Matyu 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Jisasame endakali kambu longo dupa kandatala, baa yuu manda mendenya pao petea. Peteamo dokonya baanya disaipolo dupa epeami.

²Dokopa baame tee pyao, dokaita dapa lao mana lamaiya:

³“Endakali imambunya tipya joo katao, Goteme nisipya laka lao masingima dupa, Goteme minao auu pisingi. Auu pisetae dupa Gotenya isingi mate dokonya katatami.

⁴“Endakali ee lao katengema dupa, Goteme minao auu pisingi. Auu pisetae dupa mona yaepao katatami.

⁵“Endakali anasale joo katengema dupa, Goteme minao auu pisingi. Auu pisetae dupa Goteme yuu maituna leamo doko, nyakama nyetami.

⁶“Lopo pilyamopapi, endaki nanu pilyamopapi, napu laka lao putiti kaengeli pyoo, mana tolatae dupa nyepala, watao minapu laka lao putiti kaeyao katenge endakali dupa, Goteme minao auu pisingi. Auu pisetae dupa Goteme maitamopa, nyakama etete yaka jeta.

⁷“Endakali yango kondo kaenge dupa, Goteme minao auu pisingi. Auu pisetae dupa Goteme kondo kaeyata.

⁸“Endakali Gote-kisa iki mona setenge dupa, Goteme minao auu pisingi. Auu pisetae dupame Gote kandatami.

⁹“Endakali mona mendai paliu katamana lao, kyeto joo akema lengema dupa, Goteme minao auu pisingi. Auu pisetae dupa Goteme baanya ikiningina lata.

¹⁰“Endakali Gotenya mana tolatae minilyamino latala, waka dupame tanda maitaminopa, tanda nenge dupa Goteme minao auu pisingi. Auu pisetae dupa Gotenya isingi mate dokonya katatami.

¹¹“Nyakamame namba watao minilyaminosa, endakali dupame nyakama kandao pii koo lao, sambo pii koo longo dupa lao, nyakama minao koeyasilyaminopa, Goteme nyakama auu pisingi.

¹²Wamba propeta kateamino dupa, endakali dupame minao koeyasiamiakana, nyakama minao koeyasetamino dokopa, nyakama walu nalalapape. Yole etete andake doko kaitinya setekelyamona, nyakama eteke kaeyao, mona epe palyoo kalyepape,” Jisasame lea.

¹³Jisasame dee mende lao pituu, “Nyakama yuu dakenya sole jepae kalyamino. Sole tende patamo doko, nyakamame aipa petala dee tende pisetamipi? Sole tende patae dokome mende napingi. Doko soo yakinatala moko katao nepenge.

¹⁴“Nyakama yuu dakenya tii pipae joo kalyamino. Yuu taono mende manda mendenya silyamo doko, yalo pyoo nasingi. Dopaleaka joo, nyakama-kisa tii pipae doko yalo napipenge.

¹⁵Endakali mendeme lama kaiyepae mende nyepala, penge mendenya koko pyandala naenge. Daa, baame nyepala, toko ketae dokonya setenge. Dopa pilyamo dokome, endakali andaka pilyamino dupa pitaka tii pingi.

¹⁶Dopaleaka joo, nyakama-kisa tii pipae silyamo doko, endakali waka dupame kandena lao kalyepape. Dopa pitaminopa, dupame nyakamanya kalai epe pitamino dupa kandatala, nyakamanya Takange kaitinya katenge doko lao mambo pyatamina” lea.

¹⁷Jisasame dee mende lao pituu, “Mosesame loo seteamo dupapi, propeta dupame mana leamino, dupa nambame nyoo nepalanya epeepe lao masala naeyalapape. Dupa nambame nyoo nepalanya naepeo. Dupa angi jisalanya epeo.

¹⁸Nambame nyakama kiningi langilyo: Yuupi kaitipi dupa etatamopa, loo dupanya kuki etete mendaipi mende alu napita. Dupa alu napitamopaka, pii pepa pyapae silyamo dupa pitaka pyoo etata.

