Mak 6:30-55

³⁰Odocob aposel ceseli Jisasca humeig ceteteh cunug odoinnuca iwaladeinnuca sadoin.

³¹Euqa dana cajaca mati bahic lili huhueegin Jisas uqana malogomca sab jecnu saenca qee. Eunu Jisas malogom maaden, “Hoiga, ege cuhanuc belimeb cudun leihna age nag odi jaen muduqagan,” aden.

³²Odocob age cuhanuc wag umeig cudun tiliecna belein.

³³Aria, dana cajaca mati bahic bebelegin meciadimeig age ail eu wele doin i age guguli taun cunug wooldodoig age casac maha toodu cocobi cudun euna Jisas uqana malogomca medemega cagu calein.

³⁴Odocobil Jisas lanna tonimei dana cajaca am ben tatawegin fen. Odocob uqa age sipsip cofadecca qee cobogina odiwe bilein eunu agenu waug qon. Odimei uqa ceteteh mati bahic iwaladecnu sanan men.

³⁵Saen wele hedodon uqana malogom uqaca humeig madoin, “Cudun i filec cagocna bahic, odocob saen wele hedoia.

³⁶Dana cajaca i age hatu alildoc belimeig jobon osonana agena sab jecnu fajoqagannu suladaga,” doin.

³⁷Euqa Jisas malogom maaden, “Age sab jec adeiga,” aden. Odocob age jejeg hewi madoin, “Hina ege nui kina 200na bred fajimeb adocomun joqagannu madaganafo?” doin.

³⁸Odocobil Jisas maaden, “Age bred ganicca? Li feiga,” aden. Odocob age li fimeig madoin, “Bred 5-pela, cul dool lecisca himec bilia,” doin.

³⁹Odocobil Jisas uqa dana cajaca age am qatanimeig gigisac mena bileiga ec maaden.

⁴⁰Odocob dana cajaca am qatanimeig bilein. Age am sanijec 100ca 50ca odi bilein.

⁴¹Odocob Jisas bred 5-pela cul dool lecisca u hewimei sao jobon tatiimei Anut hetaga doc je madumei bred fenifeni malogom adeceb age dana cajaca siwiadein. Odimei uqa cul dool lecisha feni calcaldumei dana cajaca siwiadeceb cunug ihoc len.

⁴²Odocob age cunug jecebil li ihoc len.

⁴³Odocobil malogom age bred cul doolca jecefanaga eundec galel 12-pela tacecebil am ben.

⁴⁴Bred jein eundec age cunug eu dana 5,000.

⁴⁵Mahuc bahic Jisas uqana malogom cesusadeceb age wagna tobimeig age aqunitu Galili wa gad cagoc naha isecnu Betsaida jobon belein. Bebelegin uqa dana cajaca qaqacitegin cofaden.

⁴⁶Uqa dana cajaca culadi hedocob uqa Anut inondudu bilecnu aluh guhidocna ten.

⁴⁷Wele tu hohon wag eu wa gad cagocna len. Jisas uqa cuhanuc mahana bilen.

⁴⁸Odimei fufu ben malogom olanagana isec fuludonnu uqa age wag culum hewecnu abuldodogin meciaden. Odimei walag danigia oodon Jisas uqa wa tatacan cocobi ageca len. Uqa age wooladigia odon.

⁴⁹Euqa age uqa macasna cocobon fimeig dol oso cobona imeig euein.

⁵⁰Ge, age cunug fecidumeig age qeleli filicitein. Euqa Jisas mahuc maaden, “Cain cucuiuwain! Ija ihen. Age wawaga toogdoiale!” aden.

⁵¹Odimei uqa wagna ageca tobi ten. Odocob fufu tilien. Uqana malogom tumatumaein.

⁵²Ge, age Jisas uqa dana cajaca bred siwiaden uqana gug qee fogo adel. Euqa age wawaga tool ibuldon.

⁵³Age wa gad cagoc leti hu Genesaret hatuna hoin. Ono age wag lanna qagein.

⁵⁴Age wag tobocobil dana cajaca age Jisas wele fein ec mahuc doin.

⁵⁵Odimeig age hatu cunugna guguli belimeig dana caja hagca agena gabagabna ninijegin hewadi li Jisas ana bilia ec doin euna uqaca ahoin.