Lucas 24:25-51

²⁵Penga niyan, minikagi si Jesus, “Tay law. Nepela a kenyo, so wedà kaw pa pemenal te kedita te inikagi te menge telekeliwat te kagi te Timanem gebii.

²⁶Nepela a so wedà niyo ketegahi te eked lowan se Misiyas singed aw onà sikandin imetayan iling te neinang den seini.”

²⁷Penga niyan, miglebad-lebad si Jesus diyà kandan te kedita te insolat kidoen te kagi te Timanem tepad te pegkeotawun din, lekat te insolat i Moises aw kidoen te insolat te kedita te telekeliwat te kagi te Timanem gebii.

²⁸Pegkedapag dan doton te lonsod dinotonan te didowa tinoledaan sìyan, domeleg peden si Jesus.

²⁹Meneng ontò dan sikandin tinemengan, kagi dan, “Idegà ka den dini kenami, so ontò den meapon aw agpet den delem.” Penga niyan, timaking si Jesus kandan.

³⁰Peg-iyambong dan, inabat din se pan, aw migpesiontong sikandin diyà te Timanem, aw binelà-belà din, aw imbegay din diyà kandan.

³¹Penga niyan, kinilala den dan te sikandin si Jesus. Meneng pegketà, migkewedad sikandin kidoen.

³²Migpebelaw-belaway dan, “Yan kedì se doun te neantag se pedowan ta te peg-ikagi din diyà kenita kidoen te dalan, aw peglebad-lebad din te kagi te Timanem diyà kenita.”

³³Penga niyan, nesayo dan aw limikò dan doton te Jerusalem. Pegdateng dan doton, tapay netipon se sempolò tegusà tinoledaan i Jesus aw menge doma dan.

³⁴Minikagi se otaw tapay netipon, “Ontò benal neantay se Pengolo lekat te nematay, so migpekità sikandin diyà ki Simon.”

³⁵Penga niyan, mig-indan se didowa dan kaling dimateng tepad te neinang kandan kidoen te dalan, aw pegkilala dan kandin te pegbelà-belà din te pan.

³⁶Dalem pa te peg-indan dan te kinità dan, dimateng si Jesus timindeg kidoen te tengà-tengà dan. Minikagi sikandin, “Ibeg ko melinaw se pedowan niyo.”

³⁷Meneng nelemitan dan, so eden dan aw along din.

³⁸Minikagi si Jesus, “Ikà niyo egkebulung. Ikà niyo heman egdowa-dowa.

³⁹Tengtengi niyo se menge palì diyà te belad ko aw benis ko. Ontò siak. Pemaed kaw kanak amon ontò kaw metaga-taga te kenà a olò along. Wedad lawa te along, meneng seini kitaen niyo den te doen lawa ko.”

⁴⁰Penga niyan, impekità din kandan se belad din aw benis din.

⁴¹Neluba dan, meneng iling te wedà dan pemenal te ontò sikandin. So nepela dan pa, mig-insà si Jesus, “Doen lay kànen dini?”

⁴²Yan nemegay dan kandin te ikan sinognowan.

⁴³Kininawà din iyan aw kinaen din dalem te timengteng dan kandin.

⁴⁴Penga niyan, minikagi si Jesus, “Pegdoma ko kenyo kedengan te wedà a pa kematay, seini se inikagi ko diyà kenyo, te keilangan metoman se kedita te kagi insolat tepad kanak kidoen te punù ingkeliwat i Moises, aw insolat te menge telekeliwat te kagi te Timanem, aw kidoen heman te libro te Delangan.”

⁴⁵Penga niyan, migtabang si Jesus kandan amon mekelabet dan te kedegdagan te kagi te Timanem insolat gebii.

⁴⁶Minikagi heman sikandin, “Seini se kagi te Timanem tapay insolat, te keilangan imetayan se Misiyas, aw meantay sikandin lekat te nematay te iketelo te aldaw, aw netoman den iyan.

⁴⁷Doen heman kagi te Timanem insolat te keilangan megtoladà kaw diyà te kedita te otaw te keneyonan te pegwedaden te Timanem se salà dan aw megselsel dan aw memenal dan kanak. Keilangan megtebò kaw megtoladà kenyan dini te Jerusalem.

⁴⁸Sikiyo se otaw kimità te kedita niyan, aw meg-indan kaw den diyà te doma otaw.

⁴⁹Isogò ko diyà kenyo se Espiritu Santo tapay impakang te Amay ko. Meneng peg-ogpà kaw dini te Jerusalem lamig kinewaen niyo se Espiritu Santo domateng diyà kenyo lekat te langit.”

⁵⁰Penga niyan, timaking dan ki Jesus, aw nesayo dan lekat te Jerusalem, aw dimoton dan dapag te Bitanya. Pegdateng dan doton, timakyaw si Jesus te belad din, aw migtawal-tawal sikandin te tebangan dan te Timanem.

⁵¹Dalem pa te pegtawal-tawal din, timanan sikandin kandan aw neengat doton te langit.