Matiu 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Jisasi'ma hakare vea kevuma nezmageno'a, mago agonare mrerine. Anante'ma umanige'za, amage'ma nentaza disaipol nagamo'za Agrite e'naze.

²Anante Agra agafa huno rempi hunezmino, amanahu ke hu'ne,

³Zamufama anterami'za avamupima manisaza vahe'mo'za, Anumzamofo asomura erigahaze. Na'ankure mona kumara zamagri kumare.

⁴Zamasu'zampi mani'ne'samokizmia, Anumzamo asomu huzmantegahie. Na'ankure Agra zamazeri fru hugahie.

⁵Akohe'za nemanimokizmia Anumzamo asomu huzmantegahie. Na'ankure maka mopa zamisige'za erigahaze.

⁶Fatgo avu'avaku zamaganeteno, tinku zamesiaza nehazamokizmia asomu huzmantegahie. Na'ankure Agra zamagrira knare huzmantegahie.

⁷Vaheku'ma zamasunku hunezmantamo'za, asomu erigahaze. Na'ankure Anumzamo'a asuntgi zamantegahie.

⁸Zamagu'amoma agru hu'nesamoza, Asomu erigahaze. Na'ankure zamagra Anumzana kegahaze.

⁹Ha'ma erifru nehazamo'za, asomu erigahaze. Na'ankure zamagrikura Anumzamofo mofavre hugahaze.

¹⁰Knare zamavuzmama nehnage'za hafra huzmantesamo'za, asomura erigahaze. Na'ankure mona kumamo'a zamagri'za segahie.

¹¹Vahe'mo'ma huhaviza huneganteno, knonkeve negamino, maka hankromofo nanekea havige huno hugofi neganteno, Nagriteku huno hugantesimoka, Asomu erigahane.

¹²Kaninkaha hutma muse hiho, na'ankure avamutami'amofo fenozana rama'a monafinka me'ne. Na'ankure korapara kasnampa vahera anahukna hu'za zamahe'naze.

¹³Tamagra ama'na mopare hage mani'naze. Hianagi ana hagemo'ma haga'ama omnesigeno'a, inanknahu huno hage'a ete erigahie? E'i mago knare'za hugara osiankino, atresnage'za vahe'mo'za zamagareti rehaviza hutregahaze.

¹⁴Tamagra ama mopamofo tvi mani'naze. Mago rankumamo agonare me'nesia rankumamo'a fra okigahie.

¹⁵Vahe'mo'za ramu tavi rekru hu'za baketifina nontaze. Tavi ante azotare hantintenageno remasa nompina nehie.

¹⁶Anahu kante tavika'a atregeno, vahe'mokizmirera remsa hanige'za, knare kavu kvara nege'za, monafi mani'nea Negfana ra agi amigahaze.

¹⁷Tamagra kasegene, kasnampa vahe ke eri atreku e'ne hutma Nagrikura osiho, Nagra kasege eri atrenaku ome'noanki, eri knare hunaku e'noe.

¹⁸Nagra tamagerafa hu'na neramasmue, monane mopane vga'oreno me'nena, mago onensa avoma kasegefi me'nea zamo'a vgaore me'nenkeno, hakare zamo'a efore hugahie.

¹⁹Hagi iza'o ana kasegefinti mago rufutagino, rumofo rempi humino, ana hiho hanuno'a, agra ositfa mona kumapina manigahie. Hianagi mago vahe'mo'ma Anumzamofo kasegema amage nenteno, rempi vahe huzmisuno'a, mona kumapina henka ra manigahie.

²⁰Na'ankure Nagra neramasmue, tamagri tamavutamavamo'ma fatgo huno kasegere ugagota hu'naza vahe'mofone, Farisi vahe'mokizmima, zamagatemaresiana, tamagra mona kumapina ovugahaze.

²¹Tamagra ko antahi'naze, tamagehe'ima zamasmi'naza kea, Kagra mago nera ahe ofrio, hagi iza'o vahe'ma ahe frisimo'a, keagare otigahie hu'ne.

²²Hianagi Nagra anage nehue, iza'o nefuma rimpa kna huntesimo'a, agra keagare otigahie. Aza'o mago nefuma huhaviza hunte'simofona, avare'za kansol kva vahete (Sanhedrin) vugahaze. Hagi iza'o neginagi ke nehie huno hanimofona, tusi'a tevefi avare tregahaze.

²³E'ina hu'negu, kagrama ofa ka'a erinka kre sramanavu itare'ma esunka, negafu'ma rimpa hegante neniazanku antahisunka,

²⁴ana kre sramnavu itare ofa ka'a atrenka ete vunka, kotazana ana negafu'ene ome kasunke hutenka, henka ofaka'a eme amio.

