3Ne Juany gudeedbɨ irate de guɨdx ni ná gax ruu gueeu Jordán ax raipbɨ de bniety dec ná par yialaazdeb pur de xtulddeb ne irubniszadeb te gún Dios perdón laadeb.
4Ziy xquel guc cumplir de diidx ni bcuaa profet Isaías, te pur laab bcuaab: Ríeny rsee tuby bniety ni rbɨxtia nez lo yiubiz rut quɨt tu rbezti ax rniib: “Gulganzaac nez xte Xtadnɨ. Gulxal tuby nezldí.
5Gulcha irate de barranc ne gulgaany tubylo irate rut ná de dany ne de lóm, ne gulgaany tibyldí de nez ni ná teeb. Chiy gulgaany tibyldíza lo de nez ni nadxab.
6Ne irate bɨnguɨchliu sniádeb ni ixiaald Dios par gacné dunnɨ.”
7Chi bdiia de bniety par itiubnis Juany laadeb, laab raipbɨ laadeb: —¡Xípalza zecpacza de béeld vivtɨ! ¿Tú gudixtee lot par ldát lo castiguroo ni abdzɨngax?
8Gulbány zacru par yíany dec guldípactɨ rialaaztɨ pur de xtuldtɨ. Ne quɨt gaiptit de saat: “Dunnɨ nan xfamily to Abraham”, te pur nare rniia laat axt de guiaré zelee gún Dios de xfamily to Abraham.
9Ne de bniety ni quɨt nabány xnez Dios zec ni riáld, laany zunnény laadeb zec ni runné de bniety tuby yag chi aquɨtru rca frut loni ax rtiuudebni par chaaicquini.
10Chiy de bniety gunabdiidxdeb Juany: —¿Xa xquel riáld idxannɨ?
San Lucas 3
San Lucas 3:3-10