1Ipan nopa tonali Débora ihuaya Barac, catli eliyaya icone nopa Abinoam, quej ni huicaque:
2“Ma tijhueyichihuaca TOTECO pampa nopa tlayacanca israelitame moneltlalijque, huan nopa israelitame nimantzi motemacaque para tlahuilanatij.
3Techtlacaquilica, antlanahuatiani huan amojuanti catli anquihuicaj tequiticayotl, huan na nijhuicatis TOTECO, yaya catli toDios tiisraelitame. Quena, yaya nijhuicatis huan nijhueyitlalis.
4TOTECO, quema ta tiquisqui ipan Seir huan tinejnentiyajqui ipan tlali Edom, molini tlali huan tlen nopa mixtli ipan ilhuicactli tlaquiyajqui chicahuac.
5Nopa tepeme huihuipicaque moixpa TOTECO, ta catli techmocuitlahuía titlali Israel ehuani. Quena, tepetl Sinaí nojquiya huihuipicac moixpa.
6Ipan nopa tonali quema noja itztoya Samgar, icone Anat, hasta quema itztoya Jael, nochi israelitame quicajtejque nochi huejhueyi ojme huan ayacmo nejnenque nopona pampa momajmatiyayaj para quintlachtequilise. San quitoquilijque pilojtzitzi catli huijcoltic para motlatijtiyase.
7Nochi paquilistli tlantoya huan niyon se israelita amo itztoya ica yejyectzi hasta na, niDébora, nimotlananqui quen nieliyaya ininnana israelitame.
8Israelitame quinhueyichihuayayaj tlaixcopincayome catli amo Dios. Nochi sequinoc altepetl ehuani techhuilanque hasta topuertaj teno. Nopa fiero tlacame catli technahuatiyayaj amo techcahuiliyayaj ma tijpiyaca niyon se totepostzajca o tepostli catli ica timomanahuisquíaj. Amo oncac niyon se ipan 40 mil israelitame.
9Nelía nipaqui ica antlanahuatiani ipan tlali Israel. Nijtlascamati TOTECO por amojuanti. Anyajque ipan tlahuilanalistli ica nochi amoyolo. Ma tijhueyichihuaca TOTECO.
10Nochi tiisraelitame ma tijhueyichihuaca TOTECO. Nochi catli ricos huan catli tlejcoj ipan burrojme chipahuaque, huan catli mosehuíaj campa tlatzotzoltic ma paquica. Huan nojquiya ma huicaca nochi catli teicneltzitzi huan monequi nejnemise. Nochi ma tihuicaca ica tlascamatili.
11Inijuanti catli quimatij tlahuilanaj sempa mosentilíaj campa ameli ininhuaya catli quinamacaj ininborregojhua. Nopona nopa soldados catli tlatlantoque tepohuilíaj quenicatza nelía hueyi catli TOTECO quinchihuili, masque san teicneltzitzi. TOTECO quichijqui para tiisraelitame ma titlatlanica tlahuel. Huan huajca ama nochi tiisraelitame, tojuanti catli tiimasehualhua TOTECO, sempa timosehuíaj campa puerta huan tiitztoque ica yejyectzi.
12Xiisa Débora. Xiisa huan xihuica se huicatl. Huan ta Barac, tiicone Abinoam, ximotlanana. Xiquinhuica nopa masehualme catli tiquinitzquijtoc ipan tlahuilancayotl. Ma mitztequipanotij.
13Temoque nopa israelita tlacame catli motemacayayaj. Yajque mohuilanatoj ininhuaya inincualancaitacahua. Nopa tlacame catli iaxcahua TOTECO motecpanque huan yajque, masque amo nesiyaya sintla huelis tlatlanise.
14Hualajque israelita tlacame tlen tlali Efraín campa nopa amalecitame achtihui itztoyaj. Huan quintoquilijtiyajque isoldados tlen nopa hueyi familia Benjamín. Nopa tlanahuatijca israelitame hualajque tlen itlal Maquir. Tlacame tlen nopa hueyi familia Zabulón hualtemoque.
