Luk 24:25-51

²⁵Apan dere nop ap waiwanumune menan Iesu gare anega diamon, “E bumbam anenen da tayan waiwanin. God nop mega wataget waiwanumune nagire nop muga menawaet ya anu tumat wanin.

²⁶Mu ok anega seane, God mega wa watu eneni Keriso ugu vegaek bagu sisi anu tanep amba oya oya mega kimaniwa gapan wagup wareta.”

²⁷Ap gapan, Iesu watageta nagirewa Mosis namu amba God nop mega waiwanumune nagire den Iesu oit mega, ok gapan seane, gueguewa wadidiamon.

²⁸Amba pa Emeas maniwanumunewa, Iesu wa garawat mume taue namu aepen tan.

²⁹Go mu anega wan watanane, “Onge tanak inat, ma wan gine gaset tan, mum di tauapen taiwan,” ap anega wane menan tanamo pa gwanap aen.

³⁰Amba taba napen menan Iesu ae wande, buredi ware God inap gaun wa, wa paise amba munen.

³¹Muneni gapan, God yamamu watapen, Iesu ire ase yawane boge oagaen, da sia ya yawan.

³²Mu gare gare anega wan, “Iesu negina God nop mega gueguewa wadidian wandini nu potanu oma yame mini yagiriwandin.”

³³Boge mu wam ameme di yonan ewagai sia entan pa Ierusalem amon. Tauane Iesu watu enamot mega aonagaet pusinawan daiton amba waenapan upine den tanam wanumone yawamon,

³⁴go pa wanumuine nagire namu anega wan, “Ayop nuga di yon wanden apan Saimon inap venasen.”

³⁵Amba apan dere ame neginaet amuiwanumune gapan anenen venasen yawane oisewa wadidiamon, amba Iesu den taba napen tane gapan buredi wa paiseni wamewa gapan ire yawane oisewa den wadiamon.

³⁶Mu inak mame yawane oise waiwanumune, Iesu me mek taueni boge nimakamup yone anega diamon, “Nonup inayap wande ep.”

³⁷Mu boeni apane guewa da yawat anune menan guamu pua aen tap anu gurane.

³⁸Menan Iesu anega diamon, “E di menan nene yangwan doraen taiwanin? Iwa dimen imuyap gego den anuiwanin?

³⁹Nanina pusina yawan ma ne di! Onaen wat anu nimanegen amba yawanegen, ne etuna kaimana den go guewa etua kaimewa uon.”

⁴⁰Iesu nop ame wani, boge naniwa ge pusiwa siran ewamon.

⁴¹Mu aton anuiwanumune go anu bambamat inamup di wandeni menan, me singui anega tamon, “E taba nana da den?”

⁴²Menan mu meo bonigawa da wat onam wanan.

⁴³Iesu boge ware, watu enamot megawa yamamup nan.

⁴⁴Amba Iesu sia wadiamon, “Ne manap tanaen wanigena, inak map anega venasepi oisewa, namu wadiaen ame Apan Mosis ge God nop mega waiwanumune nagire amba den buka Sam seane nagirewa oitana iravi ok seane mame di venasia.”

⁴⁵Ap gapan me God nop mega mu anu awapen menan imumu watapen.

⁴⁶Amba Iesu anega wadiamon, “Wataget God nop mega ok anega seane, God om enuni Keriso da tauepi ugu vegaek anu bop tata, amba wam yampoa ewap me bop gapan, sia inakae yon wandeta.

⁴⁷Ap menan Keriso me yaua gapan inak koewa anu ae veat, ge wat entan tapen no oisewa, namu pa Ierusalem gapan, amba at at iragi wadidiamoin. Ok ap anega sean.

⁴⁸Inak ma yaviana no oise ase wasenamene nagirewa e me di.

⁴⁹Amba ne nek Mamana kimani agi mega wani ne enan watu enain, go e mapa Ierusalem gapan amat taiwanian amba aro amun da aupa kimani aigayap visepi waran amba tau aisen.”

⁵⁰Amba Iesu wadidiamot mega naumo taue at Betani mainep tauan. Ap mepe nani ao wadave wat aipakam mumen.

⁵¹Wat aipakam mumiwandiniwa gapan, me pusiwa ao bunen boge ae vemo, God aro mega gapan kiman dot aen.