Luk 2:20-46

²⁰Welipkögetmö, yuai pakpak Suep garatanöŋ jiyöhaŋgö dop asuhuyöhi, mi lama galöm yeŋön eka möta miaŋgöra Anutugö sösöŋgai liŋet köla möpöseiget. Möpöseiba mosöta liliŋgöba anget. Mewö.

²¹Jisös ahui Sonda mohot miaŋgö dop teköiga Anutugö aiwesökŋi sileŋe yandibingö nalöŋi kaiga qetŋi Jisös qetket. Suep garatanöŋ qet mi mutuk qeta waŋgiigun nalö miaŋgöreŋök namŋaŋgö gölöm uruŋe ahuyök. Mewö.

²²Mosesgö Köna keunöŋ keu kewö ahöza, “Ambinöŋ morö nahönŋi mutukŋi memba silim 40 koumŋe mali teköiga sörö guluŋi köl könjörat waŋgiba iŋini mönö jöwöwöl jikenöŋ öŋgöba morö mi Anutugö jeŋe algetka yaŋgö buŋaya akŋa.” Miaŋgöra nalö mi kam kuŋguiga Josef Maria yetkön keu mi tem köla Jisös waŋgita Kembugö buŋaya akŋapköra Jerusalem öŋgöyohot.

²³Kembugö Köna keunöŋ keu kewö ohoget ahöza, “Morö nahön pakpak sep mutuk mokozei, mi mönö Kembugö buŋaya akŋapköra qem teköba mem sarahime.” Yetkön keu mi wuataŋgöyohot.

²⁴Mewöyök Kembugö Köna keunöŋ jimkutukutu keu ahözawaŋgö dop kembö me kembö supsup nei yahöt mi jöwöwöl ohomahotköra Jerusalem sitinöŋ öŋgöba anohot.

²⁵Nalö miaŋgöreŋ azi kun qetŋi Simeon Jerusalem malök. Yaŋön uruŋi jömuk Anutugöreŋ qekötahöba urumeleŋgö kölguliguli aiga Uŋa Töröŋan yambuk kiniga Amötqeqe Toŋan Israel uruŋe asuhumapköra mamböta malök.

²⁶Mamböta maliga Uŋa Töröŋan keu kewö indeli mörök, “Gi Kembugö Amötqeqe Toŋi Kraist ahui mutuk ekagun kömupkö sihimbölöŋi mötman.”

²⁷Iwinamŋan Mosesgö Köna keu wuataŋgöba Jisös waŋgita jöwöwöl jikenöŋ öŋgöyohot. Öŋgöyohotka Uŋa Töröŋan Simeon sölölöhöi nalö miaŋgöreŋök mewöyök jikenöŋ öŋgöyök.

²⁸Öŋgöba morö mi eka memba dohongöba Anutu möpöseiba kewö jiyök,

²⁹“O Kembu, merak welen azigan ölöp anda uruluainöŋ mala kömuma.

³⁰Göhö keugahö dop Amötqeqe Toŋi melainöŋ asuhuiga i nani jenan eka simbawoŋ mötzal. Miaŋgöra ölöp anda kömumam.

³¹Göŋön amötqeqegö könaŋi mözözömgöba kantri pakpak yeŋgöra indel eŋginöŋga mi eka möt kutume.

³²Göŋön Amötqeqe Toŋaŋgö asakŋi indelnöŋga kian kantri yeŋgö uruŋini kuŋguiga asarime aka qetbuŋagan nangi könagesögi Israel neŋgö sutnine mewöyök qarima.”

³³Simeonöŋ morögöra keu mewö jiiga iwinamŋan möta köŋkuŋ aka welipköyohot.

³⁴Welipköyohotka kötuetköm eŋgiba namŋi Maria kewö jii mörök, “Mötnöŋ, Anutunöŋ morö ki kuŋguba ali Israel ambazip sehisehiŋan i andö qeba eta eŋgugetka gwötpukŋan uruŋini meleŋda ölöwakŋe. Anutunöŋ nanŋak i ali aiwesök aiga gwötpukŋan i tuaköpek jim waŋgime.

³⁵Tuaköpek jim waŋgigetka urumötmötŋini asa-asambötŋan mewö aukŋe asuhuma. Nangi urugan mewöyök wösöbirik aiga miaŋön sou zuluk alalŋi ewö urugi kuŋguba qesiŋma.” Mewö.

³⁶Jerusalem miaŋgöreŋ kezapqetok ambi namŋi kun qetŋi Ana malök. Yaŋgö isikŋi qetŋi Aser, iwiŋi qetŋi Fanuel. Ambi miaŋön seramŋe azi memba mali yambu (yara) 7 mohotŋe malohot.

³⁷Malohotka apŋi kömui malö aka mala kori nalö miaŋgöreŋ yambuŋi 84 ahök. Yaŋön nalö dop jöwöwöl jikenöŋ öŋgöba mi silim kun qahö mosörökmö, suŋgem asak Anutugöra nene siŋgi mala köuluköba waikŋi memba möpöseiba malök.

³⁸Yaŋön nalö miaŋgöreŋök kaŋgota morö mi eka Anutu möpöseiyök. Anutunöŋ Jerusalem ambazip sohopŋini memapköra mamböta malgeri, körek yeŋgöra morö miaŋgö könaŋi jim asarii mötket. Mewö.

³⁹Josef Maria yetkön Kembunöŋ areŋi jim kutuiga Köna keunöŋ ahözawi, mi körek ahot teköiga Galili prowinsnöŋ liliŋgöba taonŋiri Nazaret miaŋgöreŋ anohot.

⁴⁰Morönöŋ qariba wahöta köhöiba mötkutukutuŋi ahuba kokolak qeiga Anutugö kalem möriamŋan qakŋe öŋgöi kinök.

⁴¹Jisös iwinamŋan yambu (yara) dop ak-kömukömu kendon nalöŋe Jerusalem siti öŋgöba anjahotma.

⁴²Mewö mala Jisös yambu (yara)ŋi 12 aiga silikŋini ahakzeaŋgö dop nalöŋi kam kuŋguiga mewöyök öŋgöba anget.

⁴³Anda mala kendon nalö miaŋön teköiga liliŋgöba miriŋire anohot. Anohotmö, morö gwabö Jisösnöŋ Jerusalem tari iwinamŋan mi qahö möt kutuyohot.

⁴⁴“Yaŋön ambazip kambu yembuk anja,” jiba silim mohotkö dop köna anda sepkitip aka alaurupŋiri yeŋgö uruŋine qeta jaruyohot.

⁴⁵Qeta jaruyohotmö, qahö miwikŋaiba kunbuk liliŋgöba Jerusalem anda jaruyohot.

⁴⁶Jaruba malohotka silim karöbut teköiga jöwöwöl jikenöŋ öŋgöba miaŋgöreŋ miwikŋaiyohot. Miwikŋaiyohotka azi ketaŋi yeŋgö sutŋine tarök. Tari kusum waŋgigeri, mi möta qesim eŋgiba tarök.