Luka 24:25-51

²⁵Tegani o Isus phenđa lenđe: “O, hulavonalen! Pharo tumenđe te verujinen sa adava so o proroci vaćerde adalestar ano Sveto Lil.

²⁶On prorokujinde da o Hrist valjani te nakhel sa adala patnje angleder so o Devel ka proslavini le.”

²⁷I tegani lelja te objasnini lenđe soi e Hristestar pisime ano Lila, počindoj e Mojsijasere lilendar hem ano sa e prorokonengere lila.

²⁸Sar avena ine paše uzalo gav Emaus, o Isus ćerđa pe da mangela te džal po dur.

²⁹Ali on terinde le te ačhol vaćerindoj: “Ačhov amencar, adalese so lela te perel i rat!” I o Isus ačhilo hem đerdinđa olencar ano čher.

³⁰Ked inele olencar uzalo astali, o Isus lelja o maro, zahvalinđa e Devlese, phaglja le hem dinđa len.

³¹Tegani phravdile lengere jaćha hem pendžarde le dai ov o Isus, a ov otojekhvar nestaninđa.

³²Tegani lelje te vaćeren maškara pumende: “Akana džana sose amare vile inele tate ked vaćerđa amencar odrumal hem ked objasninđa amenđe o Sveto Lil.”

³³Odmah uštine hem irinde pe ko Jerusalim. Adari arakhle e dešujekhe apostolen hem avere sledbenikonen e Isusesere sar bešena zajedno.

³⁴I phende lenđe: “O Gospod čače uštino taro mule! O Simon dikhlja le!”

³⁵Tegani vaćerde lenđe sa so ulo ko drom nakoro Emaus hem sar pendžarde e Isuse ked phaglja o maro.

³⁶Sar on vaćerena ine adalestar, o Isus otojekhvar terdino maškaro lende hem phenđa lenđe: “Mir tumencar!”

³⁷A on but darandile adalese so mislinde da dikhena duho.

³⁸Tegani o Isus phenđa lenđe: “Sose darana? Nane tumen sose te sumnjinen.

³⁹Dikhen mle vasta hem mle pre! Me injum! Pipinen man i ka dikhen! E duho nane telo oto mas hem oto kokala sar so dikhena da man isi!

⁴⁰Vaćerindoj adava, mothovđa lenđe ple vasta hem o pre.

⁴¹On edobor inele radosna hem začudime da našti ine te verujinen. Tegani o Isus pučlja len: “Isi tumen li nešto xajbnase?”

⁴²I on dinde le kotor oto peko maćho.

⁴³Ov lelja hem xalja le anglo lende.

⁴⁴Tegani o Isus phenđa ple učenikonenđe: “Ked injumle tumencar angleder mlo meriba, vaćerđum tumenđe da sa valjani te pherđol soi pisime mandar ano Zakoni e Mojsijasoro, ano knjige e prorokonengere hem ano Psalmija.”

⁴⁵Tegani ćerđa te xaljoven o Sveta lila,

⁴⁶i phenđa lenđe: “Ađahari pisime ko Sveta lila: 'O Hrist ka patini hem ka merel, ali o trito dive ka uštel taro mule,

⁴⁷hem ano lesoro anav ka propovedini pe sa e nacijenđe da valjani te pokajinen pe te šaj o Devel oprostini lenđe lengere greja, počindoj taro Jerusalim.'

⁴⁸Tumen injen svedoci adalestar.

⁴⁹A me ka bičhalav tumenđe e Svetone Duho, sar so mlo Dad dinđa plo lafi. Tumen ačhoven ani diz đikote o zoralipe e Devlestar na ka huljel upra tumende.

⁵⁰Palo adava, o Isus ikalđa ple učenikonen tari diz hem anđa len uzalo gav Vitanija. Adari vazdinđa ple vasta hem blagoslovinđa len.

⁵¹I sar blagoslovini len ine, lelja te cidel pe olendar nakoro nebo.