Juan 13:2-25

²Xopon kꞌu rubꞌenebꞌal qꞌij echiriꞌ ri Jesús kukꞌ rutijoꞌn e riꞌ kewaꞌik. Jun kꞌu chike e ri Judas aj Iscariot rukꞌajol ri Simón. Yey kojom chi pa ranimaꞌ ruma ritzel winaq kukꞌayij ri Jesús.

³Ekꞌu ri Jesús retaꞌam yaꞌtal ronoje puqꞌabꞌ ruma Ruqaw, yey Rire petinaq rukꞌ ri Dios y rukꞌ ri Dios katzelej wi.

⁴Na rukꞌ ta kꞌu riꞌ, ri Jesús xyaktajik, xresaj ruqꞌuꞌ uripom chirij, xukꞌam jun twayo puqꞌabꞌ y xuxim chupa.

⁵Tekꞌuchiriꞌ xuqꞌej yaꞌ pa jun kꞌolibꞌal, xujeq uchꞌajik ri kaqan rutijoꞌn y kuchaqisaj rukꞌ ri twayo uximom chupa.

⁶Echiriꞌ kujeq uchꞌajik ri raqan ri Pedro, rire jewaꞌ xubꞌiꞌij che ri Jesús: —Wajawal, ¿kachꞌaj kami la riꞌ ri waqan? —xchaꞌ.

⁷Ri Jesús xukꞌul uwach: —Woꞌora na kamaj ta usukꞌ saꞌ wa kintajin che uꞌanik; kꞌate na kꞌu riꞌ kamaj usukꞌ —xchaꞌ.

⁸Ekꞌu ri Pedro xubꞌiꞌij che: —Riꞌin na kanya ta kꞌana luwar cheꞌla kachꞌaj la ri waqan —xchaꞌ. Ri Jesús xubꞌiꞌij che: —We na kanchꞌaj ta laꞌ waqan, riꞌ na jinta chi awe wukꞌ riꞌin —xchaꞌ.

⁹Xubꞌiꞌij kꞌu ri Pedro che: —We e riꞌ, Wajawal, na xew tane ri waqan kachꞌaj la; chꞌaja ne la riꞌ ri nuqꞌabꞌ y ri nujolom —xchaꞌ.

¹⁰Ri Jesús jewaꞌ xubꞌiꞌij che: —E junoq kꞌakꞌ atininaq, xew kajawaxik kachꞌajiꞌ ri raqan, ma ronoje rucuerpo chꞌajtal chik. Jekꞌulaꞌ riꞌix chwach ri Dios ix chi chꞌajtalik, tobꞌ na iwonoje taj —xchaꞌ.

¹¹Ri Jesús retaꞌam chik china ri kakꞌayin re; e uwariꞌche xubꞌiꞌij: “Na iwonoje taj ix chꞌajtalik.”

¹²Echiriꞌ xukꞌis uchꞌajik ri kaqan rutijoꞌn, xurip tanchi ruqꞌuꞌ chirij, xtzꞌuyiꞌ tanchi chwa ri mexa y xutzꞌonoj chike: —¿Kimaj usukꞌ saꞌ keꞌelawi wa xinꞌan chiwe?

¹³Riꞌix kibꞌiꞌij chwe: “Tijonel” y “Qajawal” y qatzij ri kibꞌiꞌij, ma lik e uꞌanom riꞌ.

¹⁴We in kꞌu Itijonel riꞌ yey in Iwajawal y xinchꞌaj kꞌu liꞌwaqan, jekꞌulaꞌ riꞌ chiꞌana riꞌix; chichꞌaja kꞌu liꞌwaqan chiwach riꞌix chiwibꞌil iwibꞌ.

¹⁵Riꞌin xinꞌan waꞌ re kꞌutubꞌal chiwach, chaꞌ riꞌix jelaꞌ kiꞌano pachaꞌ ri xinꞌan riꞌin.

¹⁶Paqatzij wi kambꞌiꞌij chiwe: Na jinta juna aj chak más kꞌo uwach chwa ri rajaw, yey na jinta ne juna taqoꞌn más kꞌo uwach chwa ri taqayom lo re.

¹⁷We kimaj usukꞌ taq waꞌ y kitijoj iwibꞌ che uꞌanik, nim iqꞌij iwalaxik riꞌ.

¹⁸»Pero na kinchꞌaꞌt ta piwiꞌ iwonoje, ma riꞌin wetaꞌam china ri ebꞌenuchaꞌom. Yey e kuꞌana na ri tzꞌibꞌital kan pa Ruchꞌaꞌtem ri Dios, pa kubꞌiꞌij wi: E ri jun kawaꞌ junam wukꞌ, e riꞌ ri yaktajinaq chwij.

¹⁹Kintajin kꞌu pan che ubꞌiꞌxikil chiwe woꞌora chaꞌ echiriꞌ kuꞌana waꞌ, riꞌix kikojo: “In Riꞌin.”

²⁰Paqatzij wi kambꞌiꞌij chiwe: China ri kakꞌuluw re ri kantaq bꞌi riꞌin, e junam rukꞌ in ri kinukꞌulu; yey china kꞌu ri kakꞌuluw we riꞌin, e kukꞌul ri Jun taqayom lo we —xchaꞌ.

²¹Echiriꞌ xukꞌis ubꞌiꞌxikil waꞌ, ri Jesús xok bꞌis chukꞌuꞌx y jewaꞌ xubꞌiꞌij: —Paqatzij wi kambꞌiꞌij chiwe: Jun chiwe riꞌix kinukꞌayij —xchaꞌ.

²²Ekꞌuchiriꞌ, rutijoꞌn xkijeq kakitzulaꞌ kiwach chikibꞌil kibꞌ ma na ketaꞌam taj china ri xubꞌiꞌij.

²³Kꞌo kꞌu jun chike rutijoꞌn, waꞌ e ri lik kꞌax kanaꞌ ruma ri Jesús, kawaꞌik jaꞌl putzal Rire chwa ri mexa.

²⁴Ekꞌu ri Simón Pedro xuꞌan pan uqꞌabꞌ che chaꞌ kutzꞌonoj che ri Jesús china ri kubꞌiꞌij.

²⁵Y ri jun tijoꞌn jaꞌl putzal ri Jesús xutzꞌonoj kꞌu che: —Wajawal, ¿china laꞌ la kabꞌiꞌij la? —xchaꞌ.