Luk 17:1-5

¹Afta na Jisas bin tok langa ola wekinmen blanga im, “Sambala pipul garra temtimbat yumob blanga meigim yumob go langa det nogudbalawei. Bat God garra panishim brabliwei ol detlot pipul hu temtimbat enibodi.

²Mobeda detkain pipul garra taiyimap miselp garram bigbala ston langa im nek en tjakam miselp langa det solwoda en kilim miselp bifo im meigim enibodi bulurrum det nogudbalawei.

³En yumob garra meiksho yumob nomo meigim enibodi go langa det nogudbalawei du. “Yumob irrim mi na. If yumob braja dum nogudbala ting langa yumob, wal yumob garra tok langa im, en if im sori blanga det ting, wal yumob garra larramgo im fri brom det nogudbala ting weya imbin dum langa yumob.

⁴Nomeda maitbi im dum nogudbala ting langa yumob 7 taim langa wan dei, en ebritaim im kaman langa yumob en im tok, ‘Mi sori blanga det ting weya aibin dum langa yumob.’ Bat stil yumob garra larramgo im fri.” Lagijat na Jisas bin tok.

⁵Wal detlot speshalwan mishanri blanga Jisas bin dalim im, “Bos, melabat wikwan, en yu garra album melabat bilib langa God brabliwei.”