1Mänitä Jesús miänáaṉgombä: ―Chaads mijts tehm̱ tiøyhajt nnämáꞌawät: cabä meeꞌtspähajxy jiiby tiägøꞌøwøꞌøy maa jaꞌa meegcuraahaawän. Wiingtuum hajxy jeꞌe tiägøꞌøwøꞌøy maa jaꞌa curaahaaw quiaꞌa hitiän.
2Pero jaꞌa cumeeg, jeꞌeds jiiby tägøꞌøwøøby maa jaꞌa curaahaawän.
3Yajtägøøby jaꞌa curaagüeendähajpä jaꞌa cumeeg jiiby curaajooty. Coo hänajty mieegmøjyaꞌaxaꞌañ, mänitä mieeg quiøx̱y xøøguyaꞌaxy. Yoꞌmädooby jaꞌa meeg jaꞌa wyiindsǿṉ hajxy. Mänitä cumeeg yhøxwoobädsøm̱y.
4Coo jaꞌa meeghajxy hänajty tøø piädsøm̱y, mänitä wyiindsǿṉ hajxy cøjx piaduꞌubøcy. Paady hajxy jaduhṉ piaduꞌubøcy coo jaꞌa wyiindsǿṉ hajxy yoꞌmädoy.
5Cabä wiingjäyaꞌay hajxy pianøcxaꞌañ. Coo wiingjäyaꞌay hajxy yoꞌmädoy, cøjx hajxy chähgøꞌøbäyøꞌøgy.
6Jaꞌa Jesús, yajmäbaadyhaam hänajty miädiaꞌagy; pero cabä miädiaꞌagy hänajty wyiinjuǿøyyäxä.
7Mänitä Jesús miänáaṉgumbä: ―Chaads mijts tehm̱ tøyhajt nnämáꞌawät: Øøc̈h, jaduhṉ mäwíinhøch nebiä curaahaawän maa jaꞌa meeghajxy tiägøꞌøwøꞌøyän.
8Cáhnøch hänajty nmech, tøø jäyaꞌayhajxy hänajty may miech høhṉdaacpä. Jaduhṉ hajxy ñibiädaꞌagyii nebiä Diosquex̱ypän. Jaduhṉ mäwíinäts hajxy miäbaady nebiä meegmeeꞌtspän. Pero cabä miädiaꞌagyhajxy miäbǿjcäxä. Jaayaꞌayädshajxy jaduhṉ caꞌa mäbøjc, pønjátyhøch nmädiaꞌagy xmiäbǿjcäp. Jaduhṉ mäwíinäts hajxy jeꞌe miäbaatpä nebiä meeg mädiaꞌagymiäbøjpän.
9Jaꞌa meeghajxy, jii hajxy jeꞌe tiägøꞌøwøꞌøy maa jaꞌa curaahaawän. Høøc̈h, jaduhṉ mäwíinhøch nebiä curaahaawän. Pǿṉhøch jaꞌa nmädiaꞌagy xmiäbǿjcäp, jeꞌec̈h ngüeendähadaam̱by.
10’Jaꞌa hajxy jäyaꞌawyiinhøhm̱bä, Diosmädiáꞌaguiäc tyijy hajxy jeꞌe yajwaꞌxyp. Yhamdsoo copcooty jaꞌa mädiaꞌagy hajxy hänajty yajpädsøm̱y. Pero høøc̈h, páadyhøch tøø ngädaꞌagy hädaa yaabä naax̱wiin nebiä jäyaꞌayhajxy jaduhṉ jim̱ ñǿcxät tsajpootyp, neby hajxy jaduhṉ jim̱ yhídät cøjxtaꞌaxiøø.
11Jaꞌa cumeeg, cwieendähajpy jaꞌa mieeg jeꞌe. Jaduhṉ mäwíinhøch jeꞌe, ngüeendähadáam̱biøch jaꞌac̈h nmädiaꞌagy hajxy xmiäbǿjcäbä. Jaayaꞌay jaꞌa meeg jaanc̈h tehm̱ chojpä, høxtä ñähhoꞌtúꞌudäp jaꞌa mieeg.
