MƐBORIMƐ WÉÌTÌ 4:1-10

¹N yɑ̀mu bɛnìtìbɛ̀ fɛ̃́ũnko mɛ̀ɛ̀ botí bɛtɔbɛ̀ kɛtenkɛ̀ ĩ́nkɛ̀. Wéntɛ́ bɛ̀ bɛ̀ fɛ̃́ũnkomɛ̀ kɛ̀ bɛ̀ kuɔ̀ mbɑ́ òmɔù í bɛ̀ bɑ̀ɑ́. Bɛ̀ɛ̀ bɛ̀ nɔ mbɛɛ̀ bɛ̀ fɛ̃́ũnko òmɔù mɛ nyí bɛ̀ bɑ̀ɑ́.

²Kɛ̀ nní nsɔ̃́ mbɛcíríbɛ̀ bɛ̀ɛ̀ ku nɛ̀ dimɔ̀nnì bɛ kpɛrɛ wenninɛ̀ bɛfòùbɛ̀.

³Wèè nɛ́ dɔkɛ bo diwɛ̀ì miɛkɛ kɛ bɛ̀ pɛ̃ɛ̃tɛ́ bɛdɛ́ weè tu bɛ̀ mu nyí pɛitɛ́ wè, wèè mu nyí buotɛ́ kutenkù miɛkɛ, kɛ yɛ̃́ ò í yɑ̀mɛ̀ mɛyɛi mmɛ̀ɛ̀ dɔɔri kɛtenkɛ̀ ĩ́nkɛ̀.

⁴Kɛ̀ n wéntɛ́ kɛ́ n sɔ̃́ mmutɔ̃mmú mumɔu onìtì pĩ mmù kɛ̀ mù yìé, ò ɔ̃ mmù pĩ nkɛ betínɛ̀ bɛtɔbɛ̀ mbɛ. Dɛndɛ í dò nkɛ́bɑntɛ́, dɛ̀ í cɑ̃́ɑ̃́nnɛ̀ ɑ bo ndɔ́mɛ̀ kɛ́kpɑɑkɛ kuyɑɑkù.

⁵Kuyɛìnkù ɔ̃ mmɛí ku nɔu nsi, kɛ nɛ́ kɔ̀ù kumɑ́ɑ̀.

⁶A bo mmɔkɛmɛ̀ dɛ̀mɑrɛ̀ dinɑcɛkutiri mɛ̀mɑ́ɑ̀ kɛ ompu dɛ̀ tɔ̃ũnɛ̀ ɑ bo ndɛ̀ mɔ̀kɛmɛ̀ dinɑcɛkutiri mɛ̀dɛ́mɛ̀ kɛ nɛ́ ɔu mɛdiɛ̀, dɛndɛ ɑ bɛtì kuyɑɑkù nku.

⁷N wɛ̃̀tɛ kɛ yɑ̀mu mɛborimɛ tɛ̃mɛ̀ kɛtenkɛ̀ ĩ́nkɛ̀ mɛɛ̀ í dò nkɛ́bɑntɛ́. Mɛ̀ɛ̀ tu:

⁸Onìtì wèè bo omɑ́ɑ̀ kɛ í mɔkɛ odɛríntɔù, ò mɛ nyí mɔkɛ dɛbirɛ, kɛ́ í mɔkɛ o tebitɛ. Bɑ́ o tɔ̃mmú í mɔkɛ kumɑ̀nku, ò nɛ́ pĩ́ mbɑ nkpɛ́í mmutɔ̃mmú kɛ pɑ̀ɑ̀ diwɛ̀ì? Dɛndɛ yóùmu, dɛ̀ í dò nkɛ́bɑntɛ́.

⁹Kɛ̀ di bo bɛ̀dɛ́bɛ̀ dɛ̀ wenninɛ̀mu ɑ bo mbomɛ̀ ɑmɑ́ɑ̀, kɛ yɛ̃́ bɛ̀dɛ́bɛ̀ kó mutɔ̃mmú ɔ̃ɔ̃ yiemmɛ̀mu mɛsɑ̀ɑ̀.

¹⁰Bɛ̀ɛ̀ bo bɛ̀dɛ́bɛ̀, kòò mɔù do, otɔù yóó ò íimmu. Wèè bo omɑ́ɑ̀ kòò do, we mbo ò íi?