Lucas 17:1-5

¹Ginsabihan ni Jesus an iya mga disipulos, “Sigurado gayod na maabot an mga tintasyon pero grabe man an kastigo para sadtoʼn magadara sani!

²Mas maayo pa sa iya na bitayan sin gilingan na bato sa liog kag ipilak sa dagat ki sa madara pa niya paghimo sin kasal-an an mga katawuhan na may pagtuod.

³Kaya paghimat kamo! “Kun magkasala an imo kapwa, sawaya siya kag kun magbasol patawada.

⁴Kun nagkasala siya sa imo sin pito na beses sa usad ka adlaw tapos magbalik sa imo kag magsabi, ‘Nagabasol ako,’ dapat patawadon mo siya.”

⁵Naghangyo an mga apostoles sa Ginoo, “Dagdagi man po an amon pagtuod.”