Yaahaya 13:2-25

²Wakathi wa etthu-yoojiwa ya osikhu, sheethwani aarettiye ahatiye rooho ya Yuuda Eshikariyoote mwaana wa Simawu, yoori anzukuluwele,

³Yinsa aajuwiye yoori Paapa vitthu zooshi attha mmakhono mwawe, na alankhiye wa Nluku na aari orutela wa Nluku,

⁴khulankhavo vameeza aphale, khuvula ajapi yawe khuthuula epakuso khujifukelela n'yuunu.

⁵Khuttha maati mpasiya khwaaza woosa moolu a anakhiyoni awe awaapakusaka na epakuso etile aafukeleliyeeyo n'yuunu mwawe.

⁶Khufiya zwaamu ya Simawu Pheeturu, othuuto aamuziyeeyo yoori: “Mbwana, ontakha woose moolu aka?”

⁷Yinsa khunjipu yoori: “Eti kinrettaaye apha nasaapi khiniweeleya; ila owulu-othana enteela oweeleya.”

⁸Pheeturu khulupa yoori: “Wala! Khinretteya weeyo woosa moolu aka.” Yinsa khunjipu araka: “Miiyo amana kihiwoosi, weeyo khunteela wiiyana phantte na-miyo.”

⁹Simawu Pheeturu khulupa yoori: “Mbwana, khayi moolu aka paasi na theenya na makhono aka na eeshwa yaka!”

¹⁰Yinsa khujipu: “Ntthu owiyeeyo eninhithajiya woosa moolu paasi, maana mwiili awe wooshi pi woottakattha. Mweeyo mwa oottakattha, ila khahi mooshi.”

¹¹Maana ye aari onjuwa ntthu aari weettelaaye onzukuluwela; ti eto aalupiyeeyo yoori: “Khayi mooshi mwiiyiyeeyo oottakattha.”

¹²Paata ya wiisha owoosa moolu, khuthuula ajapi yawe khuwala khurutela aphale eekhaliyeevo. Aphano khuwoozela yoori: “Eniweeleyani vitthu epi khuuretteliyeenini?

¹³Mweeyo mwikiitthaka miiyo mwinri ‘Mwaaliimu’ na ‘Mbwana,’ mwina shariya, miiyo ki othuuto.

¹⁴Aayo, pi etthiipo miiyo kiiyiye Mbwana na Mwaaliimu enu, kawoosani moolu, na-mweyo theenya mwina ya woosana moolu mmote na nzaawe.

¹⁵Miiyo kawinkhani nthoonyezo yoori etthiipi kirettiyeezo na-mweyo mwisala mwiretta etthiipi.

¹⁶Miiyo kiniwuuzani khweele yoori, khaavo karumeya wonziti mbwana awe, nkhama etthiipo nanhupi khaninziti otule anrumiyeeyo.

¹⁷Nkhama mwinjuwa vitthu zaya epo, amana mwiretta, mwaparikhiyiwa.

¹⁸Akinuulupani mooshi, kiniwaajuwa apale kiwaathawuliyeeyo. Ila epo enttela orettikhana yoori emariseleye epile zilupiyeeyo zawaatikhiwa ttakatthiifu, yoori: “Othuuto kimeelaniyeeyo phaawu yaka akizukuluwela.”

¹⁹Kinaaza nasaapi ethiiti owuuzani ehinarettikhane, yoori amana erettikhanaka mweeyo mwikhupali yoori Miiyo Ti Miiyo.

²⁰Miiyo kiniwuuzani khweele yoori: Otule animpokherelaaye otule kininrumaaye onikipokherela miiyo; na anikipokherelaaye, onimpokherela otule akirumiyeeyo.”

²¹Paata ya olupa toowo, rooho yawe khwiiya yawaantipweya, khutukhuru alupaka yoori: “Miiyo kiniwuuzani khweele yoori, ntthu mmote wa mweeyo onlawa akizukuluwele.”

²²Anakhiyoni khusala eekesana mmote na nzaawe ahinjuwaka paani aninlupaaye.

²³Mpavu mwawe eekhaliyemu nakhiyoni mmote otule aari omphetachaaye.

²⁴Simawu Pheeturu khunttheela alama nakhiyoni othuutule; yoori amuuzele Yinsa anlupe oto ari weettelaaye onzukuluwela.

²⁵Aphano nakhiyoni otule khwiinamela vamweyo wa Yinsa khumuuzela yoori: “Mbwana, paani oto aya?”