15Nojquiya nopa tequitini huan soldados tlen nopa hueyi familia Isacar temoque hasta nopa tlamayamitl ihuaya Débora. Huan iteipan ixhuihua Isacar quipalehuijque Débora huan Barac quipalehui nojquiya. Quena, moisihuiltijque para tlapalehuise. Pero iixhuihua Rubén amo yajque.
16¿Para tlen mocajque ininchaj iixhuihua Rubén campa tzactoque ininborregojhua? ¿Huelis san quintlacaquiliyayaj nopa tlamocuitlahuiani quema quinnotzayayaj inintlapiyalhua ica tlapitztli? Iixhuihua Rubén amo pajca itztoque para amo yajque.
17Iixhuihua Galaad mocajque ne seyoc inaliyo Jordán huan iixhuihua Dan mocajque campa nopa barcos. Iixhuihua Aser mocajque iteno hueyi atl huan amo mijcuinijque campa itztoyaj. San mosiyajquetzayayaj.
18Pero iixhuihua Zabulón ihuaya Neftalí, inijuanti, quena. Yajque tlahuilanatoj huan amo quichihuilijque cuenta sintla miquisquíaj.
19Huajca nopa tlanahuatiani tlen cananeos hualajque tlahuilanacoj nechca altepetl Taanac campa pehua nopa atl tlen altepetl Meguido. Pero amo tleno quitlanque. Amo quihuicaque niyon se tomi.
20TOTECO huan nochi sitlalime ipan ilhuicactli techpalehuijque para tijtlanise Sísara.
21Elqui quej nopa atlajtli Cisón tlejcoc miyac huan nochi quinhuicac. Quena, quinhuahuatatzqui nochi ininmijcatzitzi. (Ma quipiya fuerza noyolo para nijtlamiltis ni nohuica.)
22Huajca caquistic nopa cahuayo tecactli pampa motlalojtiyajque. Masque tlahuel motemacayayaj nopa soldados ipan inincahuayos, quistejque ica majmajtli.
23Itequihua TOTECO quiijto: ‘Xiquintelchihua catli ehuaj Meroz.’ Ma itztoca senquistoc tlatelchihualme catli nopona itztoque, pampa amo hualajque quipalehuicoj TOTECO para quinhuilanase icualancaitacahua catli nelía elque tejtetique.
24Pero niquijtohua tlahuel xijtiochihua nopa sihuatl Jael, isihua Heber, nopa quenita. Más ma quitiochihua Jael que nochi sihuame catli mocahuaj ipan yoyon calme.
25Sísara quitlajtlani atl huan Jael quimacac lechi. Ipan se taza catli yejyectzi, quimacac crema.
26Ica se imax quicuic nopa cuaestaca huan ica inejmac quicuic se martillo catli ica quimaquili Sísara ipan itzonteco. Quicuacoyoni huan panoc ipan itzonteco nopa cuaestaca.
27Huan nopona campa huetztoya, mijqui. Quena, iicxitla Jael huetztoya huan nopona mijqui.
28Inana Sísara motequipachohuayaya huan tlachiyayaya ipan ventana para quiitas sintla huala. Moilhuiyaya: ¿Para tlen amo huala Sísara ica icarro? ¿Para tlen icarro huejcahua huan amo caquisti para huala ica cahuayo tecactli?
29Huan inana moilhuiyaya para melahuac catli isihua tequipanojcahua catli más tlalnamiquij quiilhuiyayaj. Inijuanti quiilhuiyayaj:
30‘Huelis miyac tlamantli mocuilijque quema tlatlanque, huan ama nochi moajachihuíaj. Huelis sesen soldado quitocaros se o ome ichpocame huan Sísara quitocaros nopa yoyomitl catli más yejyectzi ica miyac colores. Huelis nechhualiquilis miyac tlamantli catli yejyectzi tlajtzontli. Huan catli más yejyectzi tlaijilpili mocahuas para moquechcostis iquechtla ya.’
31TOTECO, nochi mocualancaitacahua ma miquica, pero masehualme catli mitzhueyichihuaj ma elica quej nopa tonati quema quisa ica nochi ichicahualis.” Quej nopa huicayayaj Débora ihuaya Barac. Huan teipa nopa israelitame quipixque tlasehuilistli ipan nopa tlali para 40 xihuitl.
