Text copied!
CopyCompare
Buka Helaga - IOANE

IOANE 10

Help us?
Click on verse(s) to share them!
1“Momokani, momokani umui lau hamaoroa, mamoe edia magu ena iduara dekenai ia raka vareai lasi, to magu ena iduara ia noho lasi gabuna dekenai ia hanaia kava tauna be henaoa bona dadia tauna.
2To iduara dekena amo ia raka vareai tauna be mamoe naria tauna.
3Iduara gimaia tauna ese iduara ia kehoa unai tau ena, vadaeni mamoe ese iena gadona idia kamonai. Ia ese iena mamoe momokani edia ladana ia atoa, vadaeni ia hakaudia murimuri dekenai.
4Iena mamoe momokani ibounai be murimuri dekenai ia hakaudia, edia vairana dekenai ia raka, vadaeni iena gadona idia diba dainai, iena murina dekenai idia raka.
5To idau tauna ena murina dekenai do idia raka lasi, lasi momokani. Ia dekena amo do idia heau siri, badina be idau taudia edia gadona idia diba lasi.”
6Inai parabole be Iesu ese ia gwauraia idia dekenai, to iena hereva ena anina idia diba lasi.
7Iesu ma ia hereva lou idia dekenai, ia gwau, “Momokani, momokani umui lau hamaoroa, lau be mamoe edia iduara.
8Guna idia mai taudia ibounai be henaoa bona dadia taudia, vadaeni mamoe ese edia hereva dekenai idia kamonai lasi.
9Iduara be lau inai. Lau dekena amo do ia raka vareai tauna be do ia mauri, ia be do ia raka vareai, do ia raka murimuri dekenai, aniani do ia davaria.
10Henaoa tauna ena mai badina be henaoa, bona alaia, bona hadikaia ore totona. Lau mai vadaeni, mauri do idia abia, mauri mai anina momokani danu, do idia abia totona.
11“Lau be mamoe naria tauna namona inai. Mamoe naria tauna namona ese iena mauri ia atoa diho mamoe totona.
12Gaukara tauna mai ena davana be mamoe naria tauna lasi, bona mamoe edia biaguna lasi. Uda sisia ia itaia idia mai neganai, ia ese iena mamoe dekena amo ia heau siri. Vadaeni uda sisia ese mamoe ia koria, bona idia heau lao gabu idauidau dekenai.
13Ia heau, badina ia be gaukara tauna mai ena davana, mamoe dekenai ia laloa lasi.
14“Lau be mamoe naria tauna namona. Lauegu mamoe be lau diba. Lauegu mamoe danu idia diba lau.
15Inai bamona danu, lauegu Tamana ia diba lau, bona lau diba ia. Egu mauri danu lau atoa diho, mamoe totona.
16Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.
17“Inai dainai egu Tamana ese lau ia lalokau henia, badina be egu mauri lau atoa diho, do lau abia lou totona.
18Tau ta ese lauegu mauri ia kokia lasi, lau sibona lau atoa diho. Lau be mai siahu do lau atoa diho, bona mai egu siahu do lau abia lou. Inai bamona siahu be egu Tamana dekena amo lau abia vadaeni.”

19Iuda taudia ese inai hereva idia kamonai neganai, edia orea ma idia parara lou.
20Taunimanima momo idia gwau, “Ia be mai ena lauma dikana danu, ia kavakava. Dahaka dainai umui kamonai henia ia dekenai?”
21Ma haida idia gwau, “Unai hereva be lauma dika ese ia abia tauna ena hereva lasi. Lauma dika ese matakepulu taudia edia matana ia kehoa diba, a?”
22Unai neganai Dubu Helaga Hagoevaia ena aria dinana ia ginidae vadaeni Ierusalema dekenai. Unai be keru ena nega.
23Iesu be Dubu Helaga lalonai ia raka, Solomona ena dehe dekenai.
24Vadaeni Iuda taudia ese idia gini hagegea Iesu dekenai, idia nanadaia, idia gwau, “Oi totona do ai laloa daradara noho, ia lao bona edena negai? Oi be Keriso o lasi? Mani oi hamaoroa momokani ai dekenai.”
25Iesu ia haere idia dekenai, ia gwau, “Umui lau hamaoroa vadaeni, to egu hereva umui abidadama henia lasi. Lauegu Tamana ena ladana dekenai lau karaia gaudia ese lau idia hedinaraia.
26To umui abidadama henia lasi lau dekenai, badina umui be lauegu mamoe lasi.
27Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka.
28Mauri hanaihanai danu lau henia idia dekenai, idia be do idia mase lasi, lasi bona lasi momokani. Bona tau ta ese lauegu imana dekena amo idia do ia kokia lasi.
29Idia be lauegu Tamana ese lau dekenai ia henia vadaeni. Lauegu Tamana ena goada ese ibounai edia goada ia hereaia. Unai dainai tau ta ia hegeregere lasi idia do ia kokia lauegu Tamana dekena amo.
30Lau bona egu Tamana, ai be tamona.”
31Vadaeni Iuda taudia ese nadi idia abia isi, idia hodoa gwauraia.
32Iesu ia gwau, “Kara namodia momo Tamana dekena amo umui dekenai lau hedinaraia vadaeni. Edena kara totona do umui hodoa lau?”
33Iuda taudia idia gwau, “Kara namona ta totona do ai hodoa lasi oi, to Dirava ena ladana oi hadikaia dainai, badina oi be taunimanima sibona, to oi sibona be Dirava oi halaoa!”
34Iesu ia gwau, “Umui emui taravatu dekenai inai bamona ia torea, ani: ‘Lau gwau, umui be dirava?’
35Buka Helaga ena hereva ta be ia gwau, Dirava ena hereva idia abia dae taudia be Dirava ese ia gwauraia, idia be dirava. Inai be momokani, badina Buka Helaga ena hereva ia senisi diba lasi.
36Dirava ese lau ia abia hidi, bona lau ia siaia tanobada dekenai. Ia siaia tauna be umui gwau henia, umui gwau, ‘Oi be Dirava ena ladana oi hadikaia,’ badina be lau gwau, ‘Lau be Dirava ena Natuna,’ a?

37Bema egu Tamana ena kara lau karaia lasi, lau do umui abidadama henia lasi be namo.
38To iena kara be lau karaia noho. Bema lau umui abidadama henia lasi, namona be lau karaia gaudia do umui abidadama henia, vadaeni emui lalona be do idia kehoa, bona do umui diba lauegu Tamana be lauegu lalona dekenai ia noho, lau danu be egu Tamana ena lalona dekenai lau noho.”
39Vadaeni idia ese ma idia dogoatao lou gwauraia, to edia imana dekena amo ia raka siri.
40Iesu be Ioridane Sinavai unai kahana dekenai. Unuseni ia giroa lao, gunaguna Ioane ese ia bapatiso karaia gabuna dekenai ia noho.
41Taunimanima momo be ia dekenai idia lao. Idia gwau, “Ioane ese toa ta ia karaia lasi, to Ioane ese inai tau ia herevalaia gaudia ibounai be momokani vadaeni.”
42Vadaeni taunimanima momo ese unai gabu dekenai Iesu idia abidadama henia.