Luke 17:1-5

¹Jedus tell e ciple dem say, “Fa true, ting gwine happen wa mek people do bad. Bot de poson wa mek dem ting happen gwine hab plenty trouble!

²E mo betta fa dat poson ef dey tie a big grine stone roun e neck an chunk um eenta de sea. E mo betta ef e drown een de wata like dat den ef e mek one ob dem leetle one do bad.

³So den, tek cyah wa ya do! “Ef one ob oona hab a broda wa da sin, ya mus buke um. Ef e change e sinful way, mus paadon um.

⁴Eben ef e do ya bad seben time een one day, ef e ton back ebry time, come tell ya say, ‘A saary an A ain gwine do ya bad no mo,’ mus paadon um.”

⁵Jedus postle dem tell um say, “Lawd, hep we bleebe God mo den we bleebe now.”