Lukas 24:25-51

²⁵Rimahushkankunata uyashpan Jesuska paykunata rimarka: Kankunaka mana asirtak runakunachu kankichi. Yapa unayankichi kirinaykichipa Yaya Diospa yachayninwa ñawpa yachachikkunapa rimashkankunata.

²⁶¿Manachu yachankichi, Yaya Diospa Kachashkan Kishpichikka manara atun apu tukushpan tukuy chaykunata parisinan kashkata?

²⁷Chasna rimashpan Jesuska yachachihurka chay ishkay runankunata tukuy Yaya Diospa killkachishkanpi paymanta killkarishka kashkata. Kallarishpan Moisespa killkashkankunawa, chaymanta Yaya Diospa yachayninwa shuk yachachikkunapa killkashkankunamantapas yachachirka.

²⁸Chasna Jesuska yachachihushkanpi llakta mayanpi paktarkakuna, maymami rihurkakuna. Jesuska ashwan chaynikma rihukshina tukurka.

²⁹Chaypi chay ishkay runankuna mana munarkakunachu Jesús paykunamanta anchurinanpa. Rikuy, ña tutayahunchi. Ñukanchiwa kipariy nishpa rimarkakuna. Chasna yapa tapushpankuna Jesuska wasinkunapi yaykushpan paykunawa kiparirka.

³⁰Mesa mayanpi sirihushpankuna mikunankunapa, Jesuska panta apishpan Yayan Diosta agradesirka. Chaymanta panta pakishpan paykunata kurka.

³¹Chasnallapi ñawinkunaka paskarishkashina tukurka. Chaypira Jesús kananta riksirkakuna. Chasnallapi kunkaymanta illa tukurka, payta mana rikurkakunanachu.

³²Chasna chinkarishpan paykunapura kwintarkakuna: Ñampipi shamuhushpanchi Yaya Diospa shiminta alita asirtachishpa yachachihushkanpi ¿manachu shunkunchika kushilla tukurka?

³³Chasnallapi atarishpankuna Jerusalenma kutirkakuna. Paktashpankuna Jesuspa runan masinkunata tantarishkata tarirkakuna, ashwan Jesuswa shuk purik masinkunatapas.

³⁴Chay ishkay paktashka runakuna manara nima imata rimahushpankuna chaypi tantarishka kahukkunaka paykunata rimarkakuna: Yaya Jesuska shutipami kawsarishka. Simón payta rikushka.

³⁵Chasna rimashkankunata uyashpankuna chay ishkay Jesuspa runan masinkunapas kwintarkakuna imashnami Jesuska paykunata ñampipi Yaya Diospa shiminta yachachirka, chaymantapas imashnami panta pakishpan payta riksirkakuna.

³⁶Chasna rimahushkanllapi kunkaymanta Jesuska chawpinkunapi rikurirka. Paykunata saludashpan rimarka: Yaya Dios kankunata kushillayachichun mana manchashpa kawsanaykichipa.

³⁷Chaypi paykunaka yapa mancharishpa yuyarirkakuna shuk almatami rikuhunchi.

³⁸Chaypina Jesuska rimarka: ¿Imaraykuta mancharinkichi? Ñukami kani. ¿Imaraykuta mana kirinayankichichu ñuka kanaynita?

³⁹Llankawashpaykichi makinita chakinitapas rikuychi. Ñukallatatami kani. Almaka mana aychayuchu kan, nima tulluyuchu ñukashina.

⁴⁰Chasna nishpan makinta chakinta paykunata rikuchirka.

⁴¹Paykuna kushilla mancharishka kahushkankunapi manara kirihushpankuna Jesuska tapurka: ¿Tiyanchu mikunaka?

⁴²Chaypi payta kurkakuna shuk piti challwa kusarishkata mikunanpa.

⁴³Challwata apishpan rikuhushkankunallapi mikurka mana alma ninankunapa.

⁴⁴Chaymanta Jesuska paykunata rimarka: Kankunawa pakta kahushpaynira kasna kankunata rimarkani: Moisespa killkashkanpi, Yaya Diospa yachayninwa shuk yachachikkunapa killkashkanpi, Salmos killkapipas ñukamanta killkarishkaka tukuy paktarinan tiyan.

⁴⁵Chasna nishpan paykunata asirtachirka tukuy chay Yaya Diospa killkachishkankunata.

⁴⁶Asirtachishpan rimarka: Killkarishkapi nin Yaya Diospa Kachashkan Kishpichikka wañunan tiyan. Chaymantapas wañushkanwasha kimsa punchamanta kuti kawsarinan tiyan.

⁴⁷Chaymanta kamachishkan runankuna Jerusalenpi kallarishpankuna pay munashkanshina tukuy allpakunapi runakunata rimanankuna tiyan, mana ali rurashkankunata sakishpa Yaya Diostana kasunankunapa, Yaya Dios paykunata uchankunamanta llakichinanpa.

⁴⁸Kankunaka tukuy rurashkaynita rikushkankichi, tukuy rimashkaynita uyashkankichi. Chasna kashpan tukuy runakunata chayta yachachik riychi.

⁴⁹Kankunata rimashkaykichi, ñukami Yaya Diospa Espiritunta kankunama kachasha Yayayni rimashkanshina. Kunanka kankuna kay llaktallapi kipariychi chay kankunata sinchikuchik Yaya Diospa Espiritunta silumanta kankunapi kachanaynikama.

⁵⁰Chaypina Jesuska runankunata Jerusalén llaktamanta pusharka Betania llakta kuchuma. Chaypi paktashpankuna makinta alsashpan paykunata rimarka Yaya Dios yanapashpa paykunata kushichinanta.

⁵¹Chasna paykunata rimahushkanpi rikuhushkankunallapi Yaya Dios payta siluma aparka.