12Jaꞌa moonsähajxy, cabä meeg hajxy tuꞌjoot cwieendähaty. Paady hajxy jeꞌe tuꞌjoot quiaꞌa cueendähaty, coo hajxy jeꞌe quiaꞌa yhamdsoo jeꞌejä. Mäjuy hajxy jeꞌe jia cuduṉ̃. Coo jaꞌa pahuc miech meegtsuꞌtspä, mänitä moonsähajxy piäyøꞌøgy. Mänitä meeg mähdiøjc‑hajxy ñäꞌägä mac̈hii. Mänit hajxy chähgøꞌøbäyøꞌøgy.
14’Pero høøc̈h, jaduhṉ mäwíinhøch nebiä jäyaꞌay meeg hajxy jaanc̈h tehm̱ chojpän. Xyhix̱yhájpøch jaꞌa nDeedy, y nhix̱yhájpiøch jeꞌebä. Jaanä jaduhṉds jeꞌe, jaanä nhix̱yhájpiøch pønjátyhøch nmädiaꞌagy hajxy xmiäbǿjcäp. Nnähhoꞌtuꞌudáam̱biøch hajxy jeꞌe.
16Jaanä xmiäbøgáaṉäbøch jaꞌa nmädiaꞌagy hajxy, jaꞌa jäyaꞌayhajxy tsänaabiä wiinghagajpt. Tuꞌugmädiaꞌagy hajxy yhidaꞌañ møød hädaa jäyaꞌayhajxy yaabä. Tuꞌcuhdújthøch jaꞌa nmädiaꞌagy hajxy xmiäbøgaaṉä nägøx̱iä.
17’Páadyhøch jaꞌa nDeedy xchocy cooc̈h jaduhṉ nmänaꞌañ cooc̈h hänaꞌc ween xyaghoꞌogy nébiøch jaduhṉ njujypiǿgät jadähooc.
18Høøc̈h, hamdsooc̈h nmänaꞌañ cooc̈hä jäyaꞌay xyaghóꞌogät. Cooc̈h häxøpy ngaꞌa mänaam̱bä, cábøc̈hä jäyaꞌay häxøpy xyaghoꞌogaꞌañ. Nmǿødhøch cuhdujt cooc̈h nhóꞌogät; y nmǿødhøch cuhdujt cooc̈h njujypiǿgät jadähooc. Páadyhøch jaꞌa nDeedy tøø xwyiinguex̱y cooc̈h nhóꞌogät, cooc̈h njujypiǿgät.
19Coo Jesús jaduhṉ miädiaacy, paadiä judíoshajxy tuꞌugmädiaꞌagy quiaꞌa nibiaatä.
20Mänit hajxy nämay miänaaṉ̃: ―Møjcuꞌudaꞌa miøød. Cuhmäñøøbiädaꞌa jaduhṉ. Tii yøꞌø miädiaꞌagy hajxy coo mmädow̱aaṉä.
21Mänit hajxy näjeꞌe miänaaṉ̃: ―Cabä møjcuꞌumøødpä jaduhṉ miädiáꞌagät. Cabä møjcuꞌu jaꞌa wiindspä jaduhṉ yaghijxǿꞌøgät.
22Jájtäbä xøø hänajty jim̱ Jerusalén, jaꞌa xøhajpä jaꞌa Dedicación. Tøøchpojjooty hänajty.
23Jiibiä Jesús hänajty wiädity tsajtøgooty, jiiby maa jaꞌa tøjwiingän, jaꞌa xøhajpä Salomón.
24Mänitä judíoshajxy jim̱ yhamugøøyy maa Jesús hänajty wiäditiän. Mänitä Jesús ñämaayyä: ―Mänaa højts xyhawaaṉaaṉä pø tøyhajt mMesíashaty.
25Mänitä Jesús yhadsooyy: ―Tøøds mijts nja hawáaṉäm, pero cab hajxy mmäbøjcy. Cooc̈h jaduhṉ ngudiuṉ̃ nébiøch jaꞌa nDeedy tøø xyhaneꞌemiän, cähxǿꞌpøch jaduhṉ cooc̈h nGristohaty.
26Pero, cooc̈h mijts jaꞌa nmädiaꞌagy hajxy xquiaꞌa panøcxä, páadyhøch jaꞌa nmädiaꞌagy hajxy xquiaꞌa mäbøgaaṉä.
