Lukas 24:25-51

²⁵Dan Yesus taigi den taki: “Un donman! Fa un no man bribi ala den sani ete san den profeiti taki?

²⁶A Mesias ben mus fu nyan ala den pina disi fosi A ben kan kisi En glori.”

²⁷Dan A bigin brokobroko gi den san a Santa Buku ben taki fu En, kmopo fu san Moses nanga ala den profeiti ben skrifi.

²⁸Den ben doro krosbei fu a dorpu pe den bo go, dan Yesus du leki A bo waka go moro fara.

²⁹Ma den man aksi En tangitangi taki: “Tan nanga unu, bika a son e saka kba. Neti e tapu.” So A go na inisei dan A tan nanga den.

³⁰Di Yesus ben de nanga den na tafra, A teki a brede, A blesi en, A broko en, dan A langa en gi den.

³¹Dan fosi Gado opo den ai, dan den si tak' na Yesus. Ma dan A no ben de fu si moro.

³²Dan den taigi densrefi taki: “Na dat' meki un ben abi sowan switi firi di A ben e taki nanga unu na pasi, e brokobroko a Santa Buku gi unu.”

³³Dan den opo wantron, drai go baka na Yerusalem. Den go miti den erfu man fu Yesus nanga den tra sma di ben drape nanga den.

³⁴Den sma dati taigi den taki: “A tru! Masra kon baka na libi! A sori Ensrefi na Simon.”

³⁵Dan den tu man ferteri san ben psa na pasi, èn fa den kon si tak' na Yesus di A broko a brede.

³⁶Di den ben e taki a tori ete, Yesus srefi kon tnapu na den mindri. A taigi den taki: “Freide mus de nanga unu!”

³⁷Den ben skreki te fu dede, bika den ben prakseri tak' den e si wan yorka.

³⁸Dan Yesus aksi den taki: “Fu sanede un e skreki so? Sanede un de nanga tu ati?

³⁹Luku Mi anu nanga Mi futu, dan un o si tak' na Mi srefi dya! Kon fasi Mi, dan un o si tak' na Mi, bika wan yorka no abi meti nanga bonyo soleki fa Mi abi.”

⁴⁰Di A taki dati, A sori den En anu nanga En futu.

⁴¹Den man ben breiti, èn den ben ferwondru sote tak' den no ben man bribi. Ne Yesus aksi den taki: “Un abi wan sani dyaso fu nyan?”

⁴²Dan den gi En wan pisi baka fisi.

⁴³A teki en, dan A nyan en let' na den fesi.

⁴⁴Dan A taigi den taki: “Disi na san Mi ben taigi unu, di Mi ben de nanga unu ete: Ala sani san skrifi fu Mi na ini a wèt fu Moses, nanga den buku fu den profeiti, èn ini den Psalm mus kon tru.”

⁴⁵Dan A opo den ai fu den kan ferstan san skrifi ini a Santa Buku.

⁴⁶A taigi den taki: “A skrifi tak' a Mesias ben mus nyan pina èn dede, dan tapu a di fu dri dei A ben mus kon baka na libi.

⁴⁷Dan bigin na Yerusalem, den mus preiki ini En nen gi ala folku tak' den mus drai den libi fu kisi pardon fu den sondu.

⁴⁸Unu na kotoigi fu den sani disi.

⁴⁹Arki, Mi o seni a sani kon gi unu san Mi P'pa ben pramisi. Ma un mus tan ini a foto te leki un kisi a krakti san o kmopo na heimel.”

⁵⁰Dan A tyari den go te na Betania. A opo En anu, dan A blesi den.

⁵¹Di A e blesi den, A opo go na heimel libi den.