ᤕᤢᤜᤢᤴᤏᤠ 13:2-25

²ᤀᤠᤸᤗ ᤕᤢ᤺ᤴᤇᤡᤰ ᤆᤠᤈᤠᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤛᤡᤔᤥᤏᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ᤺ᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤋᤢᤖ ᤑᤠ᤹ᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤋᤃᤡᤛᤠ ᤁᤢᤏᤡᤱᤘᤠ᤹ᤀᤡᤴ ᤑᤧᤳᤗᤠ᤺ᤴᤍᤢ ᤐᤡᤖᤢᤀᤠᤱ ᤘᤕᤧ॥

³ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤢᤏᤧ᤹ ᤁᤠᤰ ᤛᤶᤍᤠᤱ ᤕᤢᤰ ᤐᤡᤖᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶᤔᤣ ᤋᤩᤧᤒᤠ ᤏᤢ ᤂᤢᤏᤧ᤹ᤀᤥᤀᤣ ᤏᤢ᤺ᤱᤗ ᤐᤳ ᤁᤧᤗ᤹ᤒᤠᤴ ᤕᤧᤛᤢᤖᤧ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥

⁴ᤜᤧᤰᤁᤩᤠᤱ ᤂᤢᤏᤧ᤹ ᤆᤠᤈᤠᤔᤠᤍᤧᤴᤏᤥᤗᤠᤶ ᤐᤥᤃᤧᤀᤠᤱ ᤁᤢᤛᤢᤱᤄᤣ᤺ᤰᤘᤠ᤺ᤴ ᤑᤧᤴᤍᤢᤀᤠᤱ ᤕᤠᤶᤍᤢ᤺ᤰᤔᤠᤸᤗᤧ ᤁᤡᤳᤗᤡᤰ ᤁᤡᤳᤇᤡᤱ.

⁵ᤜᤧᤰᤁᤣᤗ᤹ᤖᤡᤰᤁᤣ ᤆᤫᤠ᤺ᤳᤋᤡᤴ ᤂᤵᤐᤩᤠᤀᤥ ᤜᤢᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤔᤠ ᤜᤣ᤺ᤰᤋᤢ ᤜᤧᤰᤁᤩᤠᤱ ᤁᤡᤳᤇᤡᤱᤒᤠ ᤕᤠᤶᤍᤢ᤺ᤰᤔᤠᤸᤗᤧ ᤋᤢᤃᤢ ᤐᤡᤖᤢᤛᤡ॥

⁶ᤂᤢᤏᤧ᤹ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤗᤠᤱ ᤘᤠᤜᤵᤛᤧ ᤑᤧᤖᤧᤸᤗᤧ ᤂᤧᤸᤗᤧ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤗᤠᤱᤅᤡᤴ ᤘᤠᤃᤧᤜᤵᤋᤢᤒᤠᤒᤡ᥅”

⁷ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥ ᤀᤡᤱᤃᤠ᤹ ᤌᤣ ᤆᤥᤃᤢᤱᤗ ᤐᤳᤋᤠ ᤁᤧᤗ᤹ᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤗᤥ ᤁᤖ ᤋᤠ᤺ᤴᤍᤡᤃ ᤁᤢᤛᤡᤱ ᤁᤧᤏᤡ᤺ᤳᤋᤢ᤹ᤖᤥ॥”

⁸ᤐᤋᤪᤢᤛᤖᤧ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤀᤠᤗᤠᤱᤜᤠ᤹ ᤘᤠᤜᤵᤔᤠ ᤔᤧᤏᤢ᤹ᤏᤧᤴᤗᤥ᥄” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤁᤧᤗᤠᤱᤜᤠ᤹ ᤘᤠᤔᤧᤜᤵᤋᤢᤱᤅᤡᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤀᤡᤱᤃᤠ᤹ᤏᤢ ᤗᤰ ᤁᤧᤱᤄᤥ᤺ᤛᤢᤴᤗᤥ॥”

⁹ᤜᤧᤰᤁᤣ᤺ᤸᤗᤧ ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤗᤠᤱᤜᤠ᤹ᤖᤰ ᤔᤧ᤺ᤴ. ᤁᤖ ᤀᤠᤜᤢᤰᤜᤠ᤹ ᤏᤢ ᤀᤠᤎᤧᤃᤣ᤺ᤰᤁᤡᤴᤏᤠᤱ ᤘᤠᤜᤵᤋᤠᤱ ᤐᤡᤖᤠᤱᤅᤧ᤹ᤀᤥ᥄”

¹⁰ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤘᤠᤃᤧᤖᤢᤶᤛᤡᤱᤒᤠ ᤔᤏᤠ᤺ᤱᤃ ᤛᤣᤛᤣ ᤐᤥ᤺ᤱᤔᤠᤖᤧ ᤗᤠᤃᤡ ᤁᤢᤗᤠᤱᤜᤠ᤹ᤖᤰ ᤘᤠᤜᤵᤔᤠ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤏᤠᤛᤡᤱᤃᤧᤴ ᤁᤢᤎᤰᤁᤡᤱᤃ ᤛᤣᤛᤣᤀᤣ ᤆᤥ᤺ᤰᤗᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤃ ᤛᤣᤛᤣᤀᤣ ᤁᤧᤈᤥᤃᤡᤛᤠᤱ ᤂᤡᤏᤡ᤹ ᤁᤧᤖᤧᤰ ᤛᤣᤛᤣ ᤁᤧᤜᤥ᤺ᤵᤋᤡ᤹ᤖᤥ॥”