27Nhix̱yhájpiøch pǿṉhøch jaꞌa nmädiaꞌagy xmiäbǿjcäp; jeꞌec̈h jaꞌa nmädiaꞌagy xpianǿcxäp.
28Nyajnøcxáam̱biøch hajxy jim̱ tsajpootyp. Jim̱ hajxy yhidaꞌañ cøjxtaꞌaxiøø. Cábøch hajxy jeꞌe pøṉ xpiǿjcät.
29Miǿødhøch jaꞌa nDeedy jaꞌa mäjaa. Cabä pøṉ jaꞌa mäjaa jaduhṉ miøødä nébiøch jaꞌa nDeedy miøødän. Jaꞌa nDéedyhøch jaduhṉ tøø miänaꞌañ cooc̈h jaayaꞌay jaꞌa nmädiaꞌagy hajxy xmiäbǿjcät. Cábøch jaꞌa nDeedy jaayaꞌayhajxy mänaa piøgáaṉaxä.
30Høøc̈h mǿødhøch jaꞌa nDeedy, tuꞌugmädiaꞌagy højts nhity.
31Mänitä judíoshajxy tiägǿøguiombä tsaagonøꞌpä. Jesús hajxy hänajty quiaꞌadsaam̱by.
32Mänitä Jesús jaꞌa judíos ñämaayy: ―Madiúꞌujøch jaꞌa hoybä tøø ngudiuṉ̃ nébiøch jaꞌa nDeedy tøø xyhaneꞌemiän. Tiiguiǿxpøch mijts coo xquiaꞌadsaꞌañ.
33Mänit hajxy yhadsooyy: ―Paady højts miic̈h ngaꞌadsaꞌañ coo Dios haxøøg mnänøm̱y, coo mnibiädaꞌagyii nebiä Diosän; caꞌa jieꞌeguiøxpä coo hodiuuṉg jaduhṉ tøø mduṉ̃.
34Mänitä Jesús yhadsooyy: ―Jiiby jaduhṉ myiṉ̃ maa mijts mguhdujtän coo Dios jaduhṉ miänaaṉ̃: “Mdioshajp hajxy.”
35Tøyhajt jaꞌa Diosmädiaꞌagy jaduhṉ ñäꞌägädä mädiaꞌagy. Jaduhṉ miänaꞌañ cooc hajxy jaduhṉ dyioshaty, jaꞌa jäyaꞌayhajxy tøø wyiingpǿquiäbä jaꞌa Diosmädiaꞌagy.
36Hoora, Dióshøch tøø xquiunuuꞌxy tøø xpiädaꞌagy. Yaac̈h tøø xquiex̱y hädaa yaabä naax̱wiin. Cábøch Dios tøø nwiingapxpety cooc̈h nmänaaṉ̃ cooc̈hä Dios xyHuunghaty. Tøyhájthøch jaduhṉ xyHuunghaty.
37Cooc̈h häxøpy ngaꞌa tuṉ̃ nébiøch jaꞌa nDeedy tiuṉ̃än, cábøc̈hä nmädiaꞌagy hajxy häxøpy xmiäbøjcä.
38Pero jaanc̈h túum̱bøch jaduhṉ. Mmäbǿgäp hajxy jaduhṉ cooc̈hä Dios tøø xquiex̱y, hóyhøc̈hä nmädiaꞌagy hajxy xquiaꞌa ja mäbøjcä. Jaduhṉds hajxy mnajuǿøñät coo højts tuꞌugjäyaꞌay nhity mǿødhøc̈hä nDeedy.
39Mänitä Jesús jia madsáaṉägumbä. Pero cabä ñäꞌä yajmajch.
40Mänitä miøjnøønájxcumbä jaꞌa Jordángpä møjnøøbä maa jaꞌa Juan miäyajnäbejtsohṉ̃än.
41Mänitä Jesús hajxy ñämejch nämay. Mänit hajxy miänaaṉ̃: ―Cabä Juan jaꞌa hoy‑yagjuøøñäbäjaty ñäꞌä yajcähxøꞌcy. Pero tøyhajt jaduhṉ cøx̱iä nebiä Juan yøꞌøyaꞌay tøø ñägapxiän.
42Mänitä Jesús jaꞌa miädiaꞌagy hajxy jim̱ miäbøjcä nämay.
