Jon 13:2-25

²Kömumawaŋgö nalöŋan kam kuŋgumamgö aiga nalö kunöŋ suŋgemgö nene nembingö tokoba mohotŋe tatketka yuai kewö asuhuyök: Saimon Iskariotkö nahönŋi qetŋi Judas i Satanöŋ lök sölölöhöyök. Jisös mamalolo ak waŋgimapkö keuŋi mi saŋep ali uruŋe geiga möta tarök.

³Jisösnöŋ nanŋi könaŋi mi kewö möt kutuyök, ‘Iwinöŋ yuai pakpakö kukösumŋi mi nöŋgö böröne aliga Anutugöreŋök eta mala kunbuk yaŋgöreŋ öŋgömamgö akzal.’

⁴Könaŋi mewö möt kutuba nene nemba tatkeraŋgöreŋök wahöta malukuŋi köteköba nupkö opo jöhanŋi kun memba kembaŋe köpeiba jöhöyök.

⁵Mi jöhöba o joutnöŋ mokoi geiga könahiba gwarekurupŋi yeŋgö könaŋini saŋgoŋnök. Saŋgoŋ teköba opo jöhanŋi (tauöl) kembaŋe köpeiba jöhöyöhi, miaŋön könaŋini kutuyök.

⁶Saŋgoŋda anda Saimon Pitögö könaŋe kaŋgoriga kewö jii mörök, “O Kembu gi welenqeqe etqeqeŋi qahö. Göŋön nöŋgö könani saŋgoŋnöŋga qahö dop kölma.”

⁷Mewö jii möta kewö meleŋnök, “Yuai dölki akzali, göŋön miaŋgö könaŋi nalö kewöŋe qahö möt kutuzanmö, könaŋgepnöŋ mi ölöp möt asariba malman.”

⁸Meleŋniga kewö kapaŋ köla jiyök, “Gi mönö nöŋgö könani nalö kunöŋ qahöpmahöp saŋgoŋman.” Mewö jiiga kewö jiyök, “Nöŋön gi qahö saŋgoŋ gihimam ewö, gi mönö nöŋgö gwarekni toroqeba malmamgö osiman.”

⁹Mewö jiiga Saimon Pitönöŋ pörösöl ala auruba meleŋnök, “Kembu, mewögöra gi könananök qahöpmö, böröni aka nöröpni mi mohotŋe saŋgoŋman.”

¹⁰Mewö meleŋniga kewö jii mörök, “Kunŋan o ariba kaiga könaŋi tok saŋgoŋninga töwötŋi qahö sarakŋi ak teköma. Iŋini körek lök sarakŋi ak teközemö, mohotnöhök sarakŋi qahö akza.”

¹¹Daŋön mamalolo ak waŋgimamgö ahöhi, Jisösnöŋ mi möta miaŋgöra kewö jiyök, “Iŋini körek sarakŋi qahö akze.”

¹²Könaŋini saŋgoŋ teköba malukuŋi kunbuk löŋgöta eta tari negetka kewö qesim eŋgiba jiyök, “Nöŋön yuai ak eŋgizali, iŋini miaŋgö könaŋi möt asarize me qahö?

¹³Iŋini nöŋgöra ‘Böhi!’ aka ‘Kembu!’ mewö noholakze aka nöŋön mi ölŋa akzal. Miaŋgöra mi dopŋe jimakze.

¹⁴Nöŋön eŋgö Kembu Böhiŋini aka welenqeqe eretŋaŋgö silik memba könaŋini saŋgoŋjal ewö, iŋini mönö mewöŋanök memba et al aŋguba weleqeqe aka könaŋini saŋgoŋ aŋguba malgetka dop kölma. Mi mönö nupŋina.

¹⁵“Nöŋön aka kondel eŋgizali, iŋini mönö miaŋgö dop naŋgöba welen qem aŋguba malme. Mewö malmegöra miaŋgö silikŋi nöŋön merak kondel eŋgibiga ekze. Mi mötmöriba miaŋgö tandökŋi wuataŋgögetka dop kölma.

¹⁶Nöŋön keu öl töhönŋi kun kewö jibi mötket: Welenqeqenöŋ eretŋi aiga toŋan öŋgöŋgöŋi akza. Gwareknöŋ böhiŋi oŋgita öŋgöŋgöŋi akŋamgö osima. Mewöyök azi kembu kunöŋ garataŋi melaiiga kolek anda nup memakzawi, yaŋön mönö kembuŋaŋgö bapŋe malakza.

¹⁷Iŋini keu kötni mi merak möt kutuze. Mewögöra silememe mosöta alaurupŋini nembö bapŋine anda malme ewö, nöŋön mönö eŋgöra ‘I-ia simbawoŋ!’ jimam.” Mewö.

¹⁸“Keu jizali, mi mönö iŋini lökŋanök qahö eŋgömeza. Nöŋön niŋia möwölöhöba eŋgömeali, eŋgö könaŋamŋini mönö ölöp möt kutuzal. Mewö maljalmö, Buŋa Kimbi kun miaŋön ölŋambuk aiga dop kölma. Keu mi kewö, ‘Kunöŋ nöŋgöreŋ nene mohotŋe neziri, yaŋön mönö kelewele aka gwakötŋan tötal niŋgiba nuŋgumamgö jöjöröza.’

¹⁹“Ni ölŋi könaŋgep asuhumawaŋgö keuŋa mutuk jizal. Miaŋgöra ölŋi asuhumawi, iŋini nalö miaŋgöreŋ nöŋgö könani möt asariba kewö jime, ‘Aha! Malmalgö könaŋi nalö dop mala kota malöhi, yaŋön mönö mia akza.’ Mewö jiba möt narim niŋgimegöra nöŋön keu mi qeljiŋe aukŋe jibiga mötze.

²⁰“Nöŋön keu öl töhönŋi kun kewö jibi mötket: Nöŋön ambazip kun melaibi nup memamgöra kaiga kunŋan i köl örözawi, yaŋön mönö ni tok köl öröm niŋgima. Mewöŋanök ni köl öröm niŋgizawaŋön mönö melaim niŋgiyöhi, mönö i mewöyök köl öröm waŋgima.”

²¹Jisösnöŋ keu mewö jiba wösöŋi kot gwözöŋda jul takömamgö ahiga keu indela kewö jiyök, “Nöŋön keu öl töhönŋi kun kewö jibi mötket: Eŋgöreŋök kunŋan ni mamalolo mem niŋgima.”

²²Mewö jiiga gwarekurupŋan nanŋini kuŋkaliliŋ uba aŋgehiba nanŋök nanŋök kewö mötmöriget, ‘Mönö dagöra jizapto?’ Mewö mötmöriba uruyahöt tönpin tatket.

²³Tönpin tata nene negetka Jisösgö wölböt gwarekŋan yaŋgö qöhöröŋeyök tarök.

²⁴Yaŋön tariga Saimon Pitönöŋ nöröpŋan gwarek mi söpsöp ak waŋgiba kewö jii mörök, “Keu mi dagöra jizawi, mi qesiba jinöŋ mötpi.”

²⁵Mewö jii möta lapingöba Jisösgö töptöpŋe naŋgöba kewö qesiyök, “Kembu, azi mi daŋön?”