ዮሃኒሳ 13:2-25 - Ooratha Caaquwaa

ዮሃኒሳ 13:2-25

Click on verse(s) to share them!

²ዬሱሲኔ ካሊያዋንቱ ካዉዋ ሚሺን፥ ሲሞና ናዓ ዪሁዳ ኣስቆሮቱ ዬሱሳ ኣꬂ ኢማናዳን፥ ፃላሂ ኣ ቆፊሲ ዎꬄዳ።

³ዬሱሲ ባሬ ኣዉ ኡባባ ኣ ኩሺያን ዎꬄዳዋ፥ ቃሲ ፆሳ ማታፔ ኢ ዬዳዋኔ፥ ሲሚዴ ኣኮ ባናዋ ኤሬዳ።

⁴ዬሱሲ ሚያሳፔ ዴንዲ ኤቂዴ፥ ቦላ ባጋ ማዩዋ ቃሪ ዎꬂዴ፥ ፖፃ ባሬ ፄሳን ዳንጬዳ።

⁵ሄዋፔ ጉዪያን፥ ሃꬃ ሜቻ ሚሻን ቲጊዴ፥ ባሬና ካሊያዋንቱ ጌዲያ ሜቻኔ ባሬ ፄሳን ዳንጬዳ ፖፃን ቁጩሳ ዶሜዳ።

⁶ዬሱሲ ሲሞኒ ጴፂሮሳኮ ዪና ጴፂሮሴ፥ «ጎዳው፥ ኔኒ ታ ጌዲያ ሜጫናው ሃናዪዬ?» ያጌዳ።

⁷ዬሱሲ ዛሪዴ ኣ፥ «ታኒ ኦꬂያዋ ኔኒ ሃዒ ኤራካ፤ ሺን ጉዬፔ ኤራናሳ» ያጌዳ።

⁸ጴፂሮሴ፥ «ኔኒ ታ ጌዲያ ኡባካ ሜጫካ!» ያጌዳ። ዬሱሲ ኣ፥ «ታኒ ኔ ጌዲያ ሜጫና ꬋዮፔ፥ ኔዉኔ ታዉኔ ኢቲፔቴꬃይ ባዋ» ያጊዴ ዛሬዳ።

⁹ሲሞና ጴፂሮሴ ዬሱሳ፥ «ጎዳው፥ ያቶፔ፥ ታ ጌዲያ ፃላላ ሜጮፓ፤ ታ ኩሺያካ ታ ሁጲያካ ሜጫ!» ያጌዳ።

¹⁰ዬሱሲ ዛሪዴ፥ «ቦላ ሜጬቲዲጌዳ ኡራይ ኦኒኔ ጌዲያፔ ሃራባ ሜጬታናው ኮሼና፤ ኣው ኡባሳይካ ጌሻ። ቃሲ ሂንቴንቱካ ጌሻ፤ ሺን ኡባይ ጌሻ ጊዲኪታ» ያጌዳ።

¹¹ኣዪሲ ጎፔ፥ ዬሱሲ ባሬና ኣꬂ ኢማና ኡራይ ኦኔንቶኔ ኤሬዳ፤ ኢ፥ «ሂንቴንቱ ኡባይ ጌሻ ጊዲኪታ» ጌዳዌ ሃዋሳ።

¹²ኡንቱንቱ ጌዲያ ሜጬዳዋፔ ጉዪያን፥ ዬሱሲ ባሬ ማዩዋ ማዪዴ፥ ባሬሳ ጉዬ ሲሚ ቢ ኡቲዴ ኡንቱንታ ያጌዳ፤ «ታኒ ሂንቴንቱሲ ኦꬄዳዋ ኣኬኪቴ?

¹³ሂንቴንቱ ታና፥ ታማሪሲያዎኔ ጎዳው ጊታ፤ ታኒ ሄ ሂንቴንቱ ጊያዋ ጊዲያ ዲራው፥ ሎይꬄዲታ።

¹⁴ታኒ ሂንቴንቱሲ ጎዳኔ ሂንቴንታ ታማሪሲያዋ ጊዳዴ፥ ሂንቴንቱ ጌዲያ ሜጪያዋ ጊዶፔ፥ ሂንቴንቱካ ኢቱ ኢቱዋ ጌዲያ ሜጫናው ቤሴ።

¹⁵ኣዪሲ ጎፔ፥ ታኒ ሂንቴንቱሲ ኦꬄዳዋዳን፥ ሂንቴንቱካ ኦꬃና ማላ፥ ሂንቴንቱሲ ሌሚሱዋ ጊዳዲ።

¹⁶ታኒ ሂንቴንቱሲ ቱሙዋ ኦዳይ፤ ቆማይ ባሬ ጎዳፔ ኣꬌና። ቃሲ ኪቴቴዳ ኡራይካ ባሬና ኪቴዳዋፔ ኣꬌና።

¹⁷ሂንቴንቱ ሄዋ ኤሪዴ ኦꬂያዋ ጊዶፔ ኣንጄቴዳዋንታ።

¹⁸«ታኒ ሂንቴንቶ ኡባባ ሃሳዪኬ። ታኒ ዶሬዳዋንታ ኤራይ፤ ሺን ፆሳ ማፃፋይ፥ ‹ታኒ ባርሴዳዌ ታ ኩሺያ ሳዔዳ› ጌዳዌ ቱማ ጊዳናው ቤሴ።

¹⁹ሄዌ ሃኒያ ዎዴ ታኒ ታና ጊዲያዋ ሂንቴንቱ ኣማናና ማላ፥ ሄዌ ሃናናፔ ካሴታዴ ሂንቴንቱሲ ሃናናዋ ኦዳይ።

²⁰ታኒ ሂንቴንቱሲ ቱሙዋ ኦዳይ፤ ታኒ ኪቲያ ኦናኔ ሞኪያ ኡራይ ታናካ ሞኬ፤ ቃሲ ታና ሞኪያ ኦኒኔ ታና ኪቴዳዋ ሞኬ» ያጌዳ።

²¹ዬሱሲ ሄዋ ሃሳዬዳዋፔ ጉዪያን፥ ባሬ ዎዛናን ዳሮ ሜቶቲዴ፥ «ታኒ ሂንቴንቱሲ ቱሙዋ ኦዳይ፤ ታና ሂንቴፔ ኢቱ ኣꬂ ኢማናዋ» ጊዴ ቆንጪያን ኦዴዳ።

²²ኢ ኦና ሃሳዪንቶኔ፥ ካሊያዋንቱሲ ኡባካ ኤሬቴናን ኢፂና፥ ኢቱ ኢቱዋ ፄሌዲኖ።

²³ዬሱሳ ካሊያዋንቱፔ ኢቱ፥ ዬሱሲ ሲቂያዌ፥ ዬሱሳ ማታን ኡቴዳ።

²⁴ሄዋ ዲራው፥ ሲሞና ጴፂሮሴ ሄ ካሊያዋ ሲሚዒዴ፥ «ኢ ኦና ጊንቶ፥ ኣኔ ኣ ኦቻ» ያጌዳ።

²⁵ሄዋ ዲራው፥ ሄ ካሊያዌ ዬሱሳ ሃይꬃኮ ሺቂዴ፥ «ጎዳው፥ ኢ ኦኔ?» ያጌዳ።