LUKA 3:3-10

³Io, worwor káián ái Káláu a tapam hut si Ioanes ngorer, mái Ioanes a láklák tangrai kuir malar no i aru balsán dan á Ioridan má ák arbin má ák parai ngoromin, “Gama hol kaleng má gamáng kipi arsiu, má ngorer ái Káláu nák pah palai kamu tan sápkin.”

⁴A ngorer i tám worwor tus ái Aisaia ákte sir páptai i kán buk ngoromin, “Tekes na lu binbin i pokon mau ngo, ‘Aleget i sál si Konom má eran on. Long anokwai sál suri na láklák on!

⁵Boh kostung, da dungi mai bim suri na arwat no. Tan gengen pungpung má tara ukung, na nokwan no. Sál a kalkalis, na nokwan mul. Má sál a lala sák taladeng, da long kuluknai nák lain dalian no.

⁶Má matananu no da mákái araliu káián ái Káláu.’”

⁷Má marán matananu di purut talum narsá Ioanes suri ngo na siu di. Mái Ioanes a parai si di ngo, “Á gam á rang natun kanih sáksák! Sinih a parai si gam ngo gama tur kaplah alari nagogon si Konom erei ngo na hut besang?

⁸Gama oboi lain wán i gam suri inngas tar gam ngo gamáte hol kaleng. Koion gama ruruna ngo gamáte tur kaplah alari nagogon si Káláu kabin gam á tan rang kopkom i Abaram. Kápte. Má minái iau para talsai si gam ngoro minái ngo ái Káláu a arwat singin suri na longoi tan hat minái sang suri da rang kopkom i Abaram!

⁹Palngat ákte eran pagas suri tárái boh kubau adi káplabin. Kubau erei kápate oboi lain wán, da tár palai má dák sápkai uri kámnah.”

¹⁰Matananu di longrai ngorer má dik gálta Ioanes ngo, “Má dánih be gima longoi?”