Matio 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Jesu n den laa ku niligu, o den doni li juali po. Wan den kali, o hoadikaaba den nagini o kani.

²O den yaadi ki bangi ba ki yedi:

³Li pamanli ye leni yaaba n pia li yumiinli kelima tanpoli diema tie bi yaama.

⁴Li pamanli ye leni yaaba ya pala n biidi, kelima bi baa baagi ba.

⁵Li pamanli ye leni yaaba n pia li padingili, kelima bi baa diedi ki tinga.

⁶Li pamanli ye leni mi teginma koma leni mi inuulu n pia yaaba, kelima bi baa guo.

⁷Li pamanli ye leni yaaba n gba mi nihima, kelima bi baa gbadi bipo mi nihima.

⁸Li pamanli ye leni bi papiendanba, kelima bi baa la U Tienu.

⁹Li pamanli ye leni yaaba n kpendi nni mi yanduanma, kelima bi baa yini ba U Tienu bila.

¹⁰Li pamanli ye leni ban wangi yaaba fala kelima mi teginma po, kelima tanpoli diema tie bi yaame.

¹¹Li pamanli ye leni yi bi niba ya sugidi yi ki wangi yi falabiado, ki maadi yipo mi mabiadima kelima mini yaa po.

¹²Yin mangi mani yi pala ki yaa ye leni li pamancianli kelima yi panpaani baa yaba tanpoli po. Bi niba den wangi bi sawalipuaba falabiado yeni, bani yaaba nden ye ke yi daa ye.

¹³Yinba n tie mi yaama handuna po. Mi yaama ya ti luo mi manu, bi baa taa be ki go hanbi ma? Maa go pia fuoma, kali ban lu ma niinnpo bi niba hmaa ma.

¹⁴Yinba n tie handuna yenma. Ya dogu n ye li juali yuli po kan fidi ki wuoni.

¹⁵Bi kan gi cuoni ki fidisanga mo ki taa li sanciali ki hoagini ga, ama bi baa tuani ga u fidisantuankaanu, kan yendi yaaba n kua li dieli nni kuli po.

¹⁶Yeni yin cedi mani yi yenma n yendi yeni bi niba kani ke ban la yi tuongama ki kpiagi yi Baa yua n ye tanpoli po.

¹⁷Yin da daani ke n cua ki baa bolini li balimaama leni bi sawalipuaba maama ka. Mii cua ki baa bolini ma, ama n cua ki baa tieni ma.

¹⁸Kelima n waani yi i moamoani, hali tanpoli leni ki tinga daa pendi, baa yaa dianu n wa ki cie kan a li balimaama nni hali likuli n baa tieni ki dudi.

¹⁹Yua n miidi li balimaama nni baa yaama n wa ki cie siiga mayenma, ki go bangi ban ya tiendi yeni, o baa tua yua n wa ki cie tanpoli diema nni. Yua mo n tiendi man bili yaala ki go bangi ma, o baa tua niciamo tanpoli diema nni.

²⁰Kelima n yedi yi, yi teginma yaa cie li balimaama bangikaaba leni Falisieninba, yi kan kua tanpoli diema nni.

²¹Yi gbadi ke bi den yedi bi nikpiaba: Han da kpa o nilo, yua n kpa o nilo, bi baa bu ki cuo o.

²²Ama mini n yedi yi, yua n bieni o pali o lielo po kuli, li pundi ban bu leni. Yua n yedi o lielo: O yanpiidaano ne, li pundi ke yi cancannikpeliba taancianli n cuo o. Yua n yedi o lielo: O yanluodaano ne, li pundi ban cuo o ki kuani o ku fantanbuogu nni.

²³Lanwani a ya cua li padibinbinli kani, ki baa pa a paabu, ki tiadi li kani ke o lieli pia leni a ku madiagu,

²⁴han cedi a paabu likani ki kpa gedi ki ban mangi leni a lielo yeni, ki yuandi ki pa U Tienu a paabu.

²⁵A koaginkoa ya cuo ha ki caani a li bujiali kani, han mangi leni o tonma hali ki daa pundi, ke wan da ti teni o bujialo n cuo ha ki teni a sandalima, wan kuani a li kadidieli nni.

²⁶N waani ai moamoani, a kan a lienni kali a pani kaa ki gbeni kaa sieni liba.

²⁷Yi den gbadi ke bi yedi: Han da conbi.

²⁸Ama mini n yedi yi ke yua n nuali pua ke o yama kua o niinni, o conbi leni o o pali nni no.

²⁹A jienunbu ya tie apo tingbali bonla, han logidi bu ki lu foagima, kelima a gbannanbuoyendu ya bodi, li baa hani apo ki cie ban lu a gbannandi kuli ku fantanbuogu nni.

³⁰A jienu ya tie apo tingbali bonla, han jia u ki lu foagima, kelima a gbananabuoyendu ya bodi, li baa hani apo ki cie ban lu a gbannandi kuli ku fantanbuogu nni.

³¹Bi go den yedi: Yua n ani o pua, wan teni o li poatili.

³²Ama mini n yedi yi yua n ani o pua ke laa tie mi conconma po, o teni ke laa pua tua poconconli. Yua n taa poakoa mo, o conbi.

³³Yi den gbadi ke bi waani bi nikpiaba: Han da poli ki niani ki naa tieni. Ama han poli ki niani o Diedo ke a baa tieni yaala, han tieni la.

³⁴Ama mini n yedi yi: Yin da poli baa leni tanpoli kelima li tie U Tienu balikalikaanu.

³⁵Baa leni ki tinga kelima ki tie o taahmaakaanu, baa leni Jelusalema kelima li tie o badiciamo dogu.

³⁶Han da poli leni a yuli, kelima a kan fidi ki teni baa yuyengu n pendi, yaaka kun boandi.

³⁷Yi ya yedi: Mm, lan ya tie mm. Yi ya yedi: A-a mo, lan ya tie a-a. Kelima yaala n pugidi kuli ji ani o Biado kane.

³⁸Yi den gbadi ke bi yedi: Nunbu n pa nunbu panli, inli mo n pa inli panli.

³⁹Ama mini n yedi yi, yin da yie o nibiado po, nilo ya pabi a jienkpianu po, han pegidi ki teni o a ganu mo.

⁴⁰Nilo ya bua ki yini a ti buudi ki ga a liadibiga, han teni o a liadicianga mo.

⁴¹O nilo ya tieni au paalu ke han ciani o kilo dajenyenli, han ciani o dajena lie.

⁴²Pa yua n mia ha, da buli anunga yua n bua ha ledi o po.

⁴³Yi den gbadi ke bi yedi: Han bua a nisaalilielo ki nani a yibali.

⁴⁴Ama mini n yedi yi: Yaa bua mani yi yibalinba, ki ya jaandi yaaba n wangi yi fala po.

⁴⁵Yeni yi baa tie yi Baa yua n ye tanpoli bila. Kelima o yen teni ke ki yenga pudi bi nibiadiba leni bi niteginkaaba kuli po, ki yen teni ke ki taaga mii bi niteginkaaba leni yaaba n ki tiegi kuli po.

⁴⁶Li ya tie ke yi bua yaaba n bua yi bebe, yi baa baa bee panpaani yo? Bi lubigaaba wani ki tiendi yeni ka yoo?

⁴⁷Yi ya fuondi yi kpiiba bebe, yi tieni be ke li pia mi paadima? Baa bi nilanba wani ki tiendi yeni ka yoo?

⁴⁸Yin gagidi ki ya hani nani yi Baa yua n ye tanpoli n gagidi ki hani maama.