Mark 6:30-55

³⁰Edo Yesu da piari aimbari embobo, ami tote (2) tote (2) piesiri idegesitera awa tenda overegedo ainda yai guputera. Edo ro berari atopapositera edo ro esitera awa, tetero gosisina.

³¹Edo awamanede sisina, “Embomai jiwaebé kaenato yai gundo maundo ero kaena rorae indae ena. Awatedo, puwo! Kaende yai damodamoda mamano oena apave.”

³²Ango tesiri awamane ma sindetero wotesiri awamane akuta yai damodamoda maunsitera.

³³Ata awamane mauntero embomai jiwaebé kariwa gositera. Edo embomai nasi babain neneinda awa omboda gisi taimi maundo papoda itero Yesu ae embobo de maundo denembesitera.

³⁴Yesu ma dodo wotedo papoda petedo embo jisi da gosisina. Aindabé awamane awa bé wo sipumane ango sima ari embo itae, awamane gido do ari bajinabé burisina. Awatedo, imo God da ge jiwae awamanede atopatari tuturo esisina.

³⁵Iji maundo wowoteiri Yesu da ambodani gundo ainde sitera, “Yai eiwa abubé. Rorae budo indari begata itae. Iji itae esira.

³⁶Embomai ta pieyo maundo yai demonda nasi babaingae itera, ainda rorae oriedo indoré.”

³⁷Ata Yesu mi sisina, “Inemane indari piewavi indoré.” Edo ambodanimi mina sitera, “Edo nonda budo? Embomai eiwa jiwaebé. Nanekare ganu jiwaemi awa bread oriedo embo jisi da eiwa undarita?”

³⁸Ata Yesu mi ambodanide tenda sisina, “Awara, bread itomane yai ro inge isiri? Mambuwo gave!” Edo ambodani maundo rorae tamundo overegedo Yesu de sitera, “Nakare bread ipa da (5) edo un wo tote (2) tambera.”

³⁹Edo Yesu mi ambodanide sisina, “Awara, tewo, embomai kiyan teka eroreira angoda anunumboré.”

⁴⁰Edo ambodanimi tetero anunumbesitera. Gisi tedo gisi tedo nenei 50, nenei 100 ango anunumbesitera.

⁴¹Ango etero Yesu mi bread ipa da (5) ae un wo tote (2) de awa kundo jisi ikane utuda edo God dasiga esisina. Edo bread engegedo, wo eririgedo ambodanide piesiri kundo maundo embomai anunumbesitera ainde kandokando esitera.

⁴²Embomai berari anunumbesitera awa rorae injido inonobé esitera.

⁴³Edo bread ae wo de injido itoto doturitera awa ambodanimi sirigedo kanjia berari 12 sirero visido beda esisina.

⁴⁴Edo embobo ajijigari 5,000 ango indari awa injitera.

⁴⁵Rorae injido ainda amboda, Yesu mi ainda ambodanide boraebé sisina, “Imomane gisi made Besaida nasida tembuwo! Na embomai eiwa ategano mamborote ena.”

⁴⁶Yesu embomai ategesiri mauntero imo pejida visido yai damodamoda isite God de daedo ge sisina.

⁴⁷Muyae gupeiri ambodani ubutu toropuda mada itero edo Yesu akuta pejida isira.

⁴⁸Ango edo sipo muyaende Yesu jisi tuda edo ambodani ubutu toropuda gosisina. Aindabé bisimi ma pepeda doreira awa, awamane ma dawarida buro okain ero gosisina. Edo Yesu wotedo un tamonda ainto edo awamane kena maunsisina. Ata imo maundo daginegain arago esisina.

⁴⁹Ambodanimi imo un tamonda ainto edo awamane kena gupeiri gido etemi kotembedo aorogatedo adu esitera.

⁵⁰Awamane imo gido adu beyaebé esitera. Ata Yesu mi borae sisina, “Adu eove! Goroba buwo! Na etemi ae! Na awara!”

⁵¹Yesu ge ango tedo ma doda viviteiri bisi itae esisina. Edo ambodanimi wasiri awa gido kore beyaebé esitera.

⁵²Aindabé, awamaneda do okain ari isira, Yesu mi embomai jisi bajinabé undesira awa kotembae, edo awamanemi Yesu da goroba tega rori awa gari tao ae.

⁵³Edo awamane temundo kupo neinda Genesaret ainda ma kaingesitera.

⁵⁴Edo ainda amboda Yesu ae ambodani de ma dodo idegetero embomai ainda ami boraebé Yesu kariwa gositera.

⁵⁵Awatedo tumundo yai demonda embomai berari bino pietero gositera. Edo awamanemi Yesu da yai karu egeregari besida kundo guputera.