Lucas 3:3-10

³Yan se doun te miglegeb sikandin kidoen te kedepagan te wayeg te Jordan. Migtoladà sikandin te kedita te otaw te keilangan megselsel dan te salà aw bonyagan dan amon ipetaga-taga dan te pigwedad den te Timanem se salà dan.

⁴Pegtoladà din kenyan, tinoman din se pakang tapay insolat kidoen te kagi te Timanem ingkeliwat i Isaias, “Dinegen niyo se otaw doton te kebigtilan, aw dakel se kagi din, ‘Pegpeketagad kaw te pegdateng te Pengolo. Peg-inang kaw te metòlid, so domateng sikandin.’

⁵Peg-epengen se kedita te baog, aw inangen mepantal se kedita te bontod. Tòliden se dalan belegkong, aw inangen melenas se dalan megeled-geled. Keilangan iling kenyan se pegpeketagad niyo te kenyo pedowan,

⁶aw komità se kedita te otaw te megpelowà se Timanem te otaw lekat te salà.”

⁷Nayan, pegdineg te otaw te intoladà i Juan, medita dan se dimoton kandin amon bonyagan din dan. Minikagi si Juan, “Tay law. Iling kaw te memokan egkadas te apoy. Eked kaw pekelowà lekat te pelumun te Timanem te modi aldaw singed aw megselsel kaw.

⁸Aw migselsel kaw den, petega-tegahi niyo iyan pineokit te eg-inangen niyo. Ikà niyo eg-aneng-aneng te eked kaw pelumuni so bowad-bowad kaw i Abraham. Eneng-enengi niyo se kagi ko seini. Pengkey se menge bato seini te lanto te tanà, mepakay iyan inangen te Timanem menge bowad-bowad i Abraham amon somelilin dan kenyo.

⁹Iling kaw te kayo agpet pilayen. Aw kenà mèpiya se pongo te kayo, pilayen iyan aw sonogen.”

¹⁰Mig-insà se menge otaw, “Aw iling kay kenyan, eden lay se keilangan inangen day?”