Jozua 13:1-20

¹Sar imar sas o Jozua igen phuro, o RAJ leske phenďa: “Tu sal imar phuro a hin tuke imar but berš, ale ačhile ode but phuva, so o Izraeliti mek na zaile.

²Ačhile mek o Filišťinike the Gešurengere phuva.

³O phuva, pal save phenen, hoj hine le Kanaančanengere, le paňestar Šichor, so džal pro vichodos le Egiptostar, dži pro severos paš o Ekron. Ode bešen pandž Filišťinike kraľa andral e Gaza, andral o Ašdod, o Aškalon, o Gat the o Ekron. Ačhiľa mek e phuv le Avvičanengeri,

⁴pro juhos e phuv le Kanaančanengeri dži ke phuv Meara, so hiňi le Sidončanengeri, dži ko Afek, so hiňi e phuv le Amorejengeri.

⁵Ačhiľa the e phuv le Gebalengeri the calo Libanon pro vichodos le Baal-Gadostar paš o verchos Chermon dži prekal o verchengero drom Lebo-Chamat.

⁶Me anglal o Izraeliti tradava avri savore Sidončanen, save bešen maškar o verchi Libanon dži ko Misrefot-Majim. Tu akana le losoha ča rozulav le Izraelitenge o phuva avke, sar tuke phenďom.

⁷Rozulav kadi phuv le eňa kmeňenge the jepaš le Menaššeskere kmeňoske, hoj te el lengeri.”

⁸O Rubenoskero, Gadoskero the o dujto jepaš le Menaššeskero kmeňos priile o ďeďictvos, so lenge diňa o Mojžiš, le RAJESKERO služobňikos, pro vichodos pal o Jordan. Lengeri phuv chudelas

⁹le forostar Aroer pro brehos paš e dolina Arnon, dureder ko foros, so hino maškar odi dolina, the ko rovno than le Dibonostar dži ko foros Medeba.

¹⁰On priile savore fori le Amorejike kraľiskere le Sichonoskere, savo kraľinelas andro Chešbon, dži ke phuv le Ammončanengeri.

¹¹Priile mek o Gilead, e phuv le Gešurengeri the le Maachaťanengeri, savore verchi paš o Chermon the caľi phuv Bašan dži ke Salcha.

¹²E phuv Bašan sas angle oda le kraľiskeri le Ogoskeri, savo bešelas andro Aštarot the Edrej. Ov ačhiľa ča jekh poslednendar savore Refajendar, upral save o Mojžiš ňerinďa (zviťazinďa) a tradňa avri.

¹³Ale o Izraeliti na tradle avri le Gešuren the le Maachaťanen, vašoda dži adadžives bešen maškar lende.

¹⁴O Mojžiš na diňa ňisavi phuv le kmeňos Levi vaš o ďeďictvos, bo o RAJ o Del le Izraeloskero lenge phenďa: “Na chudena o phuva, ale ča o obeti, so ena labarde pre miro oltaris.”

¹⁵O Mojžiš diňa o phuva vaš o ďeďictvos le famelijenge andral o kmeňos Ruben.

¹⁶Pro juhos lengeri phuv chudelas le forostar Aroer, so hino pro brehos paš e dolina Arnon – lengere sas the o foros maškar e dolina, the e phuv dži ke Medeba,

¹⁷o foros Chešbon the savore leskere fori, so hine pre odi phuv: o Dibon, o Bamot-Baal, o Bet-Baal-Meon,

¹⁸e Jahca, o Kedemot, o Mefaat,

¹⁹o Kirjatajim, e Sibma the o Ceret-Šachar pro brehos andre dolina,

²⁰o Bet-Peor tel o verchos Pisga the o Bet-Ješimot.