¹⁹Dopana, endakali mendeme mana setapae dupanya kuki etete mende yalatala, endakali waka dupame dopaka pina lao mana lamaitamo doko, baa Gotenya isingi mate dokonya anasale joo katata. Dopaka doko, endakali mendeme mana setapae dupa watao minatala, endakali waka dupame dopaka pina lao mana lamaitamo doko, baa Gotenya isingi mate dokonya, alyasale joo katata.

²⁰Nambame nyakama langilyo: Mosesanya loo mana nyepae akalipi, Parasaipi, dupa ita minao nyakamame mana tolatae minala naeyatamino doko, Gotenya isingi mate dokonya napatamina” lea.

²¹Jisasame dee mende lao pituu, “'Embame endakali yango mende tuu pyoo pyao kumasala naeyape. Pyao kumasetamo endakali doko, laminao kote laa pupengena' lao, wamba nyakamanya yumbange dupa lamaiyamino doko, nyakamame siami.

²²Dopaka doko, nambame nyakama dapa langilyo: Endakali mendeme endakali yango mende imbu kaeyatamo doko, laminao kote laa pupenge. Dee endakali mendeme, endakali yango mende kandao, lamba lao pii koo latamo doko, baa kanjole kambuingi andake doko-kisa laminao pupenge. Dee endakali mendeme mende kandao, kyakaenge mona napalengena latamo doko, baa ita tao katenge ele panda koo dokonya pupenge.

²³Dopana, embame endakali mende koeyasetala, Gote kundi maiya alta tengesa pao pituu, endakali mende koeyasipu doko imbu kaeyao pilyamo lao masetala,

²⁴embanya kundi maipenge doko dosa setapala, embame endakali doko katatasa pupala, lao tolasetala, mona yaepao dee kundi doko Gote maiya pilyepe.

²⁵“Dee endakali mendeme emba-pipa kote laanya pia kandeno dokopa, kaitinisa kote laa pao pituu, embame kote langitamo endakali doko mona auu pisakamaipi. Dopa napitino doko, endakali dokome emba laminao pao jasa doko maitamopa, dokome yanda singi dupa maita. Dokopa dupame emba anjinya palyetami.

²⁶Anjetae paliu, yanu dutupa pyao etateno dokopaka, emba mokatamina lao, nambame nyakama kiningi langilyona” lea.

²⁷Jisasame dee mende lao pituu, “'Embame kepo kolala naeyape' lao, wamba nyakamanya yumbange dupa lamaiyamino doko nyakamame siami.

²⁸Dopaka doko, nambame nyakama dapa langilyo: Akali mendeme enda mende lengeme kandatala, nyipu laka lao masilya dokome moname kepo kolenge.

²⁹Embanya lenge tolae dokome, koo pyaale lao mapisetamo doko, lukunya nepape. Emba lenge mendai iki tao, Gotenya isingi mate dokonya pupili doko, auu pipyali. Emba lenge lapota tapeta, ele panda ita tao katenge dokonya soo pyandamili doko, auu napipyali.

³⁰Embanya kingi tolae dokome, emba koo pyaale lao mapisetamo doko, kepanya nepape. Emba kingi mendai iki kateta, Gotenya isingi mate dokonya pupili doko, auu pipyali. Emba kingi lapota kateta, itate konjala naenge ele panda koo dokonya, pupili doko, auu napipyali.

³¹Jisasame dee mende lao pituu, “'Akali mendeme baanya enda doko yakinao pituu, enda yakinenge pepa doko pyao maipengena' lao, wamba nyakamanya yumbange dupa lamaiyamino doko, nyakamame siami.

³²Dopaka doko, nambame nyakama dapa langilyo: Enda mendeme kepo kolala naeyatamopa, akalingimi mee yakinatamopa, enda dokome akali waka mende nyetamo doko, akali wambatae doko mambele enda doko kepo kolata. Dee akali mendeme enda yukupae doko, nyetamo kandao doko, akali doko kepoaka kolatana” lea.

