Lukas 3:3-10

³La ol, i ke langa ech nge Iortan pe haliu hote NeHalang na helenga pe hele, “A hile lemo poinga pulut ngana mur pe e henune imo. Pomalam lape NeHalang saua lemo poinga poreke ngana mur ke te lasus toto.”

⁴Haliunga nei nanas taua hetatalonga Isaias na helenga nenge has sue nga na alalaha ke teke, “None kou haliuliu nga ich sana lomona. Haliu ke teke, ‘A hepengia Non Soke na kue ke kulele i. A hepengia na kue ke pengpeng toto iange lape at pe i ia.

⁵Kileng talloko sio ngana mur lape te hemuta heke mule iri pe sasana pe hengene mur lape tesel sue iri. Pe kue chachau ngana nemur lape te umeia iri ke pengpeng mule. Pe kue poreke ngana mur lape telau hit mule iri pe te hepeng mule.

⁶Hulua lochloch ngana nga ich lape te esia NeHalang penna nge mene mule iri lochloch.’”

⁷Iok laol, hulua lochloch ngana tela nge Ioanes ke henune iri. Pe hele inin taua iri, “Ilimo alete nemur! A teke NeHalang eteia letemo tuanin ngana ero ma? Imo a sere at ke a menmene henuninga pe imo a teke ma ech nem poi ele NeHalang letena inin ngana nga lemo poinga poreke ngana mur. Ero toto la! A hul tote letemo!

⁸Pe a poia lemo poinga urana ngana mur ke mo eteia ke ahul mule nga lemo poinga poreke ngana mur lo. Imo nenge a teke Apraham na tete mur imo a pengpeng ero kura la. NeHalang nakuna nge ume hote Apraham nena tete mur nga um mur pe imo a teke Apraham na tete mur imo. Ute pele ero!

⁹Selempo koi te rahite nga ae mur huria lo ke te tele sue iri. Pe ae lochloch ngana nenge nganangaria lohot ke urana ero lape te tele sue iri pe tesau heke nga oan.”

¹⁰Pe hana nemur te onteia i, “Lape mopoi ke pomere ol?”