Luke 24:25-51

²⁵Na Jesus el fahk nu seltal, “Pwaye lah komtal arulana afon! Efu ku pahtlac fuk komtal in lulalfongi ma nukewa ma mwet palu ah fahk?

²⁶Ya tia eneneyuk tuh Christ elan keok ke ma inge, na el fah utyak nu in wolana lal?”

²⁷Ac Jesus el aketeya nu seltal ma fwack kacl in Ma Simusla nukewa, mutawauk ke book lal Moses, fahsru nu ke ma simla sin mwet palu nukewa.

²⁸Ke eltal apkuran in sun siti srisrik se eltal fahsr nu we ah, Jesus el oru acnu mu el ac fahla na.

²⁹Tuh eltal ikolilya ac fahk, “Tari muta yorosr, mweyen fongeni pa inge.” Ouinge el utyak ac mongla yoroltal.

³⁰El muta in welultal mongo, na el eis bread ac pre lac kac, na el kunsalik ac sang nu seltal.

³¹Na ikakla mutaltal ac eltal akilenulak, ac in pacl sacna el wanginla liki ye mutaltal.

³²Na eltal fahk nu sin sie sin sie, “Ya insiasr tia fusrfusryak ke engan, oana sie e tayak in kut, ke el sramsram nu sesr inkanek uh ac aketeya nu sesr ke Ma Simusla?”

³³Eltal sulaklak na tuyak ac folokla nu Jerusalem ac konauk mwet tuma lutlut singoul sie, wi kutu pac mwet saya uh,

³⁴su fahk nu seltal, “Pwayena lah Leum el moulyak! El sikyang nu sel Simon!”

³⁵Na mwet luo ah akkalemye nu selos ma sikyak inkanek ah, ac ke eltal akilenak Leum ke el kunsalik bread uh.

³⁶Ke pacl se eltal srakna srumun ma inge, Jesus sifacna el sikyak inmasrlolos ac fahk nu selos, “Misla nu suwos.”

³⁷Elos arulana tuninfongla, ac nunku mu elos liyauk inut se.

³⁸Na el fahk nu selos, “Efu kowos ku sangeng? Efu kowos ku alolo in nunak lowos uh?

³⁹Ngetma liye pouk ac niuk, ac liye lah nga pa inge. Kahlyuwi na kowos ac fah etu na pwaye, tuh inut uh wangin ikwa ac sri kac oana ke kowos liye keik uh.”

⁴⁰El fahk ma inge, ac kolang paol ac nial nu selos.

⁴¹Elos srakna tia ku in lulalfongi, ke sripen arulana yohk fwefela ac engan lalos. Na el siyuk selos, “Ya oasr mongo yuruwos inge?”

⁴²Elos sang nu sel ipin ik manman se,

⁴³ac el eis ac kang ye mutalos.

⁴⁴Na el fahk nu selos, “Pa inge ma nga tuh fahk nu suwos ke nga srakna muta yuruwos ah: Ma nukewa ma simla keik in Masap lal Moses, in ma simusla lun mwet palu, ac in book in Psalm uh enenu na in akpwayeiyukla.”

⁴⁵Na el ikasla nunak lalos in kalem ke Ma Simusla uh,

⁴⁶ac fahk nu selos, “Pa inge ma simla uh: Christ el ac fah keok, ac el ac fah moulyak liki misa ke len se aktolu,

⁴⁷ac ke inel, pweng ke auliyak ac nunak munas ke ma koluk enenu in lutiyuk in facl nukewa, mutawauk Jerusalem.

⁴⁸Kowos mwet loh ke ma inge.

⁴⁹Ac nga ac fah supwama nu fowos ma su Papa tumuk El wulela kac. Tusruktu kowos enenu in mutana in siti uh nwe ke na ku lucng me fah tuku nu fowos.”

⁵⁰Na el kololosla nu likin siti uh ac som apkuran nu Bethany, ac el srukak paol nu faclos ac akinsewowoyalos.

⁵¹Ke pacl se el akinsewowoyalos inge, el som lukelos, ac utukyak el nu inkusrao.