Kiitisae 5

1

2

3

4

5

6

7

8

9

10

11

12

13

14

15

16

17

18

19

20

21

¹Na lɔxɔɛ, Abinowami xa di Baraki nun Debora naxa yi bɛɛti ba:

²«Alatala tantu! Isirayila sɛnbɛmae bara keli. Ɲama fan bara tin na gere ra.

³Mangɛe, mangɛdie, wo wo tuli mati a fanyi ra. N tan bɛɛti bama nɛ, n a bama Alatala nan bɛ. N xa Isirayila Marigi Alatala binya bɛɛti ra.

⁴Alatala, i to keli Seyiri, Edonkae xa bɔxi ma, bɔxi naxa sɛrɛn, koore nuxui naxa tunɛ ragoro.

⁵Geyae naxa xɔyɔ Alatala ya i, yi Turusinina geya fan naxa sɛrɛn Isirayila Marigi Alatala ya i.

⁶Yayeli nun Anati xa di Samagari waxati, mixi mu nu nɔma biyaaside muɲɛtie xa fe ra.

⁷Isirayilakae mu nu nɔma lude daaxae sɔnɔn, e birin naxa keli naa, han n tan Debora minixi tɛmui naxɛ. N bara findi Isirayila nga ra.

⁸E nu bara ala nɛɛnɛe batu fɔlɔ. Gere nu bara fa han taa naadɛe ra, sɔɔri makantase nun tanbɛ yo mu nu na Isirayilaka mixi wulu tongo naani yi ra.»

⁹«Alatala tantu! N bɔɲɛ na Isirayila mangɛe nun ɲama fɔxɔ ra, naxee e yɛtɛ ɲanigexi.

¹⁰Wo tan naxee tema sofale ginɛ fiixɛe fari, wo tan naxee dɔxɔma dugi fanyi fari, wo tan naxee ɲɛrɛma kira ra, wo wo maɲɔxun.

¹¹Naxee ye bama kɔlɔnyi ra, e Alatala tantuma a xa fe fanyie ma. Alatala fe fanyi raba nɛ Isirayila bɛ, a xa ɲama tixi taa sode dɛ ra tɛmui naxɛ.»

¹²«Debora, xunu! Xunu, i xa bɛɛti ba. Abinowami xa di Baraki, keli! I xa yaxuie xanin.

¹³Alatala naxa xunnakeli fi a xa ɲama fanyi ma, a naxa n xun nakeli sɛnbɛmae tagi.

¹⁴Efiramikae naxa fa, naxee kelixi Amalɛkikae xa bɔxi ma, Bunyaminkae naxa bira e fɔxɔ ra. Makiri mangɛe fan naxa goro, a nun Sabulon yareratie.

¹⁵Isakari mangɛe naxa lu Debora sɛɛti ma. E naxa Baraki mali, e goro geya bunyi, kɔnɔ Rubenkae tan naxa wɔyɛn han.

¹⁶Wo luxi wo xa xurusee tagi munfe ra, wo nu fa wo tuli mati e wa xui ra? Rubenkae tan fo wɔyɛnyi ɲɔntare.

¹⁷Galadikae fan naxa lu Yurudɛn naakiri ma. Danakae lu e xa kunkuie fɛ ma munfe ra? Aserikae fan naxa lu wafu ra, baa dɛ.

¹⁸Sabulonkae tan naxa ti faxɛ ya i. Nafatalikae fan naxa suusa gere ra.»

¹⁹«Mangɛe naxa fa. Kanaan mangɛe naxa fa gere sode Taanaki, Megido xure dɛ ra, kɔnɔ e mu harige nun gbeti yo sɔtɔ na kui.

²⁰Koore naxa gere so, tunbuie naxa Sisera gere.

²¹Kison xure fori naxa e xanin. N bɔɲɛ xa sɛnbɛ so, n xa siga yare!

²²Na tɛmui, sɔɔrie naxa e xa soe ragi. E naxa e xulun, e gbataxi.

²³Alatala xa malekɛ naxa a fala, ‹Wo xa Merosi danka. Wo xa Merosikae birin danka. E mu nu biraxi Alatala fɔxɔ ra sɛnbɛmae tagi.›»

²⁴«Yayeli barakatɔɛ ginɛ nan a ra, Heberi Kenika xa ginɛ. Barakatɔɛ belebele nan a ra ginɛe tagi, naxee sabatixi kiri banxi kui.

²⁵Sisera to ye makula, a naxa xiɲɛ fi a ma. A naxa xiɲɛ fanyi so a yi ra pɔɔti tofanyi kui.

²⁶Kiri banxi mabanban wuri suxuxi a yi, dɛrɛma fan na a yirefanyi bɛlɛxɛ. A naxa a banban Sisera xunyi, a xunyi naxa bɔɔ.

²⁷Sisera xa fe naxa dan Yayeli bun ma, a saxi bɔxi, a naxa faxa. Sisera xa fe naxa dan Yayeli bun ma, a saxi bɔxi, a naxa faxa.»

²⁸«Sisera nga tixi wundɛri ra, a a falama, ‹Munfe ra a ragise mu nu fa sinden? Munfe ra a sɔɔri ragisee buxi fade?›

²⁹A xa lɔnnilae naxa a yaabi yi wɔyɛnyi ra,

³⁰‹Tɛmunde e mu na e harige see xa tongofe? E mu na nee xa itaxunfe? Ginɛ keren sɔɔri keren, xa na mu a ra sɔɔri keren, ginɛ firin. E e wasaso se maɲingixie ra naxee nu rafan Sisera ma, e e wasaso donma maɲingi dinxie ra. Donma maɲingixi keren, donma dinxi firin, xunnakeli kanyi xa na sɔtɔ.›

³¹Alatala, i yaxuie birin xa halaki na ki nɛ, kɔnɔ i xanuntenyie xa yanba alɔ soge itexi.» Na dangi xanbi, bɔxi naxa lu xaxilisa kui ɲɛ tongo naani.