³³Jisasame dee mende lao pituu, “'Kamongo dokonya kenge doko latala, embame kiningi etete pituna lateno doko, kaeyala naeyao latenoli pipi' lao, wamba nyakamanya yumbange dupa lamaiyamino doko, nyakamame siami.

³⁴Dopaka doko, nambame nyakama dapa langilyo: Embame pii mende lao pituu, kiningi etete lelyona laa naeyape. Salapape! Kaiti doko Gotenya petenge toko dokona, embanya pii lateno dupa kyeto tasalanya, kaitinya kenge latala, pii mende kiningi etete lelyona laa naeyape.

³⁵Yuu dake Gotenya moko setenge panda dokona, embame pii lateno dupa kyeto tasalanya, yuu dakenya kenge latala, kiningi etete lelyona laa naeyape. Jerusalema doko Kiŋi Andake dokonya taono dokona, embame pii lateno dupa kyeto tasalanya, Jerusalema kenge latala, kiningi etete lelyona laa naeyape.

³⁶Embame iti pumbuti mende kapo jina laa naeyate. Dee kapo mende pumbuti jina laa naeyate. Dopana, embame pii lateno dupa kyeto tasalanya, langalu minatala, kiningi etete lelyona laa naeyape.

³⁷Dopana, embame pii mende ŋee lao pituu, ŋee iki lape. Daa lao pituu, daa iki lape. Pii kyeto tasalanya, waipa sinyoo leleno, dupa Sataneme waipa singina” lea.

³⁸Jisasame dee mende lao pituu, “'Akali mendeme embanya lenge lukutamopa, itingi lengeaka lukope. Nenge longatamopa, itingi nengeaka longape' lao, wamba nyakamanya yumbange dupa, lamaiyamino doko nyakamame siami.

³⁹Dopaka doko, nambame nyakama dapa langilyo: Endakali mendeme emba-kisa koo pitamo doko yanu nanyepe. Endakali mendeme embanya wakena tolae-kaita, kingi kapame pia kandeno doko, yangi-kaita apata pina maipi.

⁴⁰Dee endakali mendeme, embanya yonge pee isa pingi doko, nyotoo lao kote lea kandeno dokopa, yonge pee-kisa pingi doko apata baa maipi.

⁴¹Dee akali yanda singi mendeme, emba pyalanya petala, pinju soo tengesa umbisale katao mapa lea kandeno dokopa, londatili pao mapape.

⁴²Endakali mendeme oapi mende tee latamopa, maipi. Endakali mendeme yanu tee latamopa, maipiaka” lea.

⁴³Jisasame dee mende lao pituu, “'Embame embanya patali maki dupa auu kaeyape. Embanya yandapipi dupa imbu kaeyape' lao, wamba nyakamanya yumbange dupa lamaiyamino doko, nyakamame siami.

⁴⁴Dopaka doko, nambame nyakama dapa langilyo: Nyakamame nyakamanya yandapipi dupa auu kaeyao katao, nyakama koeyasilyamino dupa nisoo loma salapape.

⁴⁵Dopa pitamino dokome, nyakamanya Takange kaitinya katenge dokonya, wane joo katatami. Baame niki doko endakali koopi epepi, dupa pitaka-kisa tapina lenge. Baame aiyuu doko, endakali mana tolatae miningipi, mana koo miningipi, dupa pitakanya epena lenge.

⁴⁶Takisa nyingi akali dupame, endakali nyakama auu kaenge dupa, itingi auu kaengema. Dopaleaka joo, nyakamame endakali nyakama auu kaeyatamino dupa, iki auu kaeyatamino doko, dokonya aki yole mende nyetamipi?

⁴⁷Dee kamalya katenge endakali dupame, nyakamanya kaiminingi dupa pii epe lamaingima. Dopaleaka joo, nyakamame nyakamanya kaiminingi dupa, iki pii epe lamaitamino doko, mana aipale mendeme endakali kamalya katenge dupa, ita minatamipi?

⁴⁸Dopana, nyakamanya Takange kaitinya katenge dokome, endakali koopi, epepi dupa pitaka auu kaengena, nyakamame dopaka pyoo, auu kaeyao kalyepape” lea.