Lucas 24:25-51

²⁵Tsa lee Jesús nzhab lo rop zha: ―¡Chebee kwathoz nayez yek goo! Ne ¿chebee kwathoz nad leettsoo goo ne nyelaazt goo re kuu nzhab re profet kuu ngoo ndala?

²⁶¿Chu ndoblot rid Crist Kuu Taal Diox Nabee yalti, ne tsaraa bretab zha ndya zha lo xni ta nabee zha?

²⁷Tsa lee Jesús mndelo mndaa kwent naa xomod mrolo re kuu nke lo xkeets Diox kwent Jesús, ne mndelo Jesús mndaa kwente kon re kuu mkee Moisés lo re libr chaan ley ne re kuu mkee re profet kuu ngoo ndala.

²⁸Ne leettsa mzin rop zha yez ta nda zha, tsa lee Jesús mtsow taxal thib zha kuu nda mas tith,

²⁹tsa lee rop zha nzhab lo Jesús: ―Blet kon nee, tak mziʼa yezlyu. Tsa mlet Jesús lo rop zha.

³⁰Leettsa nzi re zha roo mes wu zha, ora mzhen Jesús pan ne mndaa Jesús texkix lo Diox ne mtsow rol Jesús pan ne mndaa Jesús pan lo rop zha.

³¹Tsaraa mzhaal lo rop zha, ne mlebee zha Jesús. Per oraaka lee Jesús mnith lo rop zha.

³²Tsa nzhab rop zha lo altaa zha: ―¿Chu wlipaa neeka lut myeentaa leettsa ndyaadaa ngetedizaa net, leettsa ngetaa zha kwent xkiiz Diox kuu nke lo xkeets Diox lo ropaa? ¿Chu thitanax mdowte leettsooʼaa ora?

³³Ne oraaka ngoo rop zha net mretab zha yez Jerusalén tedib welt. Ne leettsa mzin rop zha tsa mzal zha re tsiibthib zha kuu mteed lo Jesús, ne tedib net re zha kuu nzi kon re zhaʼa.

³⁴Tsa nzhab re zha lo rop zhaʼa: ―Wlipaa mroban Zha Nabee, tak mwiiʼa Simún zha.

³⁵Tsaraa lee rop zhaʼa mndaa kwent, naa xomod mwii zha Jesús leettsa ndo zha net, ne xomod mlebee rop zha Jesús, leettsa mtsow rol Jesús pan.

³⁶Leettsa lee re zha bee ngetedizka re kona, lee Jesús cha mtsetab lo re zha, ne nzhab lo re zha: ―Wen brin goo.

³⁷Per lee re zha kwathoz mzeb zha, ne mnda leettsoo zha thib xbi thib zha ngewii.

³⁸Per lee Jesús nzhab lo re zha: ―¿Chebee kwathoz nzeb goo? ¿Ne chebee nzhak chop xgab goo?

³⁹Wii goo yaan ne niin. ¡Nay! Bdiinn goo na, tsa ne goo nay. Tak thib mbi yent beel mbi neeka yent tsidth mbi, taxal na.

⁴⁰Leettsa ngwalo nzhab Jesús kona, tsa mloo Jesús yaa Jesús ne nii Jesús lo re zha.

⁴¹Ne tegal tata mloo Jesús yaa Jesús ne nii Jesús lo re zha, per ngwalaazt zhay, tak bee laz re zha. Tsa nzhab Jesús lo re zha: ―¿Chu nap goo lut kuu dowaa nzhee?

⁴²Tsa mndaa zha thib le mbel kuu mbyex lo ki lo Jesús.

⁴³Ne tyaka lo re zha ndow Jesús kona.

⁴⁴Tsa nzhab Jesús lo re zha: ―Koree nak kuu mnin lo re goo, leettsa mndon kon re goo, reta kwent chaan da kuu nke lo ley chaan Moisés, ne re kuu nzhab re profet Diox zha ndala, ne re kuu mke zha lo libr chaan salm, retay mrolo.

⁴⁵Tsaraa mtsow Jesús mzhaal yek re zha, tsa myen re zha xkiiz Diox.

⁴⁶Tsa nzhab Jesús lo re zha: ―Tbaa nzhab lo xkiiz Diox lee Crist Kuu taal Diox Nabee ndoblo gath, ne leettsa tsaal tson wiz lee zha roban,

⁴⁷ne ndoblo taa goo kwent re koree lo reta men kuu nzo reta yez dib naxta lo yezlyu, ne ndoblo telo goo yez Jerusalén, ne koree nak kuu ndoblo gab goo lo zha, ndoblo tsee zha mod went kuu nak zha, tsa tuyy Diox re falt zha.

⁴⁸Re goo ndoblo taa kwent chaan da, tak re goo mbin ne mwii re kuu mtsowʼn.

⁴⁹Kenza goo. Lee na taal zha kuu mne Xutʼn taal Xutʼn lo goo, per ndoblo kwet goo yez Jerusalén, asta yelo kayaa goo yalney kuu roo yibaa.

⁵⁰Tsa mloo Jesús re zha tya ne mndeno Jesús re zha asta thib yez kuu le Betania, tsa mlap Jesús yaa Jesús ne mnaab Jesús lo Diox por re zha, tsa kenap Diox re zha.

⁵¹Ne leettsa bee ngenika Jesús lo Diox, zhega zhega ngwaap Jesús yibaa.