Jon 13:2-25

²Aunbiing ri ien na efef ae, Satan ka susuef ulo Iudas Iskariot kalalik ke Saimon, isi in ta ufu Iesu una liman foron tuui.

³Iesu ka usum tah le, Tama ka luun ta foron tier tikii na piklin rakrakai kia, ma God tom i tule ta u uga ke in fis sabin usuf God.

⁴Pesu ka aptih tina tel inen ae, ka tel ufu kolos kia tina maleh lo, ma ka fis taol awii na lifa.

⁵Namih, ka to dan una nenge tara na luunluun dan, ke ka sufe keken berberat na fafausum kia, ma ka salis fasengseng kekri ini taol ae i fis ta u na lifa.

⁶Iesu ka la usuf Saimon Pita, ke Pita ka tara sing i aragii, “Kumguui, on sufe kekeng sabin?”

⁷Iesu ka kiliis u aragii, “Biil o usum na sanih ia tel u igii, isau le namih mang on usum.”

⁸Pita ka tara sing i aragii, “Biil. Gong o sufe kekeng.” Ke Iesu ka kiliis u aragii, “Male biil ian sufe iun kekem, ke biil mang on tapiek kalalik na fafausum kiak.”

⁹Pita ka tara aragii, “Kumguui, biil iun kekeng sau, sufe iun limang ke paklung sabin.”

¹⁰Iesu ka kiliis u aragii, “Kaltu ae ka susuh tah, ka fuuh ta e fo, ma biil mang in susuh sabin, in sufe iun keke sau, wara le pununfo tikii ka fuuh tah. Ma gam ka fuuh, isau le biil e gam tikii.”

¹¹Wara le Iesu ka usum tah lo seh in ta ufu u na liman tuui, pesu ka use u aragii le, biil e gam tikii gam ka tapiek fuuh tah.

¹²Aunbiing Iesu ka farfarop na sufe foron kekri, ka fakau fafis kolos kia ma ka fis una sala, ke ka diik ri aragii, “Arafah, gam usum na sanih ia ka tel ta u ini gam?

¹³I tekentu tom ae gam ka kam iau ini ‘Tom Fafausum’ ke ‘Kumguui,’ wara le iau tom e ier ae.

¹⁴Iau arae Kumguui ke Tom Fafausum kimi, ia ka sufe kekmi tah isi namih gam sabin gamek sufe keken temtem tikii lo gam.

¹⁵Ia ka finngas ta gam ini nenge tintof isi gam sabin gamek tel u arae ia ka tel ta u kimi.

¹⁶Tekentu kanaka ia fas gam le, biil ti fafauun i laumet na famfamu kia, ke nenge kaltu ae i kep orek la biil i laumet na kaltu ae i wuun u la.

¹⁷Male gam usum na foron tier igii, ke gamen kep fafakalok sing i, male gam misuut lo ri.

¹⁸“Biil ia use u ulo gam tikii. Ia usum lon fanseh ae ia ka fulii pes ta ri. Isau le igii, una fatekentu orek ae na Buk na Gogoh, ae i tara le, ‘Kaltu ae i ien beret turang ka tapiek arae tuui kiak.’

¹⁹Ia fas gam igii, ma namih in tapiek, isi aunbiing in tapiek tekentu, ke gamek unune le iau sau e ier ae.

²⁰Tekentu kanaka ia fas gam le, seh ae i somangat pes iau, i somangat pes seh ae i wuun ta iau.”

²¹Namih lo Iesu ka use ta u arae, ka purngis e bala ke ka use famalal u le, “Tekentu kanaka ia fas gam, neng lo gam tom in ta ufu iau una liman foron tuui.”

²²Foron berberat na fafausum kia ri ka faparia fis tom ini ri, ma ri ka wol pane le Iesu i use seh tutus tom lo ri.

²³Neng lon berberat na fafausum ae Iesu i ier kanaka la isi, i kiis fatat tom isi Iesu.

²⁴Saimon Pita ka fas kalalik na fafausum ae le, “Diik u, i use seh tutus tom?”

²⁵Ke kalalik na fafausum ae ka gigin fatat Iesu ma ka diik u le, “Kumguui, seh tom?”