MƐBORIMƐ WÉÌTÌ 7:17-29

¹⁷A bɑ́ɑ́ yóu kɛ̀ kuyonku dɑ́ tiekɛ ɑ mɛ mbɑ́ yóu kɛ̀ tiyɛìntì dɑ́ tiekɛ ɑ yɑ̀ɑ̀ bo tootɛ.

¹⁸Dɛ̀ wennimu kɛ dò nhɑ ndɛ̀ pĩ, ɑ bɑ́ɑ́ dɛ̀ yɛ̃̀. Wèè dé Kuyie nwè í yóó pɑ́kɛ́.

¹⁹Mɛciì nhɔ̃ɔ̃ kpénkùnnɛmu mɛ yiɛ̀ nkɛ̀ dɛ̀ɛ pɛ̃ɛ̃tɛ́ kùmɑ̀ndɑ́ɑ̀bɛ̀ bo mbomɛ̀ tɛpíítɛ̀ dihɛì dìmɑ́ɑ̀ miɛkɛ.

²⁰Onìtì mɔù í bo kɛtenkɛ̀ ĩ́nkɛ̀ wèè wenni kɛ sɑ̀nnɛ̀ kɛ dò nwenwe bɑ́ɑ́ dɔɔ̀ mɛyɛi. Kɛ bo ndɔɔri mɛsɑ̀ɑ̀ mmɑ́ɑ̀.

²¹Bɑ́ nkenti bɛnìtìbɛ̀ nɑ̀ɑ́ ntì timɔu kɛ̀ dɛ̀ɛ yie nkɑ̀ɑ bɑ́ɑ́ keè ɑ kóo tɔ̃ntì dɑ sɑ̃́ɑ̃́mmɛ̀.

²²A yɛ̃́mu kɛ dò nhɑ ɔ̃ nsɑ̃́ɑ̃́ mbɛtɔbɛ̀ yɛmɔ̀rɛ̀ mɑyɛ̀.

²³N dɛ̀ wèńnímu dɛmɔu m bennɛ́mu nɛ̀ n ciì mmiɛkɛ kɛ bo ntú onìtì wèè ciì, kɛ yĩɛ̃kɛ.

²⁴Dɛ̀ɛ̀ kó dimɑ̀ɑ̀ bo dɛ̀ cùtɛ́ cúrícúrí nwe we mbo nɑ kɛ́ dɛ̀ nìntɛ?

²⁵Mɛm̀mɛ kɛ̀ n duɔ́ m mɑ́ɑ̀ kɛ́wɑmmú kɛ́fiɛ́ nɛ̀ n yɛ̀mmɛ̀ mɛmɔu kɛ bo yĩ́ɛ̃́tɛ́ mùù tu mɛciì nɛ̀ mùù te kɛ̀ mɛborimɛ dò mmɛ̀ mɛ̀ ndòmmɛ̀, kɛ́nsɔ̃́ nkɑ̀ɑ yóù yoo ɑ yɛi, dɛ̀ í mɔkɛ mucɔ̃́ntimu mɑmù.

²⁶N yɑ̀ onitipòkù mɔù nwe kòò tu didíiǹtɑ̃́rì kɛ tii kɛ pɛ̃ɛ̃tɛ́ mukṹṹ, ò tu timɑ́tì dindííntì nti, kòò bɑɑ̀ ntu ticùɔ̀tì. Wèè dɔ̀ɔ̀ri Kuyie ndɔ́mɛ̀ weè bo nɑ kóò yentɛ́nɛ̀, kuyɛìnkù kuu bɑ́ɑ́ nɑ kóò yentɛ́nɛ̀.

²⁷Kɛ̀ Mɛborimɛ wéìtìi bɛ́i nkɛ dɔ̀: N wɑɑ̀mmu kɛ wéí dɛnɛnnɛ̀ dɛmɑ dɛmɑ kɛ toti n yɛ̀mmɛ̀ kɛ bo dɛ̀ bɑntɛ́.

²⁸Kɛ kpɑɑ́ wɑɑ̀, bɑ́ n yí dɛ̀ yɑ̀u. N wɑnti dɛ̀ bɛnitidɑɑbɛ̀ tɛkɔupíítɛ̀ (1000) miɛkɛ, onìtì òmɑ́ɑ̀ borɛ̀ ndɛ ndɛ̀ yɑ̀mɛ̀. Bɛnitipòbɛ̀ bɛmɔu miɛkɛ n yí dɛ̀ yɑ̀ òmɔù borɛ̀.

²⁹N yɑ̀ kɛ sɔ̃́ nKuyie ndɔ̀ɔ̀ onìtì kòo ntú osɑ̀ɑ̀wè nwe, onìtì weè nɛ́ te dɛmɔu kɛ̀ dɛ̀ yonkɛ.