Luka 3:3-10

³Ŋac tau tonaŋ gêjac laoc gamêŋ Jordanŋa samob ma gêjam mêtê lau gebe “Anam taôm ôkwi to aliŋ saŋgu, ma Anôtô êsuc nêm sec ôkwi.”

⁴Biŋ tonaŋ kêtôm biŋ, taŋ propete Jesaia keto kêsêp nê buku gebe “Ŋac teŋ gêmôêc awa tonec gêmoa gamêŋ sawa gebe ‘Amansaŋ gamêŋ Apômtau esêlê a to amêtôc ênê intêna êtu solop.

⁵Sênsuŋ gaboaŋ samob auc to senseŋ lôc to gamêŋ ŋabau êtu tapa ma sêmêtôc ŋapoalic samob êtu solop to sêmansaŋ intêna kaloŋ-kaloŋ ŋatip êsa.

⁶Ma ŋamalac samob sêlic Anôtônê lêŋ ênam ŋamalac kêsiŋa.’”

⁷Lau taêsam dêdêŋ eŋ sêja sebe sêliŋ ênê saŋgu. Eŋ kêsôm gêdêŋ êsêac gebe “Moac ŋalatu amac, asa gêwa sa gêdêŋ amac gebe awê Anôtônê têtac ŋandaŋ, taŋ mêŋêsa naŋ sa.

⁸Anam ŋanô êwa amac sa gebe ajam taôm ôkwiŋa acgom. Ma asôm êndêŋ taôm gebe ‘Abraham kêtu aêac tameŋi,’ nec atom. Aê jasôm êndêŋ amac gebe Anôtô kêtôm gebe êŋu poc tonec ŋai sa têtu Abrahamnê latui.

⁹Ki ŋamata gêdêŋ kawakac tec gêc. Amboac tonaŋ ka samob, taŋ sêjam ŋanô ŋajam atom naŋ, oc êsap su ma êmbaliŋ êpi ja êna.”

¹⁰Ma lau samob sêjam kênac Joaŋ gebe “Aêac oc aŋgôm amboac ondocgeŋ.”