Luuka 3:3-10

³Yagia mu ewialo wiona ewiri ampi no oluuzi olwa Yordaani, na alanzizia awantu mbwe wagaluke wareke amawi, wabatiiswe kugere Katonda awarekere owuoni wuawu.

⁴Kiomo Katonda yawoola mu amangʼana agari mu ebuuki eya *Omugambi Isaaya otino: “Omwoyo ogwa omuntu oetana mu ekeewa otino, ‘Mulongre Omwami engira, mumugololre engira ewe enyigolovu.

⁵Amiina goona gawugrwe, ewigiri wiona wirimwe wiike ansi. Engira eziigodre zigololwe, kandi anyenyeevu aterereziwue.

⁶Kandi awantu woona waaza okuwona owuinunuzi owua Katonda.’ ”

⁷Yowaana yalaga omuganda ogwa awantu awamuuzako kugere awabatiise otino, “Inywe awaana awa enzoka wano! Owasiagiizie mbwe mumizule okuswawukwa no okusu okungi okuuza naanu?

⁸Muamie ensaafu ezia mu enkola, ezilagana geeza mbwe omuntu agaluuke arekere amawi. Ni mutaaza mwaingirizia mbwe muuza mwamizuka ku okuwoola-uwoola mbwe, ‘Turi geeza aeniki turi awaana awa Abraamu.’ Mbalaga mbwe Katonda aesa okugalusia amawaale gano gawe awaana awa Abraamu!

⁹Namba nyingeeno, embasa emiire okuteewua ku isina eria omuti; kandi omuti ki omuti oguta-amia ensaafu endootu guuza okutemwao nikwo gurigizwe mu omurro.”

¹⁰Omurima ogwo gwamuwuuzia otino, “Katio tusugaane tukoleki?”