Juan 13:2-25

²Tsechonam disipuluncunawan Jesus sena miquita miquicayarqan. Simonpa tsurin Judas Iscariotitam diablu pensatsishqana carqan Jesusta ranticunanpaq.

³Jesusqa musyarqanmi Dios Yaya llapanta dispunir pepa maquinman churashqanta, y Diospita shamushqanta y peman cuticunanta.

⁴Tsemi senaquicanqanpita sharcurcur, mantunta qoturicur, towallata tseqllanman churacurcur,

⁵labatoriuman yacuta winaricur, disipuluncunapa chaquinta paqar qallecorqan, towallawan tsaquitsir tsaquitsir.

⁶Simon Pedrupa nopanman chäriptinnam, Pedroqa queno nerqan: —Teyta, ¿noqapa chaquitacu qam paqamunqui! —nir.

⁷Jesusnam nerqan: —Que rurecanqäta manaran qam canan cäyinquiraqtsu; peru imecarpis cäyirinquim —nir.

⁸Pedrunam nerqan: —¡Noqapa chaquïta manam nunca paqamunquitsu! —nir. Jesusnam nerqan: —Chaquiquita mana paqamupteqqa, manam noqapatsu canqui —nir.

⁹Simon Pedrunam nerqan: —Tsepenqa Teyta, maquitapis peqätapis paqecallämï; ama chaquillällataqa —nir.

¹⁰Jesusnam nerqan: —Pipis bañacushqana carnenqa, chaquinllatanam paqacunan, limpiu car. Qamcunaqa bañacushqa cuentanomi limpiu shonquna cayanqui. Peru manam llapequicunatsu.

¹¹Meqan caq ranticunanta musyarninmi, Jesus tseno nerqan: “Peru manam llapequitsu limpiu shonqu cayanqui” nishpa.

¹²Llapanpa chaquincunata paqar usharirninnam, mantunta yacacurcur, yape täcurir queno nerqan: —¿Cäyiyanquicu imanir qamcunata queno rurayanqaqta?

¹³Qamcunam niyämanqui: ‘Mayestrullä y Teytallä’ nishpa. Tsenoqa niyämanqui rasontam, porqui niyämanqequinomi rasonpa cä.

¹⁴Imanomi noqa mayestriquicuna y tëtequicuna quecarnin, chaquiquicunata paqamorqö, tsenolla qamcunapis jucniqui jucniqui chaquiquicunata paqapänacuyanqui.

¹⁵Que ejempluwanmi yachatsiyarqoq qamcunapis, noqanolla sirwinacuyänequipaq.

¹⁶Rasontam rasontam niyaq: Patronninpitaqa sirweqnin manam mas presisaqtsu; mandaqninpitaqa manam mandadun ruraqtsu mas presisaq.

¹⁷Nishqäta cäyir rurarqa, allapa cushishqam cawacuyanqui.

¹⁸“Quetapis niriyashqequi; y manam llapequipaqtsu nimushaq, porqui qamcunata acrashqa cayarniquim noqa reqiyaq. Tsemi Diospa palabranpis cumplicärenqa: ‘Noqawan miquicaq nunam conträ shäricurconqa’ nenqan.

¹⁹Tsecuna manaraq pasacuptinmi, willayaq. Y susedicuriptinnam, creyiriyanqui noqa pi canqäta.

²⁰Rasontam rasontam niyaq: Noqa cachashqäta pipis chasquerqa, noqatam chasquicaman. Noqata pipis chasquimarqa, cachamaqnïtam chasquican” nir.

²¹Tseno nirirnam, shonquncho allapa llaquicurnin, Jesus claruna queno nïcorqan: —Rasontam rasontam niyaq: Qamcunapita jucniquim ranticamanqa.

²²Tsenam disipuluncuna jucnin jucnin yarpacachar ricaränacuyarqan, “¿meqantsicpaqraq Jesus tseno parlan?” nirnin.

²³Mas cuyë caq disipulunmi Jesuspa laduncho micur quecarqan.

²⁴Petanam Simon Pedru señasta rurarqan pipaq parlecanqata Jesusta tapunanpaq.

²⁵Tsenam pëqa mas witïcur, queno taporqan: —Teyta, ¿Pitaq canqa? —nir.