Luk 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Gode singkalin am bomanoa Yesuse monea Felisiei komok make am tam temnea imeno wembiba nakaia unangai kla atemebiba

²eka naka make skila kweilao sitkaha binobua tenea Yesus esu meb ye bia

³Yesuse atemnea hekmel weng tekein kemin naka isa Felisie isa baabenea Ne ginin game Gode singkalin amo klaubanamabio kukub olo ayama bleka? ge baabese otane

⁴i wengo kimik geib kesoa Yesuse naka ele afunea klaaubanea dabane unea

⁵baabenea Naka make ib isak tem daako men gwabe biba bianea Gode singkalin amo dimo aamuke weleb daak unameo e afu dobbianea utlamabebe. Eka eil blumakau ita biba bianiba mako weleb daak unam osa

⁶inanea wafu ombianea utlamabobe. Olo bain bleka dim eso ge baabesea i tekein keniba e wengo bain kesoa i mo yang keim blim kesiobe.

⁷Nakai imeno unalom geniba teniba komokwali biino toulansiba Yesuse yatemnea saa weng mako baabenea

⁸Naka make baabenea Ibo tliba imeno wembianoba ne alelo omano gesea motemom gaibo

⁹ibo komokwali biino mo tounimibe! Naka maki niniin oyemini baabenea tesiba tenea ibo baabenea Biin olo naka eleta omaline gesea ibo aal fotom klaniba moniba abuk tam tounimib kesoa

¹⁰naka make nganabenea motemniba imeno dowom gaibo moniba abuk tam toumblibta naka ele emaye tenea baabenea Ibo uteniba biin toulalin dim ele toulaine ge baabeseta utnibta tounine! Ibo inanimib ota nakai alukum ye teniba mibianiba imeno wembib nakai ib niniino dotouleb nomabiobo ge baabenea

¹¹eka imin baabenea Nakai i niniino omfufu binimib nakai Gode i niniino omabbubenamabebe. Eka nakai i niniino omabbu binimib nakai Gode i niniino omfabenamabebo ge baabesebe.

¹²Eka Yesuse tetemnea Felisiei komoke dab bianiba imeno wembianiba baabanea Kobo fal sumo ganang gaebo kleb nekwal isa dab tleminwal isa eka kleb meletan isa kleb bibam seli monisa isa mo nganabenemebe! Sinanomo i fal osa ganom gaibo nganabkeiba motemneba ga dowoniba yang kenomabib

¹³kesoa kobo fal sumo ganang gaebo nakaia unangai inamin namin blim isa kweil misiam isa skil misiam isa kin misiam isa ita nganabenale! Inabeneb biamo

¹⁴i mo yang kenomabibba kesoa naka ayami ham gloutem daak daniba hana tlemomabib dimo Gode keb unin olo yang kebkenamabe kesoa kobo seinale ge baabasebe.

¹⁵Nakai alukum miniba Yesuse tem nabianiba imeno wembianiba wentebiba naka make Yesuse baabanea Gode kimanin bibo toula bianiba imeno unalomabib nakai seinine gesea

¹⁶Yesuse saa weng mako baabanea Naka make fal sumo ganama bianea naka homoni weng omfubenebua

¹⁷falo ganebuo eino kesoa tilanamabibo genea e okok nakae dabanea monea sino weng omfubenebio naka eli baabenea Ibo natline! Falo einobua tilanomabbiobo ge baabene

¹⁸otane i alukum baaniba Ne mo unamabibabo ge tlaniba make baanea Ne damib mako walibuo monia watemamabi kesoa ne mo unamabibabo, kobo moneba keb komoke baabanale gesea

¹⁹eka mak esak baabanea Kobo moneba komoke baabanale! Ne eil blumakaui 10 i walibuo monia yatemamabi kesoa ne mo unamabibabo genabea

²⁰eka mak esak baabanea Kobo moneba komoke baabanale! Ne alelo memale omobli kesoa ne mo unamabibabo ge baabanasiba

²¹naka ele deibenea monea komoke weng olo baabanea I inangge baaniba desiba deibe tlibo gesea falo kimanin nakae weng olo wentenea atliaubasoa okok nakae baabanea Inaib yole kobo deibe moneba bib mak bib mak olo bib sum osa bib gwab gwab osa hen haabianeba nakaia unangai inamin namin blim isa kweil misiam isa skil misiam isa kin misiam isa ita dleb tele ge baabanea dabanea monea baabe dleb tetemea biino toulaniba mako sma deibueib kesoa

²²okok naka ele komoke baabanea Sum kobo ne keb wengo wentenia inai otane biino mako sma deibueibobo gesea

²³komoke baabanea Imin moneba deib deib osa damib osa hen haabianeba nakaia unangai imin mo baabe dleb tele! Ne funania Am olo dinsibte gabibo ge baabanea eka imin baabanea

²⁴Ne baabkenamabibo, nakai sino weng omfubeia deibbio naka eli ne imeno mo dowonomabibbabo genebiobo ge baabasebe.

²⁵Naka homon unang homoni Yesuse bekeba bebiba deskina baabenea

²⁶Nakaia unangai wanita ne bainobo getneniba ne okoko okok kemom gib mole e aaleb esa awok osa alel osa meme isa hekwal isa ningwal isa enwal isa nengwal isa eka ili bobol tem funin osa deiboniba ne bobol ota funib mole i ne okok aleyemin nakanomabiobe.

²⁷Eka nakaia unangai wanita i niniino mo omabbuniba inamin namin misiamo i dimo tam tlemo omnakatouleb bianiba ne kukubo mo wafunin blim kenib mole i ne okok aleyemin nakababo ge baabenea

²⁸eka Yesuse imin baabenea Ib isak temo naka make Am sumo genano genemeo e kla funanea am olo monio walamabio moni olo mo kinoa walamabi bleka? genea tekanete!

²⁹E mo inaim blim bianea maa omusane mole monio blimanoa deibonebua naka maki te watemniba tlaha bianiba

³⁰baabaniba Naka ele amo kla omfanebio otane e monio blimano kesoa e hebmamsabo mo klaim blimobo ge ohamomabiobo ge baabenea

³¹eka imin baabenea Komok make meletani dleb monea komok make meletani Awao genano genea unang gameo e funanamabebe. Ne awa genalin nakai 10 tousen bliba eka wasi nakai komoke meletan ile 20 tousen dleb tlamabe kesoa e funanea Ne mo bingania dolblia unomabib bleka? genea

³²e funa temea e mo sbal manea inanamabeba mole wasi nakai tlim blim bliba e naka maki dlane motemniba baaniba Awao denomo geniba awa wengo blimanoa deibonomabib inaminobe.

³³Eka naka make ib isak temo inanea e inamin namin afobeingo alukum abuk wawenea ne bekebne nim blim kene mole e ne okok aleyemin nakababo ge baabesebe.

³⁴Yale ayam otane game blimanemeo fatnabanobta imin gam ayam anamabene?

³⁵Yale ele okoko blim kesoa nibo besa obbianomabbiobe. Nakaia unangai ne wengo kla wentomo gabibi kla funaine ge baabesebe.