Luku 2:20-46

²⁰Hagi sipsipi kva vahe'mo'za rukrahe hu'za nevu'za, ankero vahe'mo'za hu'naza kemofo nena'a maka fore hige'za, nege'za nentahiza hu'naza zanku, Anumzamofo muse hunente'za, Agi'a erisaga hume vu'naze.

²¹8 knazupa avufa tga nehu'za, agi'a Jisasi'e hu'za antemi'naze. Ana agi'a ankeromo nerera rimpafima fore osu'negeno Jisasi'e hunka agi'a antegahane hu'nea kante ante'za agi'a ante ami'naze.

²²Hagi zmazeri agruhu knama vagaregeno, Mose kasegemo'ma hu'nea kante ante'ne Josefe ene Mariakea Jisasina avare'ne Jerusale kumate ra mono nompi vu'na'e.

²³Ramofo kasegefi krente'neana, Maka ese ne'mofavrema kasentesiana ramofo ami'nigeno, ruotge mofavre manigahie hu'ne. (Ekso-Uti 13:2)

²⁴Ramofo kasegefi huno, kre srmanama huntesazana, Tare maho namanuro, tare kasefa namanu kre sramana vugahaze hu'nea kante ante'ne ome ana hu'na'e. (Lev-Pri 12:8)

²⁵Hagi mago nera Jerusale kumate mani'nea ne' agi'a Simioni'e. Ana nera fatgo nekino, kazigazi huno Anumzamofo amage nevuno, Israeli vahe'mokizmi zamahoke ahesnia vahe fore hanigu avega anteno mani'negeno, Ruotge Avamumo'a agripina avite'ne.

²⁶Ruotge Avamumo korapa averi huno, ofri mani'nenka, Ra Anumzamo taza hania ne' Kraisina huntena fore hinkenka ketenka frigahne, huno asami'negeno antahino mani'ne.

²⁷Ana higeno Simionina Ruotage Avamumo azeri otigeno, ra mono nompi marerino umani'negeno, Jisasi nerera ene nefakea avare'ne kasegemoma hu'neaza huke e'na'e.

²⁸Simioni ana mofavre nevareno, Anumzamofo ra agi erisaga nehuno amanage huno hu'ne.

²⁹Ramoka kazokzo eri'za vaheka'amona, huvempa kema hunante'nanazana hago fore hige'na koe. Hagi natrege'na kema hunana kante ante'na narimpa frune fri'neno.

³⁰Na'ankure tahokeno taza hanimofona, nagra navunu koe,

³¹Kagra korapa retro hunte'namo maka vahe zamufi efore hie.

³²Agra masagino maka megi'a vahetera remsa hunezmantena, Israeli vahe kamofona ra agi amigahie.

³³Ana mofavremofo nerera ene nefakea ana kema huntea kegu tusiza hu'ne, antri nehune znagesa antahi'na'e.

³⁴Ana huteno, Simioni'a asomu ke hunezmanteno, anage huno Mariana asami'ne, antahi so'e huo. Ama mofavre kamo'a rama'a Israeli vahe'mofo zmazeri traka nehuno, mago'a nagara zmazeri onetino, mago avame'zakna huno mani'nena, rama'a vahe'mo'za zamefi humigahaze.

³⁵Ana hina tamage maka vahe'mofo oku'a antahintahimofona eri ama nehina, kagri'enena asne kazimo tumoka'a reaza hugahie.

³⁶Hagi anampina anahu kna huno kasnampa ara agi'a Ana'e, Fanuel mofakino, Asa nagapintire. Ana a'mo ve erino neve'ene 7ni'a kafuzage maninegeno, neve frigetegeno, tavava teno mani'ne.

³⁷Ana a'mo kentoza huno maninegeno kafuzage'amo'a 84'a hu'negeno mono nona notreno, monora Anumzamofona hunenteno, neza a'o huno nunamuna kenage'ene feru enena nehuno manine.

³⁸Anama nehigeno anante ana 'a eno, Anumzamofo susu hunenteno, Jerusale vahe'mota taza hunka tavaresanegu kavega antenona ne' fore hane, huno ana mofavregu hune.

³⁹Hagi Josefe ene Mariakea Ramofo kasegemo'ma hu'neazana ana mika huteke, ete Galili mopare vu'za, Nazarete kumazinire umani'naze.

⁴⁰Ana hu'ne umaninakeno, Mofavre'zinimo nena huno hanave netino, knare antahintahifi avitegeno, Anumzamofo asunkuzamo'a Agrane me'ne.

⁴¹Maka kafuma ne-egeno'a Jisasi nerera ene nefakea, Anumzamo Israeli vahe kinafinti ozmaheno zmagaterenea kna (Pasova) fore'ma nehigekea, Jerusalemi vutere hu'na'e.

⁴²Hagi Jisasi'a 12fu'a kafuzage higeno, koma neha'aza hu'ne ra knamofo neza nenaza kna fore higeno avare'ne marerine vu'na'e.

⁴³Hianagi ne'za neknamo vagamaregeno, nontegama vunaku neazageno, Jisasi'a Jerusale kumate mani'negene, nerera ene nefakea onke atreke e'na'e.

⁴⁴Hianagi znagrama znagesa antahi'ana, magoka e'nona vahe'ene ne-e hu'ne nentahine nevakeno kinagase'ne. Kinaga onke'ne rone'zinine, mago'a vahe zamantahigeana, a'o tagranena nome hu'naze.

⁴⁵Hakreke erifore osuke, ete rukrehe huke Jerusale ome hakenaku vu'na'e.

⁴⁶Tri'a zagegnama enevigene, ra mono nompi kasegemofo rempi huzami vahe'mofo amunompi manineno, kema hazana nentahino zmantahige kea nehigeno, ome kene eri fore hu'na'e.