Luka 24:25-51

²⁵Niyo Yesu awagamba, “Nyuwe wahezi na wata myoyo midala ya kuzumila mbuli zose za wawoni walongile!

²⁶Elo havyungigwe Kulisito asulumizwe akaheza engile mwe ukuka wakwe?”

²⁷Niyo awagambila mbuli zose ziwandikwe mwa Mawandiko Yakukile, kukongela muwoni Musa kubula wose.

²⁸Weze wabule hajihi ne idya ikaya nawakaita, Yesu enga ajendeleza ne ntambo awasa.

²⁹Mna wowo wamlombeza wamgamba, usekwita kwaviya zuwa diswa chilo chengila. Ivyo engila he ikaya na kwikala nawo.

³⁰Eze ekale na kudya nkande hamwenga nawo, aguha mgate aujimbika, aubesula awenka.

³¹Ahadya meso yawo niyo yagubulwa, wambunkula kugamba ni Yesu, mna ahadya niyo ahalawa kuno wakasinya.

³²Niyo wagambilana togolani “Myoyo yetu haisangale vidala umo akatamwila na suwe mwe sila na kuchigambila Mawandiko Yakukile?”

³³Niyo wahalawa isa idya, niyo wabula Yelusalemu niyo wawabwila wadya mlongo na yumwe wadugana hamwenga na wantu watuhu we dibunga dyawo.

³⁴Wakalonga, Zumbe kauyuka chindedi, naye kamlaila Simoni.

³⁵Niyo wawagambila mbuli zose mbuli zose zilaile mwe sila neivyo wambunkule Yesu umo akabesula umgate.

³⁶Umo nawakawagambila ayo, Yesu mwenye alaila achimala hagati hawo, awagamba, Mtende na utondowazi.

³⁷Wasetuka na kwingilwa ni woga, nawamanya wawona mpepo.

³⁸Mna yeye awagamba, kwambwani mnankama? Kwambwani mwatenda na nkama mwe myoyo yenyu?

³⁹Kaulani imikono ne viga vyangu, chani mmanye ni miye, nitozanitozani muwone, kwa viya mpepo haina mwili na mavuha enga vino mkuniwona.

⁴⁰Eze alonge iyo, awalagisa imikono yakwe ne viga vyakwe.

⁴¹Umo hawenati kuzumila kwa chinyemi wananacho kuno wakehelwa, awauza, hano mna nkande yoyose?

⁴²Niyo wamwinka chihande cha samaki yokigwe.

⁴³Aiguha, aidya kuno wose wakamsinya.

⁴⁴Niyo awagamba, “Uno nuwo ulosi nahawagambilani umo nendaga nichei hamwenga na nyuwe, kugamba vyaungwa nichintize mbuli zose niwandikilwe mwe Sigilizi ya Musa, na mwamawandiko ya wawoni na Zabuli.”

⁴⁵Niyo agubula fanyanyi zawo chani wamanye Mawandiko Yakukile,

⁴⁶awagamba, “Ivyo nivyo viwandikwe kugamba Kulisito nasulumizwe zuwa dya katatu nauyuke.

⁴⁷Naho kugamba kwa zina dyakwe wantu wose kukongela Yelusalemu nawagambilwe Mbuli Yedi weile chani walekeilwe masa yawo.

⁴⁸Nyuwe namtende waukuzi wangu mwe mbuli zino.

⁴⁹Miye mwenye naniwegaileni yudya Tate ekiye ndagano kugamba namsigile kwenyu, mna ikalani muno mo mzi kubula mwinkigwe idya nguvu ikulaila kulanga.”

⁵⁰Niyo awalongoza kubula Besaniya, enula imikono yakwe awajimbika.

⁵¹Umo akawajimbika, awasa, aguhigwa kulanga kwembingu.