Luka 2:20-46

²⁰Thaj irisajle e čobanura thaj slavisade thaj hvalisade e Devle za sa so šunde thaj dikhlje, golese so pherdile sa e lafura sar so sasa lenđe phendo.

²¹Thaj ohtoto đive sar bijandilo o čhavoro avilo o vreme te čeren le suneti, thaj dijele alav Isus, sar so vačarda o meleko angleder so i Marija ačhili khamni.

²²Thaj kana avilo o đive o Josip thaj i Marija te đan palo adeti e thodimaso–e Marijako, palo zakono e Mojsijaso, ande e čhavore ano Jerusalim ano Hram te preden le e Rajose

²³(sar so si pisimo ano zakon e Rajoso kaj: “Svako čhavo murš savo putrol e dejako por te posvetilpe e Rajose”)

²⁴thaj te anen kurbano (sar e Rajoso zakono penol, “duj grlice il duj terne golubura”).

²⁵Thaj dik, sasa ano Jerusalim manuš kaso alav sasa Simeon, thaj gova manuš sasa pravedno, thaj pobožno, savo ađučarda o Mesija te ikalol o Izrael taro ropstvo thaj o Dux Sveti sasa pe leste.

²⁶Thaj o Dux Sveti sikada lese but angleder kaj ni ka merol sa đi kaj ni dičhol e Hristo e Rajoso.

²⁷Thaj o Duxo vačarda lese te đal ano Hram. O Josif thaj i Marija ande e čhave e Isuse ano Hram te čeren okova so si palo adeti ane Mojsijaso zakono,

²⁸a o Simeon dikhlja e Isuse thaj lija le ke pire vasta, thaj hvalisada e Devle thaj phenda:

²⁹“Akana muk ano mir man će sluga, Rajo, palo okova sar so phendan.

³⁰Golese so me jakha dikhlje o spasipe ćiro

³¹savo čerdan angle sa e manuša.

³²Vov si svetlo savo ka avol pe manuša save ni đanen e Devle, thaj vov ka avol ki slava pire manušenđe e Izraelese.”

³³Thaj e Isusesi dej thaj leso dad sesa čudime so vačarda o Simeon taro Isus.

³⁴Thaj blagoslovisada len o Simeon, thaj vačarda e Marijaće lese daće: “Dik, o Dol odredisada kale čhavore te peravol buten Izraelcuren thaj te vazdol. Vov si odredimo te avol e Devleso znako, al but đene ka odbacin le.

³⁵Thaj gija ka sikadol so garandoj den an pe gođa. A tut i bari čhurik ka pusavol ano ođi.

³⁶Thaj sasa i Ana e Devlesi proročica, čhej e Fanuilosi, tari kuštik e Asireso. Voj sasa but phuri, efta berš sasa pe romesa thaj lako rom mulo,

³⁷thaj pale gova sasa udovica ohtovardeš thaj štar berš, savi ni đala taro Hram, kandija e Devlese i rat thaj o đive, thaj postisada thaj molisada.

³⁸Thaj ane gova časo avili, hvalisada e Devle thaj vačarda taro čhavoro savorenđe save ađučarde o Dol te ikalol o Jerusalim.

³⁹Thaj o Josip em i Marija kana čerde sa palo zakono e Devleso, irisajle ani Galileja ane po foro o Nazaret.

⁴⁰A o čhavo barilo thaj zurajlo, thaj pherdilo butđanglipe, thaj o šukaripe e Devleso sasa ane leste.

⁴¹E Isuseso dad thaj lesi dej đele svako berš ano Jerusalim ko baro đive ki Pasha.

⁴²Thaj kana sasa e Isuse dešuduj berš, i vov đelo palo adeti te svetkujil lencar o baro đive i Pasha ano Jerusalim.

⁴³Thaj kana nakhle gola đivesa von irisajle čhere. O čhavoro o Isus ačhilo ano Jerusalim, a gova ni đanglje lesi dej thaj leso dad.

⁴⁴Dije gođi kaj si i vov lencar maškare avera manuša save putujisade lencar. Đele jekh đive phirindoj thaj lije te roden le ki familija thaj ke pire pinđarutne manuša.

⁴⁵Thaj kana ni arakhlje le irisajle ano Jerusalim te roden le.

⁴⁶O trito đive arakhlje le ano Hram sar bešol maškare učitelja, thaj šunol len, thaj pučol len.