²⁵Hagi mago'mo naneke hugantenaku hanimofona karanka nevutna ame'ama hunka rimpa eri fru huo, aru kagrira kavreno ke refakohu vahete vanigeno, anante ke refakohu ne'mo'a kavreno kina kva ne'te vnigeno, hagi kagrira ksaga huno kina nompi katre'zanku, ana huo.

²⁶Tamage hu'na kagrira negasmue, kagra anampintira atioramitfa hugahane, hagi agima ahegantesiama'a mizase varesunka henka kina nompintira atiramigahane.

²⁷Tamagra antahi'naze amanagema hu'nea kea, tamagra ru vene, a' ene monko'zana osugahaze hu'ne.

²⁸Hianagi Nagra neramasmue, aza'o mago a' negeno kesane hanimo'a, hago ana a'ene monko'za agu'afina hu'ne.

²⁹Tamaga kavurgamo kazeri kumipi katre'na, eri tagitinka mate vuo, na'ankure ru maka kavufa tevefi (hell) vu'zankura, mago kvufamo fnane hani'ana, knare hugahie.

³⁰Kzantmaga'amo kumipi kavrentena, taga hunka matevu atro. Ru mika kavufamo tevefi vu'zankura, mago kavufa atresanana, e'i knare'za hugahie.

³¹Korapara anage huno avona krente'ne, iza'o a' ama huntenaku hanuno'a, a' atre avo kre amino hu'ne,

³²Ana hanigeno Nagra anage tmagrikura nehue, mago vahe'mo a' a'mo monko'za osu'nenigeno atre'siana, ana ne'mo'a ana ara huntesigeno monko'zana hugahie. Hanigeno iza'o, vemo'ma atre'esia a'ma erisia ne'mo, monko'za hugahie.

³³Mago'ene tamagra korapama, tamagehe'ima zamasmi'nea kea antahi'naze, huvempa kea ha'ontagigahane. Hianagi Ra Anumzantera huvempa hu'nana kea eri knare huo hu'ne.

³⁴Hianagi Nagra anage hu'na neramasmue, mona kumaku hunteta huvempa osiho, na'ankure Anumzamo nemnia tra'e,

³⁵mopa'mofonku hunteta huvempa osiho, na'ankure Agra agia nentea mope, hifi Jerusalegura osiho, na'ankure tusi'a kinimofo rankumare hu'ne. (Aisa 6:1-2)

³⁶Kagra kasenire huntenka huvempa osuo, na'ankure kagra mago kazokara eri efeke osuge, hanikera osugahane.

³⁷Hianagi kema hananana, izo hanunka, izo huo, i'oma hnunka i'o huo, mago'a amana kema agtereno hanuno'a, hankro'mofontegati eanke hugahie.

³⁸Tamagra anagema hu'nea kea antahi'naze, avu rupro hanimofona, agri enena avu rupro huo, ave rutafri simofona, agri enena ave rutafrio hu'ne.

³⁹Hianagi mago'ene anage hu'na neramasmue, haviza huramante simofona, azeri arava hiho, hianagi iza'o tmaga kaziga kameragente'ma kahena, rukrehe hugeno, mago kaziga kameragente kaheno.

⁴⁰Mago'mo sioti ka'agu namio hanigenka, anakre kuka'ane amio.

⁴¹Iza'o kagri'ma tutu huno fenoni'a erinka, mago kilo mita vuo hanigenka, eriagaterenka tare kilo mita vuo.

⁴²Mago zanku kantahige simofona amne amio, erite'na kamisue huno kantahigena i'o osuo.

⁴³Tamagra antahi'nageno korapa anage hu'naze, kagri tva'onte mni'nemofona kavesintetfa nehunka, ha' vahe ka'a hinko hunto hu'ne.

⁴⁴Hianagi Nagra anage hu'na neramasmue, ha' vahetmia zamesizmantetfa nehuta, tamahesia vahera nunamu huzmanteho.

⁴⁵E'inama hanuta monafi nemnia Nfatimofo mofavre manigahaze. Agra zgegu higeno, zgea knare vahete ene, havi vahetera neregeno, fatgo vahete'ene, fatgo osu vahete enena kora atregeno nerie.

⁴⁶Na'ankure kavesima antenia vahe'ma, kavesi zamantenunka na'a mizama'a erigahane? Tagra antahi'none, takesi zgoma eri vahe'mo'za anahu knara nehaze.

⁴⁷Tamagrama nermafunke'za zamazeri so'e hanazana, na'a mago'a zana hugahaze? Megi'a vahe'mo'za zamagranena anahu kna nehaze.

⁴⁸E'ina hu'negu tamagra monafi neramafama fatgo huno agru hu'nea kna hutma fatgo hutma agru hiho huno zamasmi'ne.