SAN JUAN 13:2-25

²Chay diya amusayaptin Jesuska ñukaykunawan mikuykarkan. Satanas ñami Jesuspa disipulun Judas Iskarioteta yuyachirkanna Jesusta rantikunanpa.

³Jesuska allita yacharkan kay allpaman Tatan Dios kachamushkanta tukuy layapi kamachikunanpa. Yacharkan Tata Diosmanta shamushkanta kashkan payman kutinanta.

⁴Chaypina Jesus ñukaykunawan tantalla mikuykashpa atarirkan. Kapanta surkukushpa sinturanpi suk atun towallata watarkan.

⁵Chaymanta atun kallanapi yakuta churashpa kallarirkan ñukaykunapa chakinikunata mayllayta. Sinturanpi watadu towallawan chakinikunata chakichiparkansapa.

⁶Chaypina Simon Pedru mana munashpa chakinta mayllapunanpa willarkan: —Maestru ¿ñukapa chakinitachu mayllanayanki?

⁷Chashna willaptinna Jesuska aynirkan: —Kunanka manara yachankirachu imapami chakikita mayllaykani nishpa. Suk ratukaman allita yachanki.

⁸Chaypina Pedruka willarkan: —Manami nima layapi munanichu chakinita mayllanaykipa. Chashna Pedru willaptinna Jesuska aynirkan: —Mana chakikita mayllanaynipa munashpaykika mana ñukapa disipuluynichu kanki.

⁹Chaypina Simon Pedru willarkan: —Chashna kaptinka ama chakinillata mayllaychu. Makinitapish umaynitapish mayllapay.

¹⁰Chaypina Jesuska aynirkan: —Chayrak armakudu runa chuya chuya kaptin chakinllatana mayllanan tiyan. Yaka tukuy kankuna chuya chuya armakudushina kankichi. Kankunamanta sukllalla manara armakudushinarachu.

¹¹Chashna Jesus willawashpankuna allita yacharkan maykan disipulunmi rantikunka nishpa.

¹²Chaymanta ñukaykunapa chakinikunata mayllashkanwasha Jesuska kapanta kashkan churakurkan. Chaymanta tiyarishpa willawarkansapa: —¿Yachankichichu imapami chakikichita mayllashkani?

¹³Kankunaka “Maestru” niwankichi. Kankunata kamachiptini “Señor” niwankichi. Ñukaka deverasmi Maestruykichi Señornikichi kani.

¹⁴Ñuka Maestruykichi Señornikichi kashpayni chakikichita mayllashkani. Ñukashina kankunapish sukpa sukpa chakikichita mayllaychi.

¹⁵Ñukaka kankunata yanapashkaynishina kankunapish sukwan sukwan yanapanakuychi maylladushina kanaykichipa.

¹⁶Allita willaykichi. Suk wiwachu wiwaknin runata kasunan tiyan. Suk kachadu runa kamachikukninta kasunan tiyan.

¹⁷Kay yachachikushkaynita entiendishpaykichi chayta allita rurashpa kawsashpaykichika sukaman kushikuypuru kawsankichi.

¹⁸Mana tukuy kankunapachu rimaykani. Ñukaka kankunata akllashpayni allita yachani kankunamanta tiyananta suk rantikuwak runa. Tata Diospa killkadu rimananpi willawanchi: “Ñukawan tantalla mikuk runa chikniwak runa tukushka.” Tata Dios rimashkanshina chay chikniwak runa rantikuwanka.

¹⁹Chayta ñami willashkaykichina chay runa rantikuwaptin yachanaykichipa ñuka Tata Diosmanta shamudu runa kanaynita.

²⁰Allita willaykichi. Ñuka kankunata kachaykichi rimanaynita yachachikunaykichipa. Chashna kachaptini tukuy kankunata chaskishuknikichi runakuna ñukatapish chaskiwaykansapa. Ñukata chaskiwak runakuna kachamuwashkan Tatayni Diostapish chaskiykansapa.

²¹Chayta rimashkanwasha Jesuska tukuy shunku sukaman llakishpa ñukaykunata willawarkansapa: —Kunan allita willaykichi. Kankunamanta suk disipuluynika chikniwak runakunapi rantikuwanka.

²²Chashna Jesus willawaptinkuna ñukaykuna manchakushpa sukwan sukwan chapanakurkanisapa. Mana yacharkanisapachu maykan ñukaykunapami rimaykan nishpa.

²³Chaypina ñuka Juan Jesus kuyashkan disipulun kashpayni ladunpi mikuykarkani.

²⁴Simon Pedruka señaspi willawarkan Jesusta tapunaynipa pipami rimashka nishpa.

²⁵Chaypina Jesusta ashwanta serkashpa tapurkani: —Maestru ¿ñukaykunamanta maykantí rantikushunka?