Dyan 13:2-25

²Na di kakaan ale Dyisas i knaan flabi, tafala fkah Satanas di fandam Dyudas Iskariyot, tingà Simon, fye mangkal ku Dyisas.

³Na gadè Dyisas tasalig Maan di kenen kagot i kdee. Na gadean Dwata i gumdaan na gusamfuléan.

⁴Kabay balù ani i bong kdatahan knean tadag kenen di slengla kmaan, na nlusan lafin saulan, na labédan di awekan twalya.

⁵Kafnge én, nkokan yéél i flanggana na tambù malob i blì dad mlalò kenen, na én ifun dun i twalya labédan di awekan.

⁶Na di kakelan di ku Simon Fiter, man Fiter di kenen, “Amu, ge kè malob i dad blìgu?”

⁷Na tmimel Dyisas, manan, “Ani, laam fa glabat i nimògu, bay glabatam kadang.”

⁸Kabay man Fiter, “Là sa fakay ku ge malob i blìgu!” Na tmimel Dyisas, “Ku làgu nalob i dad bliam taise ge to nfungu.”

⁹Na man Simon Fiter, “Amu, ku én i kagkahan, nang ku alò blìgu i nalobam, bay i kmalgu fa na ulugu.”

¹⁰Na tmimel Dyisas fagu di fléd, manan, “I to tafnge dyo tamlaneb nan, taman balù alò blian i nalob. Na gamu, tamlaneb gamu, bay alò satu di gamu là mlaneb.”

¹¹I duen Dyisas man, “Alò satu di gamu i là mlaneb,” du tafalan gadè ku simto i mangkal kenen di fati.

¹²Na di kafngen malob i blì dad mlalò kenen, lêmanan lsak i saulan gine, na samfulê di gusudengan, na manan, “Glabatyu dé i nimògu di gamu gine?

¹³I katloyu deg ‘To Tamdò’ na ‘Amu’, na glut sa, du agu sa i dunan.

¹⁴Na taman du agu i Amuyu na To Tamdò gamu, tafdanàgu ktogu du malob i dad blìyu, fye ku salob gamu blì.

¹⁵I nimògu gine, gufitegu di gamu kafdanà i ktogu, du fye ganbetyu.

¹⁶Tulengu gamu i kaglutan, i salig là mdatah di Amun, na i to dek, là mdatah di to mdek kenen.

¹⁷Na du glabatyu i tdògu di gamu ani, nun kafyeyu ku nimenyu.

¹⁸“Kabay nun satu di gamu làgu fakuf di mangu ani, du gadègu i mnè di nawayu dad mgalékgu. Kabay là fakay ku là gdohò i gman di Tnalù Dwata gablà di to mangkal deg, manan, ‘I to msong deg kmaan, mbaling to dmuen deg.’

¹⁹Tatulengu gamu ani di laan fa kel du fye di kakelan kadang faglut gamu i gmangu gablà ku simto agu.

²⁰Tulengu gamu i kaglutan, i to dmawat balù simto to dekgu, salngad ku dnawatan agu, na i dmawat deg dnawatan Màgu Dwata, i mdek deg.”

²¹Di kafnge Dyisas mangman ani, too msamuk i nawan, na nun fgadean di dale, manan, “Tulengu gamu i kaglutan, nun satu di gamu fan mangkal deg di fati.”

²²Na alò seye i dad gal mlalò kenen du làla gadè ku simto di dale i manan.

²³Na nun satu di dad gal mlalò kenen i toon kando fagléd di kfe Dyisas.

²⁴Taman kmatuk Simon Fiter di to én, na manan, “Snalekam kenen, ku simto i manan.”

²⁵Taman du too mdadong i to én di ku Dyisas, manan, “Amu, simto i mangkal ge?”