¹¹ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤠ᤺ᤳᤗᤧ ᤀᤡᤱᤗᤧᤰᤋᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤡᤏᤡ᤹ ᤁᤧᤖᤧᤰ ᤛᤣᤛᤣ ᤁᤧᤜᤥ᤺ᤵᤋᤡ᤹ ᤗ᤹ᤖᤡᤰ ᤔᤧᤳᤋᤢᤛᤡᤒᤠᤖᤥ॥

¹²ᤕᤧᤛᤢᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡᤀᤠᤱ ᤁᤢᤈᤠᤱᤅᤡᤴ ᤆᤠᤰᤛᤡᤱ ᤜᤧᤰᤁᤩᤠᤱ ᤕᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅

¹³ᤂᤡᤏᤡ᤹ ᤍᤠᤱᤒᤠ ᤏᤢ ᤛᤡᤰᤛᤠᤶᤒᤠ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤳᤋᤡ᤹॥ ᤂᤧᤴ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤶ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤒᤠ ᤂᤧᤴᤏᤠᤖᤥ॥

¹⁴ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ ᤍᤠᤱᤒᤠ ᤏᤢ ᤛᤡᤰᤛᤠᤶᤒᤠᤀᤠᤛᤠᤱ ᤂᤡᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢᤱ ᤐᤡᤏᤡᤱ. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤗᤠᤱ ᤘᤠᤜᤵᤔᤠ ᤐᤡᤛᤡᤱᤔᤠ ᤐᤥ᤺ᤱᤗᤥ॥

¹⁵ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤁᤴ ᤁᤢᤒᤡ᤺ᤴ ᤕᤢᤰᤂᤢᤱ ᤐᤡᤏᤡᤱᤅᤠᤱ ᤘᤠ᤹ᤖᤥ॥

¹⁶ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤛᤣᤘᤠᤖᤥᤒᤠᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ. ᤜᤧᤰᤁᤩᤠᤱ ᤀᤡᤱᤛᤠᤒᤠᤴᤏᤠᤱ ᤂᤢᤏᤧ᤹ ᤁᤧᤒᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥

¹⁷ᤀᤠᤸᤗ ᤁᤴ ᤐᤠ᤺ᤴᤜᤠ᤹ᤃ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤁᤱᤜᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤔᤢ᤹ᤀᤡᤛᤠᤒᤠ ᤁᤧᤒᤥ᤺ᤰᤂᤡ᤹ᤖᤥ॥”

¹⁸“ᤀᤡᤱᤃᤠ᤹ ᤂᤡᤏᤡ᤹ ᤁᤧᤖᤧᤰᤗᤧ ᤗᤠᤃᤡᤃ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤥ॥ ᤀᤡᤱᤃᤠ᤹ ᤛᤣ᤺ᤰᤏᤡᤱᤒᤠᤜᤠ᤹ᤃ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤗᤥ॥ ᤁᤖ ᤀᤡᤱᤃᤠ᤹ᤏᤢ ᤛᤥᤖᤡᤰ ᤆᤠᤃᤧᤈᤠᤒᤠᤴᤏᤣ ᤀᤡᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤥᤃᤧᤖᤥ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠᤴ ᤁᤧᤳᤗᤀᤣ ᤐᤥ᤺ᤱᤗᤥ॥

¹⁹ᤁᤴ ᤐᤠ᤺ᤴᤜᤠ᤹ᤃ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤧᤳᤋᤡᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤀᤠ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤗᤥ॥

²⁰ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤐᤠᤱᤄᤢᤱᤛᤡᤱᤒᤠᤜᤠ᤹ ᤗᤠᤱᤍᤠ᤺ᤰᤋᤢᤛᤡ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠ. ᤂᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤧᤴ ᤗᤠᤱᤍᤠ᤺ᤰᤋᤢ᤹ᤖᤥ॥”

²¹ᤕᤧᤛᤢᤖᤧ ᤂᤧᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤁᤢᤕᤥ᤺ᤶ ᤐᤢ᤹ᤖᤧᤖ ᤀᤰᤂᤣᤗ᤹ᤖᤡᤰ ᤀᤡᤱᤓᤥ᤺ᤛᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”

²²ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤜᤠ᤺ᤳᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤀᤡ ᤗ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤥᤔᤧᤔᤧᤳᤇᤡᤱ॥

²³ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤎᤡᤰ ᤁᤢᤒᤣᤛᤠᤱ ᤂᤧ᤺ᤶᤛᤡᤱᤅᤠᤱ ᤕᤢᤅᤧᤖᤥ॥

²⁴ᤛᤡᤔᤥᤏ ᤐᤋᤪᤢᤛᤖᤧ ᤂᤧᤴ ᤜᤢ᤹ᤛᤠᤶᤒᤠᤴ ᤂᤢᤏᤧ᤹ ᤜᤠ᤺ᤵᤐᤣ ᤑᤠ᤹ᤀᤠᤱ ᤛᤣ᤺ᤴᤍᤥ᤺ᤛᤧ᤹ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤡᤰᤛᤣ᤺ᤴ ᤐᤡᤖᤢᤖᤥ॥

²⁵ᤜᤧᤰᤁᤣ᤺ᤸᤗᤧ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤕᤧᤛᤢᤀᤥ ᤂᤧ᤺ᤶᤛᤡᤱᤗ ᤛᤣ᤺ᤴᤍᤥᤛᤢ. “ᤍᤠᤱᤒᤣ ᤂᤧᤱᤃ ᤜᤠ᤺ᤳᤏᤧᤒᤣ᥅”