi gachalpen Jesus e flowa nge nig ndaki m’ay i kay me gaman ragag nge l’agruw e dug riy.

⁴⁴Mu fithik’ fapi girdi’ nra ked fa flowa e lal e biyu’ e pumo’on ni ur moyed riy.

⁴⁵Ka chingiyal’ nem me yog Jesus ngak pi gachalpen ni ngar afgad nga bowoch ngar m’onod rok Jesus nga Bethsaida, ni bay nga baraba’ fare lipath, me yog ngak fapi girdi’ ni aram urngirad ni ngar sulod.

⁴⁶Ma nap’an ni mu’ Jesus i fangichiyrad me yan nga daken bburey ni nge meybil.

⁴⁷Ma nap’an ni aw e lumor ma ke taw fare bowoch nga lukngun e lipath, ma bay Jesus u daken e binaw ni go ir.

⁴⁸Me guy pi gachalpen ni kar gafgowgad ko maman, ya yad be yan nga mit e nifeng; me bingiyal’ u thilin e dalip nge nel’ e kolok ko tanirran me yib ngorad ni be yib u daken e ran. Me yan ni nge yan i thiliyegrad,

⁴⁹machane miyad guy Jesus ni be yib u daken e ran, miyad finey nib kan, miyad tolul.

⁵⁰Ya fa’anra guyed ni yad gubin miyad tamdag ngak. Ka chingiyal’ nem me non Jesus ngorad ni ga’ar, “Mu pagan’gad, ya gag, dab kum tamdaggad!”

⁵¹Me af ngorad nga bowoch, me mocha’ e nifeng. Me gin owchen pi gachalpen ko n’en ni kar guyed, miyad par ni kari balyangan’rad,

⁵²ya de yag ni ngar nanged fan fa yu yal’ i flowa ni yodoromnag Jesus; ya de pat nga lanin’rad.

⁵³Miyad th’ab e lipath ngarbad nga Gennesaret, miyad yuluy e bowoch u rom.

⁵⁴Ma nap’an nra afgad u bowoch nga talang, ma ka chingiyal’ nem me poy e girdi’ Jesus.

⁵⁵Me mil e girdi’ u lan e binaw i yan ni yad be kunukunuy e pi’in nib m’ar ngu’ur gochowriyed yad i yib ko yu yang i n’en ni kar rung’aged ni bay Jesus riy, ni kan tayrad nga daken e wormel.