San Lucas 24:25-51

²⁵Sehe ngajan xi Jesús ne, cuitjin xu cachja me cojo cha: ―‍Ngayun yuma hasen, ngayun xi jemu tafi sehe macjain nuju yëjë cjua xi cachja profeta.

²⁶¿Hacuiin hatuxa casahmi ngujyë xi me xi catsingatju Nina ne, cuatjin cavatju me cjuañihi, sehe camajyë camahnga me cojo hasen ndajyihi rë me? ―‍Cuatjin xu cachja Jesús.

²⁷Hane sehe ngajan xi Jesús ne, casuacuenda xu me cha mé vijne yëjë ni cjua xi camahindu tsëhë me xcun yëjë ni xujun rë Nina, cavetsihin me cojo cjua xi catsihindu Moisés, hane cajnetaha me cojo hisca cjua xi catsihindu yëjë sa profeta.

²⁸Hya xi camá ne, xi camatiña xu cha cojo Jesús nandya hiscan cjui cha jan ne, Jesús ne, casahmi xu me sacuaha xi cjuenduju sa me.

²⁹Peru cha xi cuacun jan ne, jercu cjín xu cachja cha cojo rë me cuitjin: ―‍Tinechun cojo niji ta quihndë ne, ha quiji hora hacuaha hisca meje cjuë nixtin. ―‍Cuatjin xu cachja cha. Ngajan xi Jesús ne, quiji xu me cojo cha, hane cavisehen me ndava cha xi cuejña me cojo cha.

³⁰Hane xi ha cafaha me cahndë́ rë me xcun maxë xi sinë me niñu cojo cha ne, sehe cafaha xu me ngu niñu, hane casua me nacuechji rë Nina, sehe cavatëlanga me, casua xu me cha.

³¹Hane hora vëhë xu casua Nina cahndë́ xi camá cavëë cha xi hacui Jesús. Hya xi camá ne, ha tu ñahñu cafëya xu me.

³²Hane sehe cachja xu cha ngajñi rë cha cojo xicjin cha cuitjin: ―‍¡Jercu ndaja camahani camá rë xahasen naja, hora xi tichja me cojo naja ngajan ndiya jan mé vijne cjua xi hincha xcun xujun rë Nina! ―‍Cuatjin xu cachja cha cojo xicjin cha.

³³Hane hora vëhë ni ne, cavisatjenhnga xu cha tsëhë maxë jan, sehe cavuya quiji cha Jerusalén. Hane xi cafehe cha jan ne, casacutsja xu cha me xi tengu jan, tjintangun me cojo me xi yahnga sa.

³⁴Hane sehe cachja xu me cojo cha cuitjin: ―‍Quixi jain xi cavuya Nai naja cjuahñu, hacuaha cha Simón ne, cavëë cha me. ―‍Cuatjin xu cachja me.

³⁵Ngajan xi cha xi cuacun jan ne, casuacuenda xu cha hacutjin cavatju cha camá ngajan ndiya, hacuaha hacutjin camá cavëë cha xi hacui Jesús hya xi cavatëlanga me niñu.

³⁶Hane tu tichja cuaha xu cha xi cuacun jan cojo me vëhë cjua jan ne, ha tu ñahñu cavëë xu yëjë me Jesús, secun me ngajñi rë me. Hane Jesús ne, cachja xu me nina cojo rë me cuitjin: ―‍Nina sua nuju me cjuandaja cjuajeya. ―‍Cuatjin xu cachja me.

³⁷Hane yëjë xuta ladu rë Jesús jan ne, jemu catsacjun camaha xu ni me camá tsëhë xi xi má rë me ne, tivutsejen me ngu hasen.

³⁸Ngajan xi Jesús ne, cachja xu me cuitjin: ―‍¿Mé má cuatjin jemu fircun nuju? Hacuaha ¿mé má cuatjin mangu majo tacún?

³⁹Chutsujun ntsa cojo ntsacú ta ngahan vi. Nduvun tetuhun ntsun ná, hacuaha chutsujun ná ta ngu hasen ne, tsajin yojo rë hacuaha tsajin nínda rë sacuatjin chutsujun ná ngahan cojo yojo cojo nínda naha. ―‍Cuatjin xu cachja Jesús.

⁴⁰Hane xi cavatju cachja me cjua vëhë ne, sehe catsingacun xu me tsja me cojo ntsacu me.

⁴¹Hane xuta ladu rë Jesús jan ne, hisca maji xu macjain rë me ngatsë rë xi jercu tu ndaja má camahani rë me hacuaha hisca fircun rë me. Ngajan xi Jesús ne, cavinenguise xu me xuta jan cuitjin: ―‍¿Há tjin nuju hitsë xi xinëë nguehe? ―‍Cuatjin xu cavinenguise me.

⁴²Hane ngu me jan ne, casua xu me ngu rquí ti camatsju.

⁴³Hane xi cafaha me ne, cajinë xu me xcun yëjë ni xuta.

⁴⁴Sehe cachja xu me cuitjin: ―‍Yëjë xcusun xi cavátju camá ne, tsëhë vëhë cjua xi cachjá cojo nuju hya xi tejña cuaha ngajñi nuju. Cachjá cojo nuju ta hatuxa meje rë xi cuetjucaa yëjë hacutjin camahindu tsahan xcun xujun xi catsihindu Moisés cojo xcun xujun xi catsihindu profeta, cojo xcun xujun tsëhë Salmo. ―‍Cuatjin xu cachja Jesús.

⁴⁵Sehe ngajan xi Jesús ne, cavuxaha xu me cjuatacun rë xuta jan, cojo sa xi cuijnercu me cjua xi camahindu xcun xujun rë Nina.

⁴⁶Hacuaha cachja xu me cuitjin: ―‍Cuitjin camahindu xi me xi catsingatju Nina ne, hatuxa cuatju me cjuañihi, hane xi cjuë jyan nixtin xi cueya me ne, cuya nga me cjuahñu,

⁴⁷hacuaha sacú cumachaya rë yëjë ni xuta tsëhë ngasunhndë xi sá xi mangucacun me cojo me vëhë hacuaha tsindeya me cjuatacun rë me ne, tsinchataha Nina me tsëhë jyë́ rë me. Jerusalén vi ne, nguehe cuetsihin cuitsojo cjua vëhë.

⁴⁸Ngayun cuinújun cojo xuta cjua vihi ta ngayun xi cahyun hacutjin camá.

⁴⁹Chutsujun ni, ngahan tsingátju nuju Hasen xi ha cachja Nahmi naha xi sua nuju me. Peru ha tinechun ni nguehe nandya vihi hisca xi chjuhunntsun Hasen vëhë, xi cuinduva hisca ngahnga. ―‍Cuatjin xu cachja Jesús.

⁵⁰Hya xi camá ne, cavaxëxin xu Jesús xuta ladu rë me tsëhë nandya Jerusalén, quijicojo me me hisca nandya Betania. Hane xi cafehe me jan ne, catsiquijin xu Jesús tsja me hane catsinchacun me xuta jan.

⁵¹Hane ngajñi rë xi titsinchacun me xuta jan ne, cavetjuxin xu me quiji me ngahnga.